18 قازان, 18:52 413 0 ساياسات انار لەپەسوۆا

ەلباسى توراعالىعىمەن ءماجىلىس فراكتسياسىنىڭ جالپى وتىرىسى ءوتتى

قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆتىڭ توراعالىعىمەن ۇكىمەت مۇشەلەرىنىڭ، Nur Otan پارتياسىنىڭ جانە پارلامەنت ءماجىلىسى فراكتسيالارىنىڭ قاتىسۋمەن  وتكەن جيىندا پارتيانىڭ سايلاۋالدى باعدارلاماسى «قازاقستان - 2021: بىرلىك. تۇراقتىلىق. جاسامپازدىق»جانە ۇلت جوسپارى«100 ناقتى قادام» باعدارلاماسى قارالدى. بۇل تۋرالى ەلباسىنىڭ رەسمي سايتى جاريالادى. 

وتىرىس بارىسىندا پرەمەر-مينيستر ا.ءماميننىڭ، پارلامەنت ءماجىلىسىنىڭ توراعاسى ن.نىعماتۋليننىڭ، پرەمەر-ءمينيستردىڭ ءبىرىنشى ورىنباسارى جانە قارجى ءمينيسترى ا.سمايىلوۆتىڭ، پرەمەر-ءمينيستردىڭ ورىنباسارلارى ب.ساپارباەۆتىڭ جانە ر.سكلياردىڭ باياندامالارى تىڭدالدى. نۇرسۇلتان نازارباەۆ پارتيانىڭ ەلدىڭ دامۋى مەن حالىقتىڭ ءال-اۋقاتىن ارتتىرۋداعى ەرەكشە رولىنە توقتالدى.

– بۇگىنگى تاڭدا ءبىزدىڭ پارتيانىڭ الدىنا ەلدەگى سايلانعان پرەزيدەنت توقاەۆ قاسىم-جومارت كەمەلۇلى توڭىرەگىنە قوعامدى بىرىكتىرۋ، ەليتانى تۇتاستىرۋ مىندەتى تۇر. پارتيا ەلدىڭ جەتەكشى ساياسي كۇشى رەتىندە مەملەكەتىمىزدىڭ دامۋىنىڭ ستراتەگيالىق باعىتىنىڭ ساباقتاستىعىن قامتاماسىز ەتۋگە مىندەتتى. سوندىقتان ۇكىمەت پەن فراكتسيا ادامداردىڭ ناقتى ماسەلەلەرىن بىرگە شەشۋى كەرەك،– دەدى پارتيا توراعاسى.

سايلاۋالدى باعدارلامانىڭ جانە ۇلت جوسپارىنىڭ ورىندالۋ ناتيجەلەرىن ايتا كەلە، ەلباسى پارتيانىڭ قالعان مىندەتتەمەلەرىن ورىنداۋمەن بايلانىستى قاۋىپتەرگە توقتالدى.

– ءبىز وڭ ناتيجەلەرگە قول جەتكىزدىك. ءۇش جارىم جىلدىڭ ىشىندە 430 مىڭنان استام جۇمىس ورنى قۇرىلدى، 2,7 مىڭ شاقىرىم جول سالىندى. ەۋرازيالىق قۇرلىقارالىق ءدالىز ىسكە قوسىلدى. شاعىن جانە ورتا بيزنەستىڭ ەلدىڭ ءجىو-دەگى ۇلەسى 28 پايىزعا جەتتى. ءبىر جىلدىڭ ىشىندە ءبىز «Doing Business» رەيتينگىسىن 8 پوزيتسياعا كوتەرىپ، 28 ورىنعا كوتەردىك،– دەدى قازاقستاننىڭ تۇڭعىش پرەزيدەنتى.

نۇرسۇلتان نازارباەۆ جەڭىسكە جەتكەن پارتيانىڭ سايلاۋالدى باعدارلاماسى ۇكىمەتتىڭ بەس جىلدىق قىزمەتىنىڭ نەگىزىن قۇراۋى كەرەك، ال ماجىلىستەگى پارتيالىق فراكتسيا مۇشەلەرى ىقتيمال قاتەرلەرگە ۋاقىتىلى جاۋاپ بەرە وتىرىپ، باعدارلامانىڭ ورىندالۋىن ۇنەمى قاداعالاپ وتىرۋى كەرەك.

– ءبىزدىڭ مىندەتىمىز – ۇزاق مەرزىمدى كوشباسشىلىقتى ساقتاۋ. پارتيانىڭ جاڭا سايلاۋالدى باعدارلاماسىن ءماجىلىس سايلاۋىنا دايىنداۋ جۇمىستارى بۇگىننەن باستالۋى كەرەك. بۇل ستراتەگيالىق باعىتقا نەگىزدەلۋى، ءارتۇرلى الەۋمەتتىك توپتاردىڭ مۇددەلەرىن ناقتى ءبىلدىرۋى جانە ادامداردىڭ ناقتى سۇرانىستارىنا جاۋاپ بەرۋى كەرەك،– دەدى پارتيا توراعاسى.

سونىمەن بىرگە، ەلباسى ەل ايماقتارىن دامىتۋ باعدارلامالارىن جۇزەگە اسىرۋعا باسا نازار اۋداردى.

– قازىر بۇل ستراتەگيالىق باعدارلامالار رەسمي تۇردە جۇزەگە اسىرىلۋدا. ولاردىڭ ورىندالۋىن ءتيىستى باقىلاۋ جوق. كەيبىر تارماقتار مۇلدەم ورىندالمايدى. جوسپارلانعان كورسەتكىشتەرگە ۇنەمى تۇزەتۋلەر ەنگىزىلىپ تۇرادى. سوندىقتان ۇلتتىق ەكونوميكا مينيسترلىگى Nur Otan پارتياسىمەن جانە ونىڭ فراكتسيالارىمەن بىرلەسىپ، اتالعان باعدارلامالاردىڭ ورىندالۋى تۋرالى تىڭداۋ ۇيىمداستىرۋى كەرەك. بىزگە 2025 جىلعا دەيىن اۋماقتاردى دامىتۋدىڭ جاڭا باعدارلامالارىن ازىرلەۋدى باستاۋ كەرەك،– دەدى نۇرسۇلتان نازارباەۆ.

وسىعان بايلانىستى، قازاقستاننىڭ تۇڭعىش پرەزيدەنتى 2020 جىلدىڭ 1 ناۋرىزىنا دەيىن ءار اۋدان، قالا جانە ايماق ءۇشىن اۋماقتىق دامۋ باعدارلامالارىن ازىرلەۋدى اياقتاۋدى تاپسىردى. سونداي-اق، ەلباسى Nur Otan پارتياسىنىڭ پارلامەنت ءماجىلىسى مەن ماسليحاتتارداعى فراكتسياسىنىڭ قازىرگى جۇمىسىنا توقتالىپ، پارتيانىڭ رەيتينگى بارلىق دەڭگەيدەگى دەپۋتاتتاردىڭ جۇمىسىنا نەگىزدەلگەنىن اتاپ ءوتتى. نۇرسۇلتان نازارباەۆ دەپۋتاتتاردىڭ ايماقتارعا جۇمىس ساپارلارىنىڭ فورماتىن قايتا قاراۋدى جانە پارتيانىڭ قوعامدىق قابىلداۋ بولمەلەرىندە العاشقى كوشباسشىلاردىڭ ازاماتتارمەن كەزدەسۋلەرىن وتكىزۋ جۇمىستارىن جانداندىرۋدى تاپسىردى.

– تالداۋ ءبىزدىڭ پارتيانىڭ دەپۋتاتتارى بۇقارالىق اقپارات قۇرالدارىن بەلسەندى پايدالانبايتىندىعىن كورسەتتى. سونىمەن قاتار، Nur Otan فراكتسياسى قوعامدى تولعاندىراتىن كوپتەگەن ماسەلەلەر بويىنشا ءاردايىم باستاما كوتەرە بەرمەيدى. سوڭعى بىرنەشە اي ىشىندە Nur Otan فراكتسياسىنىڭ مۇشەلەرى كەز-كەلگەن رەزونانستىق ءىس بويىنشا ءوز ۇستانىمدارىن بىلدىرمەدى، – دەدى قازاقستاننىڭ تۇڭعىش پرەزيدەنتى.

سونىمەن قاتار، ەلباسى فراكتسيا پروتسەسىندە بيۋروكراتيا مەن كۇردەلى ۇيلەستىرۋ پروتسەدۋرالارىن الىپ تاستاۋ قاجەتتىگىن ايتتى. نۇرسۇلتان نازارباەۆ پارتيا ورگاندارىنىڭ – پارتيالىق باقىلاۋ كوميتەتى مەن سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ جۇمىسىن جانداندىرۋدى تاپسىردى.

– بۇل ورگاندارعا كىرەتىن دەپۋتاتتار ءوز جۇمىستارىنا بەلسەندى قاتىسۋلارى كەرەك. ءسىز شۇعىل سۇراقتاردى سىندارلى تۇردە قويىپ، قوعامنىڭ قاتىسۋىمەن ناقتى شەشىمدەر ۇسىنۋىڭىز كەرەك،– دەدى پارتيا توراعاسى. سونداي-اق، قازاقستاننىڭ تۇڭعىش پرەزيدەنتى فراكتسيا دەپۋتاتتارى وزدەرىنە كونستيتۋتسيامەن بەكىتىلگەن زاڭنامالىق باستامانى ءىس جۇزىندە قولدانا المايتىندىعىن اتاپ ءوتتى.

– دەپۋتاتتار – پارتيانىڭ تىرەگى، بەلسەندى ەلەكتوراتتىڭ نەگىزى. سىزگە پارتيا ارقىلى ءتيىستى وكىلەتتىك بەرىلگەن ادامدار. ءسىز ازاماتتارىمىزدىڭ ماسەلەلەرىن شەشۋ ءۇشىن جۇمىس جاساۋىڭىز كەرەك،– دەدى ەلباسى. ءسوزىنىڭ سوڭىندا نۇرسۇلتان نازارباەۆ پارتيانىڭ ساياسي كوشباسشىلىعىن ساقتاۋدىڭ ماڭىزدىلىعىن اتاپ ءوتتى.

– ءبىزدىڭ باستى مىندەتىمىز – تۇراقتىلىق، قازاقستاننىڭ وركەندەۋى جانە قاراپايىم ازاماتتاردىڭ ءال-اۋقاتىن جاقسارتۋ. سوندىقتان ۋادەلەرىمىزدى ورىنداۋ ءۇشىن بار كۇشىمىزدى سالۋ كەرەك،– دەپ تۇيىندەدى پارتيا توراعاسى.

سوڭعى جاڭالىقتار