8 قاراشا, 10:10 276 0 ايماق انار لەپەسوۆا

"ەڭبەك" باعدارلاماسى: كاسىبىن اشقىسى كەلەتىن الماتىلىقتارعا گرانت بەرىلەدى

الماتى قالاسىنىڭ جۇمىسسىز ازاماتتارىنا گرانت تاعايىندالماق. مەملەكەتتىك گرانتتى يەلەنۋگە «ەڭبەك» جۇمىسپەن قامتۋ باعدارلاماسى شەڭبەرىندە قىسقا مەرزىمدى كۋرستاردى تامامداعاندار مەن «باستاۋ بيزنەس» جوباسى بويىنشا كاسىپكەرلىك نەگىزدەرىن وقىعاندار ۇمىتكەر بولا الادى. گرانت كولەمى 100 ايلىق ەسەپتىك كورسەتكىشكە دەيىن بارادى، دەپ حابارلايدى الماتى ارناسى. 

ال از قامتىلعان جانە كوپبالالى وتباسىلارعا، ەڭبەككە جارامدى مۇگەدەكتەر مەن 29 جاسقا دەيىنگى جاستارعا بۇل كورسەتكىش 200 ايلىق ەسەپتىك كورسەتكىشكە دەيىن ۇلعايتىلۋى مۇمكىن.

«بۇل گرانتتار «ەڭبەك» باعدارلاماسى ارقىلى قىسقا مەرزىمدى كۋرستان وتكەندەرگە تاعايىندالادى. 1 اي جانە 3 اي كولەمىندە وقۋدان وتكەندەر كاسىبي ماماندىق الىپ شىعادى. جالپى بۇل قولداۋ ولارعا ءوز بيزنەسىن دوڭگەلەتۋ ءۇشىن قاراستىرىلعان. وعان بولاشاق كاسىپكەرلەر قاجەت جابدىقتار مەن قۇرال-سايمانداردى ساتىپ الا الادى», - دەدى الماتى قالاسى جۇمىسپەن قامتۋ ورتالىعى ديرەكتورىنىڭ ورىنباسارى قارلىعاش اتايبەكوۆا

قالدىگۇل ەسىمدى كوپبالالى انا شاشتاراز ماماندىعىن مەڭگەرۋ ۇستىندە. وقۋدى اياقتاعان سوڭ، گرانتقا قول جەتكىزسەم دەپ ارماندايدى.

«مەن كوپبالالى انامىن. جۇمىسپەن جۇرگەنمىن. سونىمەن جۇمىسپەن قامتۋ ورتالىعىنا بارىپ، وسى جەرگە كەلدىم. ءوزىمنىڭ نەگىزگى ماماندىعىم شاشتاراز ەدى. ارى وقاراي دامىتقىم كەلدى. وقىپ جاتىرمىز 2 اي بولدى. الدا تەستىمىز بار، ەكزامەنىمىز بار. سودان امان-ەسەن ءوتىپ، العا قويعان ماقساتتارىمىزدى، بولاشاعامىزدى وتكىزىپ الساق دەپ», - دەدى قالدىگۇل بازارگەلديەۆا.

قىسقا مەرزىمدى كۋرستاردان وتكەن سوڭ، بارلىق قاتىسۋشىلارعا جۇمىسقا ورنالاسۋعا نە بولماسا ءوز ءىسىن اشۋعا كومەك كورسەتىلەدى. ورازگۇل تىنىمباەۆا قازىر ىسكەر ايەل. جۇمىسپەن قامتۋ ورتالىعىنا بارىپ، «شاشتاراز» ماماندىعىن وقىپ شىققاننان كەيىن، 100 ايلىق ەسەپتىك كورسەتكىشىندە گرانت جەڭىپ العان. سول قاراجاتقا ءوزىنىڭ جەكە سۇلۋلىق سالونىن اشىپ، قازىر ءسان شەبەرلەرىن دايىندايتىن  وقۋ ورتالىعىن دامىتۋ ۇستىندە.

«گرانتتى الدىم. العاننان كەيىن سالون اشتىم. سالوندى اشقاننان كەيىن الدىما ماقسات قويدىم. مەن ءبىر سالونمەن شەكتەلىپ قالمايىن دەپ. ۇكىمەت كومەك بەرىپ جاتىر. اتامەكەندە كونسۋلتاتسيا تەگىن، كوپ جاعداي جاسالعان. تاعى دا گرانتتار بەرىلىپ جاتىر، سولاردى ءبىلىپ وتىرىپ، وزىمە تاعى ءبىر وقۋ ورتالىعىن اشامىن دەپ ماقسات قويدىم. يۋلدەن باستاپ جۇگىرىپ، سەنتيابردەن باستاپ، ادام الىپ، وقىتىپ جاتىرمىن قازىر», - دەدى ورازگۇل تىنىمباەۆا.

جاڭا ماماندىق يەسى اتانىپ، ءوز بيزنەس-يدەسياىن جۇزەگە اسىرعىسى كەلەتىندەرگە نازارباەۆ داڭعىلى، 50 مەكەن-جايى بويىنشا ورنالاسقان جۇمىسپەن قامتۋ ورتالىعىنا بارۋ قاجەت.

سوڭعى جاڭالىقتار