8 قاراشا, 10:26 278 0 الەۋمەت انار لەپەسوۆا

اۋىلدى كوركەيتۋ  قاعاز جۇزىندە قالماسىن...

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا «اۋىل – ەل بەسىگى» باع­دارلاماسىنىڭ جۇزەگە اسىرىلۋ بارىسى تالقىلاندى.

اۋىل تۇرعىندارىنىڭ ءومىر ءسۇرۋ ساپاسى مەن ءال-اۋقاتىن جاقسارتۋ، اۋىلداردى تۇراقتى دامىتۋدى ماقسات ەتكەن جوبانى جۇزەگە اسىرۋ ءۇشىن 2019-2021 جىلدارى بيۋدجەتتەن 90 ملرد تەڭگە ءبولۋ جوسپارلانعان. ال 2019 جىلعا 30 ملرد تەڭگە قاراستىرىلىپ وتىر.

ۇكىمەت وتىرىسىندا جوبانىڭ ىسكە اسىرىلۋى تۋرالى بايانداعان پرەمەر-ءمينيستردىڭ ورىنباسارى رومان سكليار قازىرگى ۋاقىتتا 6 443 اۋىلدا 7,7 ملن ادامنىڭ تۇراتىنىن مالىمدەدى. بۇل حالىقتىڭ 42 پايىزىن قۇرايدى. «بۇگىنگى كۇنى اۋىلدىق جەرلەردە بىرقاتار شەشىلمەگەن ماسەلەلەر بار. اۋىلدىڭ جارتىسىنان استامىندا كوشەلەردى جوندەۋ قاجەت. ينجەنەرلىك جەلىلەر توزۋىنىڭ جوعارى دەڭگەيى بايقالادى. كوپتەگەن اۋىلداردا، ءبىلىم بەرۋ جانە دەنساۋلىق ساقتاۋ وبەكتىلەرى جوندەۋدى قاجەت ەتەدى. وسىعان بايلانىستى اۋىلدى دامىتۋ ءۇشىن كەشەندى ءتاسىل قولدانۋدى ۇسىنامىز»، – دەدى رومان سكليار.

ۆيتسە-پرەمەردىڭ مالىمەتىنشە، بۇگىندە دامۋ الەۋەتى بار 3 477 اۋىل ىرىكتەلىپ الىنعان. اتال­عان اۋىلداردا 6,6 ملن ادام (اۋىل حالقىنىڭ 85 پايىزى) تۇرادى. سوندىقتان بۇل ەلدىمەكەندەردى دامىتۋ الدىڭعى كەزەكتەگى ماسەلە. سونداي-اق بيىل شامامەن 700 مىڭ تۇرعىنى بار 53 اۋىلدا 452 ينفراقۇرىلىمدىق جوبا ىسكە اسىرىلۋدا. جوبالاردى جۇزەگە اسىرۋ ءۇشىن 30 ملرد تەڭگە قاراستىرىلعان. بۇلار – الەۋمەتتىك (مەكتەپتەر، اۋرۋحانالار، مادەنيەت جانە سپورت نىساندارى) جانە ينجەنەرلىك ينفراقۇرىلىمداردى (جولدار، سۋ، ەلەكتر، جىلۋمەن قامتاماسىز ەتۋ) جوندەۋ جانە قايتا جاڭارتۋ جونىندەگى جوبالار. «بۇل جۇمىستىڭ باستاماسى عانا. باستالعان جۇمىستاردى ءبىز 2020 جىلى جالعاستىرامىز. ەلى­مىزدىڭ بارلىق وڭىرلەرىندە اۋىل ينفراقۇرىلىمىن كەڭ اۋقىمدى جاڭعىرتۋ باستالادى. كوزدەلگەن 30 ملرد تەڭگەگە 2020  جىلى قوسىمشا 50 ملرد تەڭگە بولىنەتىن بولادى»، – دەپ اتاپ ءوتتى پرەمەر-ءمينيستردىڭ ورىنباسارى.

ورىنباسارىنىڭ ەسەبىن مۇقيات تىڭداعان ۇكىمەت باسشىسى اسقار مامين تاقىرىپتى قورىتىندىلاۋ بارىسىندا بىرقاتار ناقتى تاپسىرما بەردى. ەڭ الدىمەن، «اۋىل – ەل بەسىگى» جوباسىن قارجىلاندىرۋدى ۇلعايتۋ تۋرالى ۇسى­نىستار ەنگىزۋدى مىندەتتەدى.

 

سوڭعى جاڭالىقتار