17 قازان, 10:43 349 0 نۇر وتان انار لەپەسوۆا

«Nur Otan»-دا جەمقورلىققا قارسى جەدەل جەلى جۇمىس ىستەيدى

سىبايلاس جەمقورلىقتىڭ قانداي دا ءبىر كورىنىسىنە تاپ بولعان ەلىمىزدىڭ كەز كەلگەن تۇرعىنى «Nur Otan» پارتياسىنا حابارلاسا الادى. ول ءۇشىن پارتيالىق باقىلاۋ كوميتەتىندە ارنايى 8 800 080 44 41 جەدەل جەلىسى ىسكە قوسىلدى.

ەلباسى، «Nur Otan» پارتياسىنىڭ ليدەرى نۇرسۇلتان نازارباەۆتىڭ تاپسىرماسىنا سايكەس، 2014 جىلى كەڭ كولەمدى قوعامدىق تالقىلاۋدان كەيىن 2025 جىلعا دەيىنگى سىبايلاس جەمقورلىققا قارسى ءىس-قيمىل پارتيالىق باعدارلاماسى قابىلدانىپ، كەيىننەن ول قازاقستان رەسپۋبليكاسىنىڭ سىبايلاس جەمقورلىققا قارسى ستراتەگياسىنىڭ نەگىزىنە اينالدى. «Nur Otan»-نىڭ باستاماسىمەن «اقپاراتقا قول جەتكىزۋ تۋرالى»، «سىبايلاس جەمقورلىققا قارسى ءىس-قيمىل تۋرالى»، «قوعامدىق كەڭەستەر تۋرالى» جانە ت.ب. زاڭدار قابىلداندى. جاقىندا عانا سىبايلاس جەمقورلىقتى قابىلداۋ ۇلتتىق يندەكسى جاريالاندى.

«Nur Otan» پارتياسى ساياسي كەڭەسىنىڭ كەڭەيتىلگەن وتىرىسىندا قازاقستاننىڭ تۇڭعىش پرەزيدەنتى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ جۇمىسىن كۇشەيتۋدى، سونىمەن بىرگە تۇرعىندارمەن ءوزارا ءىس-قيمىل ارەكەت ۇلگىسىن جەتىلدىرىپ، تىعىز بايلانىس ورناتۋدى تاپسىردى.

جەدەل جەلى ارقىلى تۇسكەن قوڭىراۋلاردىڭ بارلىعى ارى قاراي مەملەكەتتىك ورگانداردىڭ جۇمىسىنداعى سىبايلاس جەمقورلىق قاۋىپتەرىنە تالداۋ جۇرگىزۋ جانە ولاردى بارلىق دەڭگەيلەردە ازايتۋ بويىنشا شارالار قابىلداۋعا كومەكتەسۋ ءۇشىن تىركەلەدى.

«بىردە-ءبىر ءوتىنىش نازاردان تىس قالمايدى. ءاربىر شاعىم بويىنشا تەز ارادا جۇمىس ىستەلەدى. سونىمەن قاتار، پارتيالىق باقىلاۋ قىزمەتى مەملەكەتتىك ورگاندارعا ناقتى ۇسىنىستار بەرە الادى» – دەدى «Nur Otan» پارتياسى پارتيالىق باقىلاۋ قىزمەتىنىڭ باسشىسى داۋرەن بيجۇمانوۆ.

سall-ورتالىقتىڭ جۇمىس ۋاقىتى: دۇيسەنبى مەن جۇما كۇندەرى ساعات 8:00-دەن 19:00-گە دەيىن. جۇمىس ۋاقىتىنان تىس جانە دەمالىس كۇندەرى قوڭىراۋلار جازىلىپ الىنادى.

سوڭعى جاڭالىقتار