19 قازان, 14:02 474 0 ادەبيەت اسەل انۋاربەك

ەكى بىردەي كىتاپتىڭ تۇساۋى كەسىلدى

بۇگىن ەلوردا تورىندەگى قر ۇلتتىق اكادەميالىق كىتاپحاناسىندا الاشتانۋشى-عالىم، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ساق قايرات ءومىربايۇلى وقىرمان نازارىنا ەكى بىردەي تۋىندىسىن ۇسىندى. “الاش كوسەمسوزى: شارۋاشىلىق ماسەلەسى” جانە “ەلۋ دەگەن ءبىر بەلەس” دەپ اتالاتىن قوس كىتاپتىڭ تانىستىرىلىمىنا بەلگىلى عالىمدار، قايراتكەرلەر، ۇستازدار قاۋىمى، پروفەسسورلار جانە قايرات ءومىربايۇلىنىڭ شاكىرتتەرى قاتىستى.

تۇساۋكەسەر ءراسىمىنىڭ باسىندا اۆتوردىڭ شاكىرتتەرى دايىنداعان بەينەماتەريال كورسەتىلىپ، قايرات ءومىربايۇلىنىڭ شىعارماشىلىق جولى جايىندا ماڭىزدى دەرەكتەر ۇسىنىلدى.

جيىنعا قاتىسۋشىلار قايرات ءومىربايۇلىنىڭ جاڭا تۋىندىلارىن جانە اۆتوردىڭ جالپى شىعارماشىلىعىن اسا جوعارى باعالايتىنىن جەتكىزدى.
“الاش كوسەمسوزى: شارۋاشىلىق ماسەلەسى” جيناعى – قر جوعارى عىلىمي تەحنيكالىق كەڭەسى بەكىتكەن «ەلدىڭ ينتەللەكتىك الەۋەتى» باعدارلاماسى نەگىزىندە جۇزەگە اسىرىلعان «الاش كوسەمسوزى – ەل ينتەللەكتىسىن كوتەرۋدىڭ قاينار كوزى» اتتى عىلىمي جوبانى ورىنداۋ بارىسىندا ازىرلەنگەن “الاش كوسەمسوزى” كوپتومدىعىنىڭ IV تومى.
اتالعان عىلىمي جوبا اياسىندا بۇعان دەيىن كوپتومدىقتىڭ “الاش كوسەمسوزى: جەر ماسەلەسى”، “الاش كوسەمسوزى: ءتىل ماسەلەسى” جانە “الاش كوسەمسوزى: ءدىن ماسەلەسى” دەپ اتالاتىن ءى، ءىى جانە ءىىى تومدارى جارىق كورىپ، عىلىمي اينالىمعا ەنگىزىلگەن بولاتىن.
ەسكە سالا كەتەيىك، عىلىمي جوبانى ورىنداۋ بارىسىندا كوپتومدىقتىڭ جوسپارلانعان بارلىق بەس (5) تومى ازىرلەندى، الداعى ۋاقىتتا “الاش كوسەمسوزى: ءبىلىم-عىلىم جانە مادەنيەت ماسەلەسى” اتتى V تومىنىڭ جارىققا شىعۋى كۇتىلۋدە.
تانىستىرىلىم بارىسىندا عىلىمي جيناق الاشتانۋشى، عالىم-پروفەسسورلاردىڭ تالقىسىنا ۇسىنىلىپ، ەڭبەكتىڭ تەوريالىق جانە تاجىريبەلىك قۇندىلىعى زەردەلەنەدى.
سونىمەن قاتار، كوپشىلىك نازارىنا “ەلۋ دەگەن ءبىر بەلەس” جيناعى ۇسىنىلادى. اتالعان ەڭبەككە ۇلاعاتتى ۇستاز، عالىم، مادەنيەت قايراتكەرى قايرات ءومىربايۇلىنىڭ قازاق رۋحانياتى مەن ۇلت جۋرناليستيكاسىنا سىڭىرگەن سۇبەلى ەڭبەكتەرى مەن شىعارماشىلىق جەتىستىكتەرى تۋرالى زيالى قاۋىم وكىلدەرى، ارىپتەستەرى، دوستارى مەن شاكىرتتەرىنىڭ شىنايى لەبىزدەرى مەن اقجارما تىلەكتەرى توپتاستىرىلعان.

سوڭعى جاڭالىقتار