4 قاراشا, 10:27 330 0 سپورت انار لەپەسوۆا

تاعى دا چەمپيون: "استانا" التىنشى مارتە ەل ۇزدىگى اتاندى

«استانا» قاتارىنان التىنشى رەت قازاقستان چەمپيونى اتاندى. ەلوردالىق كوماندا پرەمەر-ليگانىڭ اياقتالۋىنا ءبىر تۋر قالعاندا «قايراتتان» قارا ءۇزىپ كەتتى. رومان گريگورچۋك شاكىرتتەرى قوستانايدا "توبىلدىڭ" وسال تۇسىن تاپسا، الماتىلىقتار پاۆلوداردا «ەرتىسكە» توتەپ بەرە المادى. 

«استانا» كومانداسىنان شەشۋشى گولدى 38-مينۋتتا يۋري لوگۆينەنكو سوقتى. قورعاۋشى اۋەلەپ كەلگەن دولپتى باسپەن قاقپاعا ءدال باعىتتادى. «توبىل» قولا جۇلدەدەن دامەلى ەدى. سوندىقتان الاڭ يەلەرى دە اتاقتى قارسىلاسىن اياقتان شالۋعا تىرىستى. ءتىپتى العاشقى تايمدا قوستاناي فۋتبولشىلارى ەسەپ اشقان ەدى. الايدا تورەشى گولدى ەسەپتەگەن جوق. قورىتىندى ەسەپ: 0:1. «استانا» شەشۋشى سىندا تاباندىلىق تانىتىپ، التىنشى جىل چەمپيوندىق اتاقتى ەشكىمگە ۇستاتپادى. بۇل كورسەتكىش جاعىنان ەلوردا كومانداسى قازاقستاندا جەكە-دارا العا شىقتى.

«استانا» 2014 جىلدان بەرى پرەمەر-ليگادا توپ جارىپ ءجۇر. سوڭعى تۋردا ولار «قايراتتى» توقتاتقان «ەرتىستى» قابىلدايدى. 32-تۋردا "اقتوبە" "شاحتەردى" قابىلداپ، 3:2 ەسەبىمەن جەڭىسكە جەتتى. "وقجەتپەس" "جەتىسۋمەن" ۇپاي ءبولىستى. ەسەپ:1:1. "تاراز" "قايساردى" قابىلداپ، 2:1 ناتيجەسىمەن باسىم ءتۇستى. "ورداباسى" سىرت الاڭدا "اتىراۋدان" ايلاسىن اسىردى. شىمكەنت كومانداسى 3:1 ەسەبىمەن ماڭىزدى  جەڭىسىنە قول جەتكىزدى. "ەرتىس" "قايرات" قاقپاسىنا جاۋاپسىز بەس دوپ سوقتى. 32-ءشى تۋردان كەيىن "استانا" 69 ۇپاي جيناپ، باستى قارسىلاسى "قايراتتان" وزىپ كەتتى.

الماتى كومانداسى كەزەكتى مارتە كۇمىس جۇلدەنى قاناعات قىلدى. قولا مەدالدان "ورداباسىنىڭ" ءۇمىتى زور. شىمكەنت كومانداسىنان ەكى ۇپايى كەم "توبىل" دا ءۇشىنشى ورىننان كۇدەر ۇزگەن جوق. "اقتوبە" بيىلعى بىرىنشىلىكتى ءساتسىز وتكىزىپ، ءبىرىنشى ليگاعا ءتۇسىپ قالدى. "تاراز" بەن "اتىراۋدىڭ" دا جاعدايى قيىن.

«قىزىل-جار» كومانداسى پرەمەر-ليگاعا جولداما الدى. پەتروپاۆل فۋتبولشىلارى قازاقستان ءبىرىنشى ليگاسىندا توپ جارىپ، قايتادان جوعارعى توپقا قوسىلدى. ءالي اليەۆ شاكىرتتەرى سوڭعى تۋردا "بايقوڭىردى" قابىلداپ، 6:0 ەسەبىمەن جەڭىسكە جەتتى. "قىزىل-جار" 26 ماتچتا 58 ۇپاي جيناپ، ەڭ ناتيجەلى كوماندا اتاندى. ەكىنشى ورىن "كاسپيگە" بۇيىردى. اقتاۋ كومانداسى دا پرەمەر-ليگاعا شىقتى. قولا مەدالدى "اقجايىق" ۇتتى. ورال كلۋبى ەندى پرەمەر-ليگانىڭ كومانداسىمەن جوعارعى ليگانىڭ قوسىمشا جولداماسىنا تالاسادى.

 

سوڭعى جاڭالىقتار