13 قاراشا, 10:22 336 0 دەنساۋلىق انار لەپەسوۆا

ء"وز اعزامدى بەرۋگە دايىنمىن": بالا قاعىپ كەتكەن قازاقستاندىقتىڭ اناسى كورەيالىقتاردىڭ اياعىنا جىعىلدى

چحانۆون قالاسىندا 7 جاسار بالانى قاققان قازاقستاندىق ازاماتتىڭ اناسى وڭتۇستىك كورەياعا بارىپ، حالقى مەن زارداپ شەككەن ءبۇلدىرشىننىڭ جاقىندارىنان كەشىرىم سۇرادى. بۇل پروتسەسس جەرگىلىكتى JTBC تەلەارناسى ارقىلى كورسەتىلدى، دەپ حابارلايدى "حابار 24".

 «مەن، قازاقستان ازاماتشاسى كورەيا ەلىنە كەلگەن ماقساتىم: كورەي حالقىنان، وسى ەلدە بولعان جول اپاتى ءۇشىن، جول اپاتىنان زارداپ شەككەن كىشكەنتاي بالا ءۇشىن ءوز اتىمنان جانە ۇلىمنىڭ اتىنان باسىمدى ءيىپ كەشىرىم سۇراۋ. بۇل ەكى ەل اراسىنداعى ءىس بولعاندىقتان، ەرتەرەك كەلىپ سىزدەردەن كەشىرىم سۇراي المادىق. مەنىڭ ۇلىم ءوز قاتەلىگى ءۇشىن زاڭ الدىندا جاۋاپ بەرەدى. تەك سىزدەردەن وتىنەرىم، جۇمىلا ەل بولىپ زارداپ شەككەن كىشكەنتاي بالانىڭ اماندىعىن تىلەيىك. سونداي-اق زارداپ شەككەن كىشكەنتاي بالادان جانە ونىڭ اتا-اناسىنان ەرەكشە اياقتارىنا جىعىلىپ كەشىرىم سۇرايمىز.

   قۇرمەتتى زارداپ شەككەن بالانىڭ اتا-اناسى! مەن انا رەتىندە سىزدەردىڭ جاعدايلارىڭىزدى تۇسىنەمىن. بۇل جاعداي سىزدەردى قاتتى كۇيزەلتتى. مەن دە سىزدەردىڭ ۇلدارىڭىزدىڭ اماندىعىن ءبىر اللادان تىلەيمىن. الداعى ۋاقىتتا بولاتىن وپەراتسيادا ءسىزدىڭ ۇلىڭىزعا كومەك كورسەتۋگە دايىنبىز. ەگەر قانداي دا ءبىر ورگان اۋىستىرۋ كەرەك بولسا، ۇلىم ەكەۋمىز ءوز اعزامىزدى بەرۋگە دايىنبىز. ۇلدارىڭىزدى امان الىپ قالعان كورەيا دارىگەرلەرىنە العىسىمىز شەكسىز», – دەپ جازدى جازىقتى قازاقستاندىقتىڭ اناسى قاعازعا.

ەسكە سالا كەتسەك، 16 قىركۇيەك كۇنى وڭتۇستىك كورەيادا قازاقستان ازاماتى كولىكپەن بالا قاعىپ كەتكەن. بۇل وقيعا بىردەن قوعامدا داۋ تۋدىردى. سەبەبى جەرلەسىمىز ول ەلگە زاڭسىز كىرگەن جانە كولىك جۇرگىزەتىن قۇجاتى بولماعان. كۇدىكتى وقيعا ورنىنان ءىزىن سۋىتىپ، قازاقستانعا كەتىپ قالعان. بىراق كەيىننەن كەرى قايتقان. بۇعان دەيىن 20 جاستاعى وتانداسىمىز 5 جىلعا دەيىن باس بوستاندىعىنان ايىرىلۋى مۇمكىن دەگەن اقپارات پايدا بولعان ەدى. بۇل ىسكە قاتىستى سوت وتىرىسى ەرتەڭ وتەدى. وڭتۇستىك كورەيا پرەزيدەنتى مۋن چجە ءيننىڭ اتىنا جولدانعان پەتيتسياعا قىلمىسكەردى جازالاۋدى تالاپ ەتكەن 60 مىڭ ادام قول قويىپتى.

سوڭعى جاڭالىقتار