20 قازان, 17:04 398 0 جاڭالىقتار انار لەپەسوۆا

قارجى پيراميداسىنا الدانعان قازاقستاندىقتار سانى 700-گە جەتتى

ەلىمىزدە اتىشۋلى "Questra World" پيراميداسىنا قارجى قۇيىپ، كەيىننەن بارماق تىستەپ قالعاندار سانى 700 ادامعا جەتكەن. ۇيىم وكىلدەرى بىرنەشە قالالاردا جيىن وتكىزىپ، سەرتيفيكات تابىستاعان. ونىمەن قوسا سالعان "ينۆەستيتسيا" ارقىلى جىلىنا 200-300 ەسە پايدا تاباسىز دەپ جۇرتتى سەندىرىپتى. جيعان-تەرگەنىن الاياقتارعا بەرىپ، سوڭىندا جەر سيپاپ قالعاندار بۇگىندە ەلوردادا ادىلدىككە قول جەتكىزە الماي كەلەدى، دەپ حابارلايدى "ەۋرازيا" ارناسى. 

"جالپى، كىرگەن سومامىز ءبىزدىڭ 12 ملن تەڭگەنى قۇرايدى. بۇل قارجىلىق پيراميدا قازاقستانعا 2016 جىلى كىرگەن. ونى روسسيانىڭ ازاماتتارى الىپ كەلگەن. بىراق، قازاقستاندا تاراتىپ، دامىتىپ جۇرگەن ول  كاراماەۆ كەنەسارى دەگەن قاراعاندىنىڭ ازاماتى، قازىر سوت پروتسەسى ءجۇرىپ جاتىر. سوت پروتسەسىنە ءبىزدىڭ نارازىلىعىمىز بار. 550 ملن-نان ارتىق دوللار قازاقستاننىڭ شەتىنە شىعارىلىپ كەتكەن", - دەيدى قارجىلىق پيراميداسىنىڭ سالىمشىسى گۇلجان كۇزەر.

ءدال وسى قارجى پيراميداسىنان وپىق جەگەندەردىڭ جاعدايىنا الاڭداعان حالىق قالاۋلىلارى دا ەكى جىل بۇرىن پارلامەنتتە ماسەلە كوتەرگەن ەدى. ازاماتتارىمىزدىڭ قارجىلىق ساۋاتىنىڭ تومەندىگىنە قىنجىلعان بەكبولات تىلەۋحان، ول كومپانيالارعا كەتكەن اقشانى قايتارىپ الۋدىڭ قيىن ەكەندىگىن ايتقان بولاتىن. سەبەبى، ونداي مەكەمەلەردىڭ ەسەپشوتى افشورلاردا ورنالاسقان ەكەن.

بۇل ۇيىمعا الدانعاندار تەك ءبىزدىڭ ەلدە عانا ەمەس، رەسەي، ۋكراينا، بەلارۋس سىندى مەملەكەتتەردە دە بار ەكەن. جالپى زارداپ شەككەندەر سانى جارتى ميللينوعا جۋىقتايدى. قارجىلىق پيراميدانىڭ نەگىزىن قالاعان ۋكراينالىق ازامات وتكەن جىلى ماسكەۋدە تۇتقىندالعان ەدى. ال، ەلىمىزدەگى بالاماسىن قۇرعاندار بۇگىندە سوت الدىندا جاۋاپ بەرۋدە. بىراق، زارداپ شەككەندەر ولاردان ءبىر تيىن دا ءوندىرىپ الا الماي كەلەدى.

جەر سيپاپ قالعانداردىڭ سوزىنشە، الاياقتار سالىمشىلاردى تارتۋ ءۇشىن ءتۇرلى ايلا تاسىلگە بارعان. قۇيعان قارجىڭىزدى 3 ايدىڭ ىشىندە قايتارىپ، ديۆيدەند، ياعني بەلگىلى مولشەردە تابىس تاباسىز دەپ سەندىرىپتى. ءدال وسىنداي الدانىپ قالعانداردىڭ ءبىرى قولىنداعى 10 ملن تەڭگەسىن ساناپ بەرگەن.

ال، زاڭگەرلەر كەز-كەلگەن ادامعا كۇمان ۇيالاتاتىن ۇيىمدى انىقتاۋ ءۇشىن بىرنەشە قاراپايىم دۇنيەلەرگە نازار اۋدارۋعا شاقىرادى. ولار اۋقىمدى جوبالار، شەت-شەگى جوق سىيلىقتار جانە وزىڭنەن سوڭ كومپانياعا بىرنەشە ادام تارتۋ دەگەن ەرەجە. پايدانى كوزدەگەندەردىڭ مەكەمەسى بولسا، وسىنداي پۋنكتتەر مىندەتتى تۇردە كەزدەسەدى ەكەن.

«ادامداردىڭ قارجىلىق جاعىنان ساۋاتسىزدىعى. ينتەرنەت ارقىلى كوپ ادامدار الدانىپ قالىپ جاتادى. "العاشقى ادامدارعا ولار شىندىعىندا دا وزدەرىنىڭ پروتسەنتىن بەرەدى. الدىڭعى ادامدار سەنىپ، ارتقى ادامداردى تارتۋ ءۇشىن»، - دەيدى زاڭگەر باقىتجان ومارحانوۆ.

ەلورداداعى الماتى اۋداندىق سوتىندا 4 ايدان بەرى قارالىپ جاتقان ءىس بويىنشا، كۇدىكتى رەتىندە 4 ادام جاۋاپ بەرۋدە. ولار شەتتەن كەلگەن پيراميدانىڭ ەلىمىزدە "وركەندەپ، قانات جايۋىنا" سەبەپشى بولعان. ال، پاتەرىن ساتىپ، قارىزعا بەلشەسىنەن باتقان جانداردىڭ قارجىسى قايتارىلا ما، جوق پا ول سۇراقتىڭ باسى ازىرگە اشىق تۇر.

سوڭعى جاڭالىقتار