21 قازان, 12:35 371 0 ءبىلىم انار لەپەسوۆا

مينيسترلىك بالاباقشا باعدارلاماسىنان اعىلشىن ءتىلىن الىپ تاستاماق

بۇدان بىلاي ەلىمىزدەگى بالاباقشالاردا اعىلشىن ءتىلى وقىتىلمايدى. قازاقستاننىڭ ءبىلىم جانە عىلىم مينيسترلىگىنىڭ مەكتەپكە دەيىنگى تاربيە سالاسىنداعى رەفورمالارى جايلى ۆەدومستۆو باسشىسى اسحات ايماعامبەتوۆ ايتىپ بەردى.   

"مەكتەپكە دەيىنگى ءبىلىم باعدارلاماسىنان اعىلشىن ءتىلىن الىپ تاستاۋدى جوسپارلاپ وتىرمىز", - دەدى ايماعامبەتوۆ ماجىلىستە ء"بىلىم جانە عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسىن ىسكە اسىرۋدىڭ الدىن-الا قورىتىندىلارى تۋرالى" ۇكىمەت ساعاتىندا.

بۇدان بولەك، ءبىلىم مينيسترلىگى بالاباقشا تاربيەشىلەرىنىڭ جالاقىسىن كوتەرۋدى كوزدەپ وتىر.

"تاعى ءبىر ماسەلەنىڭ ءبىرى – بىرىڭعاي ەلەكتروندى كەزەكتىڭ جوقتىعى. كەيدە مەملەكەتتىك تاپسىرىس بويىنشا جەكەمەنشىك بالاباقشاعا بارعان بالالار كەزەكتەن شىعارىلماي قالادى", - دەدى ول.

ايماعامبەتوۆ ليتسەنزيالاۋ مەن اككرەديتاتسيانىڭ جوقتىعى دا بىرقاتار پروبلەما تۋدىرىپ وتىرعانىن اتاپ ءوتتى.

ايتا كەتسەك، قازىر قازاقستاندا بارلىعى 10 673 مەكتەپكە دەيىنگى ۇيىم جۇمىس ىستەيدى. ونىڭ ىشىندە بالاباقشالار سانى – 6 470, شاعىن ورتالىقتار – 4 203.

 

سوڭعى جاڭالىقتار