6 قاراشا, 11:08 298 0 زاڭ انار لەپەسوۆا

قاراعاندىلىق 1200 ازاماتقا ەل اۋماعىنان شىعۋعا تىيىم سالىندى

قاراعاندى وبلىسىنىڭ 1200 تۇرعىنىنا ەل اۋماعىنان شىعۋعا تىيىم سالىندى. ولاردىڭ بارلىعى بورىشكەرلەر. مامانداردىڭ ايتۋىنشا، بۇگىندە ايماقتا اليمەنت، سالىق، ايىپپۇل، بانك قارىزدارىن تولەۋدەن جالتارىپ جۇرگەندەردىڭ جالپى سانى 250 مىڭعا جەتكەن.

ءوڭىر تۇرعىندارىنىڭ تەك سالىق بەرەشەگىنىڭ ءوزى 1 ميلليارد 170 ميلليون تەڭگەدەن اسادى. وكىنىشكە قاراي، ولاردىڭ ءىسى ءالى كۇنگە ايماقتىق سوت ورىنداۋشىلار پالاتاسىندا جاتىر. سوت شەشىمىنىڭ دەر كەزىندە ورىندالماۋىنا ەڭ اۋەلى ماماندار تاپشىلىعى سەبەپ، - دەيدى پالاتا وكىلدەرى. ماسەلەن، ۇلىتاۋ، قارقارالى، اقتوعاي اۋداندارى مەن پريوزەرسك قالاسىندا قازىر سوت ورىنداۋشىلارى مۇلدەم جوق. ونىڭ ۇستىنە، مەملەكەتتىك جانە جەكە سوت ورىنداۋشىلاردىڭ مارتەبەسى تەڭ ەمەس. سوڭعىسىنىڭ اكىمشىلىك قۇقىقبۇزۋشىلىق تۋرالى حاتتاما تولتىرۋعا قۇقى جوق. ونى مەملەكەتتىك سوت ورىنداۋشىلارعا جىبەرەدى. ال پالاتاداعى ساناۋلى ادام قاپتاعان ءىستى قاراپ ۇلگەرمەيدى. وسىدان سوڭ بورىشكەرلەر سانى ءوسىپ، قارىز ءوندىرۋ ءىسى اقساپ تۇر.

بۇگىنگە دەيىن سوت شەشىمىن ورىنداماعان بورىشكەرلەردىڭ تەك 27 پروتسەنتى جاۋاپقا تارتىلعان. سوندىقتان دەپۋتاتتار ەڭ الدىمەن زاڭعا وزگەرىس ەنگىزۋ قاجەت دەپ وتىر. ويتكەنى ۇلت جوسپارىنداعى «100 ناقتى قادامدا» ءدال وسى سوت ورىنداۋشىلار جۇمىسىن جەتىلدىرۋ ماسەلەسى ايتىلعان.

 

سوڭعى جاڭالىقتار