15 قازان, 20:53 293 0 الەۋمەت انار لەپەسوۆا

ەلىمىزدە پاتەر يەلەرى كووپەراتيۆتەرىنىڭ جۇمىسى توقتاتىلادى

3 جىلدان كەيىن ەلىمىزدە پاتەر يەلەرى كووپەراتيۆتەرى ءوز جۇمىسىن توقتاتپاق. بۇگىن پارلامەنت سەناتىنىڭ ەكىنشى وقىلىمىنا جولدانعان «قر تۇرعىن ءۇي ماسەلەلەسى بويىنشا زاڭعا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا وسىنداي وزگەرىس قارالعان. 

پارلامەنت سەناتىنىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتى بۇگىن «قر تۇرعىن ءۇي ماسەلەلەسى بويىنشا زاڭعا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارادى. «بۇل زاڭ جوباسى ءۇش مارتە كوپتىڭ الدىندا تالقىلانعان بولاتىن. زاڭ جوباسىنىڭ العاشقى نۇسقاسى مەن قازىرگى نۇسقاسىنىڭ ايىرماشىلىعى ۇلكەن. زاڭ جوباسىنا وسى ۋاقىتقا دەيىن 400-گە تارتا وزگەرىس پەن تولىقتىرۋ ەنگىزىلدى. ءماجىلىس جانە سەنات دەپۋتاتتارى ءوز تاراپىنان ءتيىستى ۇسىنىستاردى ەنگىزدى. جۇمىس توبىنىڭ بىرنەشە وتىرىسى ءوتىپ، ۇزاق تالقىدان كەيىن زاڭ جوباسى سەناتتىڭ ەكىنشى وقىلىمىنا جولداندى»، – دەدى قر يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ بۇگىنگى سەناتتاعى وتىرىستان كەيىن تىلشىلەرگە بەرگەن جاۋابىندا.

ۆيتسە-ءمينيستردىڭ ايتۋىنشا، پيك-تەر 2022 جىلدىڭ 1 شىلدەسىندە جۇمىسىن توقتاتادى.

«سەبەبى، ءبىز نورما بويىنشا باسقارۋ فورماسى وزگەرگەنگە دەيىن 3 جىل ۋاقىت سۇراپ وتىرمىز. الداعى ءبىر جىلدا كەز كەلگەن تۇرعىن ءۇيدىڭ تۇرعىندارى قانداي باسقارۋ فورماسىن تاڭدايتىنىن ايقىنداپ الۋى كەرەك. ولار قاراپايىم سەرىكتەستىكتى تاڭداي ما، الدە، ءۇيدىڭ بۇكىل شارۋاسىن زاڭدى تۇلعا جۇرگىزگەنىن قالاي ما – انىقتاپ الۋى ءتيىس. ياعني، تۇرعىندار باسقارۋ ورگانىن تاڭداۋعا قۇقىلى. ولار زاڭدى تۇلعاعا جۇگىنبەي-اق باسقارۋشى كومپانيامەن كەلىسىپ الا الادى. زاڭ جوباسى بويىنشا قاسبەتتىڭ، شاتىردىڭ قالىپتى جاعدايدا بولۋىنا قاتىستى جەرگىلىكتى اتقارۋشى ورگاندارعا ۇلكەن قۇزىرەت بەرىلەدى»، – دەدى ول.

سوڭعى جاڭالىقتار