15 قازان, 16:11 347 0 كولىك انار لەپەسوۆا

ەلوردالىقتار قوعامدىق كولىكتە جولاقىنى بەت-الپەتىمەن تولەي الادى

بۇدان بىلاي ەلوردالىقتار  قوعامدىق كولىكتە جولاقىنى بەت-الپەتىمەن تولەي الادى. جاڭا تولەم جۇيەسى اۆتوبۋستاردا ورناتىلاتىن ادامنىڭ بەت-الپەتىن تانيتىن كامەرا ارقىلى جۇزەگە اسىرىلماق. بۇل تۋرالى Face Pay جوباسىنىڭ ازىرلەۋشىلەرى حابارلادى. 

جۇيەگە تىركەلۋ ءۇشىن ادام Telegram ارقىلى ارنايى بوتقا ءوزىنىڭ جسن-ءىن، بانك كارتاسىنىڭ مالىمەتتەرىن جانە سەلفيگە ءتۇسىپ جىبەرۋ كەرەك.

وسىدان كەيىن جولاۋشى اۆتوبۋسقا كىرگەندە كامەراعا قاراپ-اق تولەم جاساي الادى. كامەرا ادامنىڭ بەت-الپەتىن تانىپ، جۇيە اۆتوماتتى تۇردە ونىڭ كارتاسىنان جولاقىنى شەشىپ الادى.

"بۇگىن ءبىز Face Pay يننوۆاتسيالىق جوباسىن تانىستىردىق. بۇل – بيومەتريا ارقىلى جولاقى تولەۋ جۇيەسى. ءبىز Telegram-دا ارنايى بوت جاسادىق. ءسىز ول ارقىلى ءوز جسن ءنومىرىڭىزدى، سەلفي سۋرەتىڭىزدى، كارتوچكاڭىزدى تىركەپ، جۇيەگە قوسىلا الاسىز.

ءوز مالىمەتتەرىڭىزدى قولدانۋعا رۇقسات بەرگەننەن كەيىن، قوعامدىق كولىكتە اقشاسىز، كارتاسىز جانە تەلەفونسىز جولاقىسىن تولەي بەرەسىز. اۆتوبۋسقا كىرگەن كەزىڭىزدە جۇرگىزۋشىنىڭ مونيتورىندا ءسىزدىڭ سۋرەتىنىڭ پايدا بولادى", – دەپ ءتۇسىندىردى "Ipay" كومپانياسىنىڭ قۇرىلتايشىسى الماس ايمەنوۆ.

جوبانىڭ ازىرلەۋشىلەرى بۇل جۇيەنى ازاماتتاردى باقىلاۋ ءتاسىلى رەتىندە ەمەس، قولايلى جانە قاۋىپسىز قىزمەت رەتىندە قاراستىرۋدى ۇسىندى.

تاعى ءبىر ايتا كەتەرلىگى، ەگەر استانا LRT پوليتسيامەن ىنتىماقتاستىق ورناتسا، جۇيە ىزدەۋ سالىنعان قىلمىسكەرلەردىڭ سۋرەتىن قۇقىق قورعاۋ ورگاندارىنا جىبەرىپ تۇرا الادى. وسىلايشا، جاڭا جۇيە قىلمىسكەرلەردى ۇستاۋعا دا سەپتىگىن تيگىزبەك.

استانادا جوبانى تەستىلەۋدەن وتكىزۋ وسى اپتادا باستالادى. جاڭا تولەم جۇيەسى نۇر-سۇلتانداعى ەكى اۆتوبۋسقا ورناتىلماق.

سوڭعى جاڭالىقتار