12 قاراشا, 15:10 324 0 ەكونوميكا انار لەپەسوۆا

الماتى اۋەجايىن شەتەلدىك كومپانياعا ساتۋ بويىنشا كەلىسسوزدەر جۇرگىزىلۋدە

الماتى اۋەجايى تۇرىك كومپانياسىنا ساتىلۋى مۇمكىن. قازىر كەلىسسىزدەر جۇرگىزىلىپ جاتىر. بۇل تۋرالى قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ مالىمدەدى. 

ءمينيستردىڭ ايتۋىنشا، بۇل قادام اۋەجايداعى قىزمەت كورسەتۋ ساپاسىن جاقسارتۋعا جول اشادى. «قازىر تۇرىك كومپانياسىمەن  كەلىسسوزدەر جۇرگىزىلىپ جاتىر، سوندىقتان ەشتەڭە ايتا المايمىن. «الماتى» اۋەجايى جەكە كومپانيا مەنشىگىندە. سوندىقتان ساتىلىپ جاتىر. ازاماتتىق اۆياتسيا كوميتەتىمەن كەلىسۋ قاجەت تۇستارى بويىنشا ءتيىستى جۇمىستار جۇرگىزىلۋدە. مەنىڭ ويىمشا، بۇل قىزمەت كورسەتۋ ساپاسىن جاقسارتۋ جانە قوسىمشا ينۆەستيتسيالار تارتۋدا جاقسى قادام بولادى دەپ سانايمىن. مەنىڭ بىلۋىمشە، باسشىلىققا بىرنەشە اۋەجايعا يە بەلگىلى كومپانيا كەلەدى. جانە فرانتسيادا ەكى اۋەجاي بار سياقتى»، – دەيدى قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ.

ال بيلەت باعاسى حالىقارالىق جانە ەۋروپالىق ستاندارتتارعا سايكەس بەكىتىلۋى ءتيىس دەدى مينيستر مىرزا. سونىمەن قاتار سوڭعى ۋاقىتتا الماتى اۋەجايىندا جولاۋشىلار اعىنى ۇلعايعانىن ايتتى. سول سەبەپتى وڭتۇستىك استاناعا كاتار اۋە جەلىسى ارقىلى بىرنەشە باعىت قوسىلاتىنىن اتاپ ءوتتى.

«وتكەن اپتادا دوحادا جۇرگىزىلگەن كەلىسسوزدەر اياقتالدى. جەلتوقساننىڭ ورتاسىنان باستاپ،  كاتار اۋە جەلىسىنىڭ 7 رەيسى الماتى مەن نۇر-سۇلتان قالالارىنا كۇن سايىن قاتىنايتىن بولادى. سونداي-اق تاعى 7 جۇك رەيسى بولادى. بۇل ءبىزدىڭ ازاماتتارعا قوسىمشا باعىتتاردى تاڭداۋعا مۇمكىندىك بەرەدى. بۇل باعا مەن قىزمەتكە ءوز اسەرىن تيگىزەدى»، – دەدى قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ.

سوڭعى جاڭالىقتار