20 قازان, 12:05 380 0 رۋحانيات انار لەپەسوۆا

"مۋزەيلەر شەرۋى" اقتوبەدە جالعاسىن تابادى

ورالدا «مۋزەيلەر شەرۋى» اكتسياسى ءوتتى. رەسپۋبليكالىق اكتسيا اياسىندا  سارايشىق مەملەكەتتىك تاريحي-مادەني مۋزەي قورىعى جانە اتىراۋ وبلىسى ماحامبەت اۋدانىنىڭ تاريحي-ولكەتانۋ مۋزەيى باتىس قازاقستان وبلىستىق تاريحي-ولكەتانۋ مۋزەيىنە كوشپەلى كورمەمەن كەلىپ، جەرگىلىكتى جۇرتشىلىق نازارىنا ءوز جادىگەرلەرىن ۇسىندى. 

مۋزەي الاڭىندا وتكەن «كونە دۇنيە كۇمبىرى» اتتى كونتسەرتپەن باستالعان اشىق ەسىك كۇنى «مۋزەي تۇنىنە» ۇلاستى.

–«مۋزەيلەر شەرۋى» رەسپۋبليكالىق اكتسياسى ەلىمىزدىڭ مادەنيەت جانە سپورت مينيسترلىگىنىڭ باستاماسىمەن ۇيىمداستىرىلعان. اكتسيا اياسىندا مادەني شارالار ەستافەتاسىن كورشىلەس جاتقان اتىراۋ وبلىسىنان قابىلداپ الدىق.ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ قولداۋىمەن جۇزەگە اسىپ جاتقان «رۋحاني جاڭعىرۋ» باعدارلاماسى جانە «ۇلى دالانىڭ جەتى قىرى» جوباسىنىڭ نەگىزگى ماقساتى – تاريحي مۇرالارىمىزدى تۇگەندەۋ، وتكەنىمىزدى سارالاۋ، بولاشاق ەنشىسىنە اماناتتاۋ.تاريحىمىز تەرەڭ، كەلەشەگىمىزدىڭ كەمەل ەكەنىن تانىتۋدا مۋزەيلەردىڭ ورنى ەرەكشە، – دەيدى شارانى اشقان باتىس قازاقستان وبلىستىق مادەنيەت باسقارماسىنىڭ باسشىسى قادىربولات مۇساعاليەۆ.

باتىس قازاقستان مەن اتىراۋ وبلىستارىنىڭ كوپ تاريحى ورتاق. دەگەنمەن، اتىراۋ وڭىرىنەن كەلگەن كورمەلەردى جەرگىلىكتى حالىق جىلى قابىلدادى. سارايشىق مۋزەي قورىعىنىڭ «ورتاعاسىرلىق سارايشىق – قازاق ەلىنىڭ استاناسى»، اتىراۋ وبلىسى ماحامبەت اۋدانىنىڭ «ۇلى دالا تاريحى – ۇرپاققا امانات» كورمەلەرىنىڭ جادىگەرلەرى ەرەكشە قىزىقتى بولدى. ەكسپوزيتسيالىق زالداردا ەتنو-فولكلورلىق انسامبل ورىنداعان ۇلتتىق ساز ويناپ، كورەرمەن قاۋىم التىن حانشايىم، يساتاي مەن ماحامبەت، ترويا ارۋلارى كەيپىنە ەنگەن ارتىستەرمەن بىرگە سۋرەتكە ءتۇستى.

وسى كۇنى باتىس قازاق وبلىستىق تاريحي-ولكەتانۋ مۋزەيىنىڭ ديرەكتورى ميربولات ەرساەۆ «مۋزەي ءتۇنى» ەستافەتاسىن اقتوبە وبلىستىق تاريحي-ولكەتانۋ مۋزەيىنىڭ ديرەكتورى مەيرام دۇيسەنعاليعا تابىستادى.

«كونە دۇنيە كۇمبىرى» اتتى ءىس-شارا اياسىندا مۋزەيدە كيىز باسۋ ونەرىنەن شەبەرلىك سىنىپ كورسەتىلىپ، جارمەڭكە ۇيىمداستىرىلدى. سونداي-اق جاھانشا دوسمۇحامەدۇلى اتىنداعى پەداگوگيكالىق كوللەدج ۇجىمى «مۋزەيستار-2019» جوباسىن ۇسىندى.

سوڭعى جاڭالىقتار