4 قاراشا, 11:19 357 0 دەنساۋلىق انار لەپەسوۆا

شىمكەنتتە ءبىر وتباسىنىڭ ەكى بالاسى استان ۋلانىپ، كوز جۇمدى

شىمكەنتتە ءبىر وتباسى استان ۋلانىپ، اناسى مەن ءۇش بالاسى اۋرۋحاناعا تۇسكەن. الايدا دارىگەرلەر 1 جانە 4 جاسار بالانى امان الىپ قالا المادى. بۇل تۋرالى قالالىق تجد ءباسپاسوز قىزمەتى حابارلادى. 

كەشە ساعات 10:30-دا جۇقپالى اۋرۋلار اۋرۋحاناسىنا «تاعامنان ۋلانۋ» دياگنوزىمەن ءبىر وتباسىدان شىققان بالالار مەن اناسى تۇسكەن. ولار ەڭبەكشى اۋدانىنا قاراستى الدياروۆ كوشەسىندەگى كوپقاباتتى ۇيدەن جەتكىزىلگەن. وتاعاسىنىڭ ايتۋىنشا، العاشقى اۋىرعان ساتتە، ياعني تۇنگى 04:42-دە وسى مەكەنجاي بويىنشا جەدەل جاردەم شاقىرتقان. سەبەبى تاماقتان ۋلانعان ايەلى مەن ءۇش پەرزەنتى جاپپاي قۇسقان. اۋىرسىنۋ بەلگىلەرى بايقالعان. جەدەل جاردەممەن كەلگەن مەديتسينا قىزمەتكەرلەرى ەم تاعايىنداپ، كەتىپ قالعان. الايدا جانۇيا مۇشەلەرىنىڭ جاعدايلارى ودان سايىن ناشارلاپ، تاڭەرتەڭ تاعى مەديتسينالىق كومەك شاقىرتقان. ءسويتىپ 1987 جىلى تۋعان اناسى مەن 2008, 2015, 2018 جىلدارى تۋعان بالالارى توكسيكولوگيالىق بولىمشەگە جاتقىزىلعان.

«كۇندىزگى ساعات 11:00-دە جۇقپالى اۋرۋلار اۋرۋحاناسىندا 2015 ج. ت. بالا قايتىس بولدى. ساعات 14:00-دە 2018 جىلى تۋعان بالا كوز جۇمدى. قازىرگى تاڭدا ولاردىڭ ءولىمنىڭ سەبەبى انىقتالۋدا. سوت-مەديتسينالىق ساراپتامالار تاعايىندالدى. امان قالعان ەكى ادامنىڭ جاعدايلارى قاناعاتتانارلىق. تج دەپارتامەنتىنىڭ 3 قىزمەتكەرى وقيعا ورنىنا بارعان. ولار مۇقيات تالداۋدان كەيىن ۋلى گازبەن ۋلانۋ فاكتىلەرىن تىركەمەدى»، – دەلىنگەن حابارلامادا.

سوڭعى جاڭالىقتار