12 قاراشا, 09:56 296 0 ءوندىرىس انار لەپەسوۆا

ەلىمىز 9 ايدا 42,7 ملرد دوللاردىڭ ءونىمىن ەكسپورتتادى

قازاقستاننىڭ 9 ايداعى ەكسپورت كولەمى 42,7 ملرد دوللاردى قۇرادى. بۇل تۋرالى بۇگىن ۇكىمەت وتىرىسىندا ەلىمىزدىڭ 10 ايداعى الەۋمەتتىك-ەكونوميكالىق دامۋ قورىتىندىسى جايىندا بايانداعان ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات.

«ونەركاسىپ ءوندىرىسى ورنىقتى ءوسۋ ءۇردىسىن ساقتاپ وتىر. قاڭتار-قازاندا ءوسىم 3,5 پايىزدى قۇرادى. وڭدەۋ ونەركاسىبى 3,3 پايىزعا ءوستى. ءوسۋ نەگىزگى وڭدەۋ سالالارىندا قول جەتكىزىلگەن قارقىننىڭ ساقتالۋىمەن قامتاماسىز ەتىلدى. ولار: جەڭىل ونەركاسىپ، ماشينا جاساۋ، فارماتسەۆتيكا جانە سۋسىندار ءوندىرىسى»، - دەدى رۋسلان دالەنوۆ.

ونىڭ ايتۋىنشا، مۇناي ءوندىرۋدى قالپىنا كەلتىرۋ ەسەبىنەن كەن ءوندىرۋ ونەركاسىبىندە ءوسىم 3,7 پايىزعا ارتتى. ءتۇستى مەتالدار كەنىن وندىرۋدە 18 پايىز دەڭگەيىندە جوعارى ءوسۋ قارقىنى ساقتالدى. «قۇرىلىس جۇمىستارى قارقىندى جۇرگىزىلۋدە. ءوسۋ 12,7 پايىزدى قۇرادى. 9,8 ميلليون شارشى مەتر تۇرعىن ءۇي پايدالانۋعا بەرىلدى. اۋىل شارۋاشىلىعى سالاسىندا مال شارۋاشىلىعى ونىمدەرىنىڭ ءوندىرىسى 3,9 پايىزعا ۇلعايدى. بۇل رەتتە، وسىمدىك شارۋاشىلىعىنىڭ ناقتى يندەكس كولەمى 96,8 پايىزعا دەيىن جاقساردى. ناتيجەسىندە اۋىل شارۋاشىلىعىندا تومەندەۋ تەرەڭدىگى 0,2 پايىزعا دەيىن قىسقاردى»، - دەدى ول.

مينيستر دەرەگىنشە، كورسەتىلەتىن قىزمەتتەر سالاسىندا ءوسىم 4,4 پايىزدى قۇرادى. ساۋدا كولەمى 7,5, كولىك – 5,6 جانە بايلانىس – 4,5 پايىزعا ءوستى. «قاڭتار-قىركۇيەكتە سىرتقى ساۋدا اينالىمى 1,5 پايىزعا ءوسىپ، 70,4 ميلليارد دوللاردى قۇرادى. ەكسپورت كولەمى 42,7 ميلليارد دوللار، ال يمپورت 27,6 ميلليارد دوللار بولدى»،- دەدى ر.دالەنوۆ.

 

سوڭعى جاڭالىقتار