13 قاراشا, 11:11 330 0 رۋحانيات انار لەپەسوۆا

ءدىن مەن ءداستۇر ساباقتاستىعى – تۇراقتىلىق تىرەگى

ق.ا. ياساۋي اتىنداعى حالىقارالىق قازاق-تۇرىك ۋنيۆەرسيتەتىندە تۇركىستان وبلىسى قوعامدىق دامۋ باسقارماسىنىڭ ۇيىمداستىرۋىمەن ەلىمىزدەگى ءدىني تۇراقتىلىقتى قامتاماسىز ەتۋ، مەملەكەتتىڭ زايىرلى قاعيدالارىن نىعايتۋ ماقساتىندا وبلىستىق اقپاراتتىق-ءتۇسىندىرۋ توبى مۇشەلەرىنىڭ سەمينارى ءوتتى. بۇل تۋرالى وبلىس اكىمىنىڭ ءباسپاسوز قىزمەتى حابارلادى. 

ەلباسىنىڭ "رۋحاني جاڭعىرۋ" باعدارلاماسى اياسىندا ۇيىمداستىرىلعان شارادا اقپاراتتىق-ءتۇسىندىرۋ توبى مۇشەلەرىنىڭ بىلىكتىلىگىن كوتەرۋ، ءدىني ەكسترەميزمدى ناسيحاتتاۋدىڭ الدىن الۋ، اسىرەسە ينتەرنەت پەن الەۋمەتتىك جەلىدە ساقتانۋ شارالارىن جەتىلدىرۋ مەن قوعامدا كەرەعار اعىمدارعا قارسى تۇراتىن بىرىڭعاي يممۋنيتەت قالىپتاستىرۋ جايى ءسوز بولدى.

سەمينار-ترەنينگكە قمدب جانىنداعى رەسپۋبليكالىق اقپاراتتىق ءتۇسىندىرۋ توبىنىڭ مۇشەسى ارمان قۋانىشباەۆ، بەلگىلى ءدىنتانۋشى مۇقان يساحان، قالالىق، اۋداندىق ىشكى ساياسات بولىمدەرىنىڭ باسشىلارى مەن ءدىن سالاسىنا جاۋاپتى قىزمەتكەرلەر، جوعارى، ورتا ارناۋلى وقۋ ورىندارىنىڭ وقىتۋشىلارى جانە ماگيسترانتتارى، قمدب تۇركىستان وبلىسى بويىنشا وكىلى، قالا، اۋدانداردىڭ باس يمامدارى، قالا، اۋدانداردىڭ جالپى ورتا مەكتەپتەرىنىڭ «زايىرلىلىق جانە ءدىنتانۋ نەگىزدەرى» ءپانىنىڭ مۇعالىمدەرى، سونداي-اق، بۇقارالىق اقپارات قۇرالدارىنىڭ وكىلدەرى قاتىستى.

سەمينار-ترەنينگتى تۇركىستان وبلىسى قوعامدىق دامۋ باسقارما باسشىسى ورىنباسارىنىڭ مىندەتىن اتقارۋشى داۋرەن ساريەۆ اشىپ، جۇرگىزىپ وتىردى. «قازىرگى كەزدە قازاقستاندا الەۋمەتتىك-ساياسي ومىردە ءدىننىڭ ءرولى ارتا ءتۇستى. ءدىن قوعامداعى رۋحاني مادەني سالانىڭ اسا ماڭىزدى بولىكتەرىنىڭ بىرىنە، تۇعىرلى الەۋمەتتىك ينستيتۋتقا اينالىپ كەلەدى. حالقىمىزدىڭ ەداۋىر بولىگى ناق وسى ءدىن ارقىلى ءداستۇرلى قۇندىلىقتار مەن قوعامدىق پاراساتتىق ۇستانىمدارىن قايتا جاڭعىرتۋعا ۇمتىلۋدا. بۇگىنگى شارانىڭ ماقساتى - ەلىمىزدەگى ءدىني تۇراقتىلىقتى قامتاماسىز ەتۋ، مەملەكەتتىڭ زايىرلى قاعيدالارىن نىعايتۋ بولىپ وتىر»، - دەپ اتاپ ءوتتى ول.

كەزدەسۋ بارىسىندا قمدب جانىنداعى رەسپۋبليكالىق اقپاراتتىق ءتۇسىندىرۋ توبىنىڭ مۇشەسى ارمان قۋانىشباەۆ، ءدىنتانۋشى مۇقان يساحان، قمدب-نىڭ تۇركىستان وبلىسى بويىنشا وكىل يمامى م. اقتامبەردى ترەنينگكە قاتىسۋشىلارعا زايىرلى مەملەكەتتە ءومىر ءسۇرىپ جاتقانىمىزدى ەسكەرە وتىرا ەلدىڭ تىنىشتىعى مەن كەلەشەگى ءۇشىن ءدىننىڭ تۋرا جولىنان جاڭىلماۋىمىز كەرەك ەكەنىن ءتۇسىندىردى.

ەلىمىزگە تانىمال ۇستاز ارمان قۋانىشباەۆ ءدىن مەن ءداستۇر ساباقتاستىعى بۇگىندە ۇلكەن ءرول اتقاراتىنىن، قازاقتىڭ سالتى مەن ساناسى يسلام ءدىنىمىزدىڭ تامىرىنا نەگىزدەلگەنىن جەتكىزدى. كەلەشەك ۇرپاقتىڭ ۇلتى ءۇشىن قىزمەت ەتۋىنە بارلىق اتا-انالار تال بەسىكتەن تاربيە بەرۋ كەرەكتىگىن دە تىلگە تيەك ەتتى. كەزدەسۋ سوڭىندا قاتىسۋشىلارعا ارنايى سەرتيفيكاتتار تابىستالدى.

 

سوڭعى جاڭالىقتار