16 قازان, 14:47 426 0 رۋحانيات انار لەپەسوۆا

الماتىدا جاس تاريحشىلار سايىسى ءوتتى

الماتىدا «مەنىڭ كىشى وتانىم» تاقىرىبىندا جاس تاريحشىلاردىڭ قالالىق زياتكەرلىك سايىسى ءوتتى، دەپ حابارلايدى قازاقپارات.

سايىسقا اۋداندىق كەزەڭدە جەڭىپ شىققان 9-سىنىپتىڭ 4 وقۋشىسىنان تۇراتىن 8 كوماندا قاتىستى. جارىستىڭ I كۇنىندە بارلىق قاتىسۋشىلار قازاقستان تاريحى ءپانىنىڭ وقۋ باعدارلاماسى بويىنشا «دارىن» رەسپۋبليكالىق عىلىمي-تاجىريبەلىك ورتالىعى دايىنداعان تەست تاپسىرمالارىن ورىندادى. ءىI كۇنىندە كوماندانىڭ ءاربىر مۇشەسى جەكە نوميناتسيا بويىنشا ءوز جوبالارىن قورعادى.

وقۋشىلاردىڭ جۇمىسىن اباي اتىنداعى قازاق ۇلتتىق پەداگوگيكالىق ۋنيۆەرسيتەتى تاريح جانە قۇقىق ينستيتۋتىنىڭ ديرەكتورى، پروفەسسور ب.س.جۇماعۇلوۆ باستاعان پروفەسسور-وقىتۋشىلارىنان تۇراتىن تاۋەلسىز قازىلار القاسى باعالادى. بارلىق سايىسكەرلەر جەتەكشىلەرىمەن بىرگە ءبىر زالدا وتىرىپ، ءبىرى-ءبىرىنىڭ دايىنداعان جوبالارىمەن تانىسىپ، قورعاۋ بارىسىن تىڭداپ، سۇراقتار قويىپ، ءوزىنىڭ دايىندىعىن سالىستىرا باعالاۋعا مۇمكىندىك الدى.

بەس ساعاتقا سوزىلعان جوبا قورعاۋ سايىسىنىڭ جانە تەست تاپسىرمالارىن ورىنداۋدىڭ قورىتىندىسىندا «مەنىڭ كىشى وتانىمنىڭ تاريحى» نوميناتسياسى بويىنشا №175 گيمنازيانىڭ وقۋشىسى جانەركە ماداليەۆا، «كىشى وتانىمنىڭ سيمۆولى» نوميناتسياسى بويىنشا №175 گيمنازيانىڭ وقۋشىسى امينا ەسىمجانوۆا، «مەنىڭ كىشى وتانىمنىڭ بولاشاعى» نوميناتسياسى بويىنشا №12 ماماندىرىلعان گيمنازيا وقۋشىسى قوبىلاندى نۇرعاليەۆ جانە «مەنىڭ تۋعان ولكەم» نوميناتسياسى بويىنشا №62 گيمنازيانىڭ وقۋشىسى ايگەرىم ادىلەت جەڭىمپاز اتانىپ قاراشا ايىندا وتەتىن رەسپۋبليكالىق سايىسقا جولداما الدى.

«رۋحاني جاڭعىرۋ» باعدارلاماسى اياسىندا وتكەن «مەنىڭ كىشى وتانىم» اتتى جاس تاريحشىلاردىڭ قالالىق زياتكەرلىك سايىسىنىڭ ماقساتى- جاس ۇرپاقتىڭ بويىندا ءوزىنىڭ كىشى وتانى – تۋعان اۋىلىنا، وسكەن وڭىرىنە، قازاقستان رەسپۋبليكاسىنا دەگەن ماقتانىش سەزىمىن، تاريحي تانىمدىق قىزىعۋشىلىعىن، قازاقستاندىق پاتريوتيزم مەن ۇلتتىق دارالىق قاسيەتىن قالىپتاستىرۋ.

=

سوڭعى جاڭالىقتار