7 قاراشا, 15:59 312 0 ءبىلىم انار لەپەسوۆا

دەپۋتات ءبىلىم جانە عىلىم ۆيتسە-ءمينيسترىن قىزمەتىنەن بوساتۋدى تالاپ ەتتى

سەنات دەپۋتاتى ەدىل مامىتبەكوۆ پلاگيات توڭىرەگىندەگى داۋدان كەيىن ءبىلىم جانە عىلىم ۆيتسە-ءمينيسترى فاتيما جاقىپوۆانى قىزمەتىنەن بوساتۋ ماسەلەسىن قوزعادى، دەپ حابارلايدى  Sputnik قازاقستان. 

ۇكىمەت باسشىسى اسقار مامينگە جولداعان دەپۋتاتتىق ساۋالىندا مامىتبەكوۆ ءبىلىم سالاسىندا قوردالانعان ماسەلەلەردى كوتەردى. سونىڭ ءبىرى ءبىلىم جانە عىلىم ءمينيسترىنىڭ ورىنباسارى فاتيما جاقىپوۆانىڭ "جالعان عالىم" اتانۋى.

"سىزدەر بىلەسىزدەر، ءبىر ايدان استام ۋاقىت بويى وتاندىق باق پەن شەتەلدىك ۇيىمدار قازاقستاندىق ۆيتسە-ءمينيستردىڭ پلاگياتىن تالقىلاپ جاتىر. قازىر الەمدە مويىندالعان ەكى انتيپلاگياتتىق جۇيە باسقا بىرەۋدىڭ عىلىمي جۇمىسىن پايدالانۋ فاكتىسىن راستاپ وتىر. مۇنداي جاعدايدا ۆەدومستۆولىق ۇلتتىق مەملەكەتتىك عىلىمي-تەحنيكالىق ساراپتاما ورتالىعىن پايدالانىپ، قازاقستاندىق قوعامدى جاڭىلىستىرۋ - مەملەكەتتىك قىزمەتكەردىڭ ەتيكالىق كودەكسىن بۇزۋ بولىپ سانالادى", - دەدى دەپۋتات.

مامىتبەكوۆ عىلىمي ۇيىمدار اراسىندا قارجىنى ءبولۋ كەزىندە تۇيتكىلدى ماسەلەلەر ورىن الىپ جاتقانىن العا تارتتى. ايتۋىنشا، قازىر ەلىمىزدە ەشقاشان ەش جەردە قولدانىسقا ەنگىزىلمەيتىن جوبالارعا قىرۋار قارجى بولىنەدى. ال قۇندى، قوعامعا پايداسى بار جوبالار نازاردان تىس قالادى، نەمەسە بولىنگەن اقشا ونى ساپالى جۇزەگە اسىرۋ ءۇشىن ماردىمسىز.

"باسقاشا ايتقاندا، بىزدە عىلىمدى باسقاراتىن وكىلەتتى ورگاندا وبەكتيۆتىلىك پەن ادىلدىك جوق", - دەدى ول.

سەنات دەپۋتاتى "جالعان عالىم" دەپ ايىپتالعان ۆيتسە-ءمينيستردىڭ ءالى دە ءوز قىزمەتىندە جۇرگەنىن ايتتى.

"نەگە ءالى كۇنگە دەيىن كادرلىق شەشىم قابىلدانعان جوق؟", - دەدى مامىتبەكوۆ.

ءسوز سوڭىندا سەناتور عىلىمي قوعام مەن جوعارى ءبىلىم جۇيەسىن وزگە ەلدەر الدىندا قازاقستاننىڭ بەدەلىن تۇسىرگەن لاۋازىمدى تۇلعانىڭ ماسقاراسىنان قۇتقارۋدى تالاپ ەتتى.

سوڭعى جاڭالىقتار