15 قازان, 11:44 544 0 تۋريزم "تۇركىستان" گازەتىنىڭ اۆتورلارى

شارىنداعى «ەكو پارك» كەشەنى

قىزعىلت قامالداعى جالعىز جول ءبىزدى «ەكو پارك» كەشەنىنە الىپ كەلدى. پاركتە تۋريستەر ءۇشىن بارلىق جاعدايلار جاسالعان. الماتى وبلىسىنداعى ەڭ ۇلكەن شارىن وزەنى بويىندا جاعالاي ورنالاسان دەمالىس ورنىندا قونۋعا بولاتىن قازاق ۇيلەر ماڭعازدانا، ادەمى جەرگە كورىك بولىپ ورنالاسقان. ءىشى قازاقى ناقىشتا كوركەمدەلىپ، بەزەندىرىلگەن. پاركتە بىرنەشە كافەلەر دە بار. ءبىر كۇنگە كەلۋشى ساياحاتشىلار ءۇشىن تاپشاندار وزەن بويى ورنالاسقان. قازاق ۇيلەر اراسىندا ورنالاسقان تابيعي گازونداردا جاتساڭ، كوك جايلاۋدا جاتقانداي بولاسىڭ. تاماعى قولجەتىمدى. وكىنىشتىسى، ينتەرنەت جوق. عالامتور مەن ۇيالى بايلانىستى قوسۋ ءۇشىن كۇشى مىقتى 380 ءۆولتتى ەلەكتر جەلىسىن تارتۋ قاجەت، دەيدى پارك وكىلدەرى. پارك ەلەكتر قۋاتىن كۇن باتارەيالارىنان الۋدا.

پارك ينسپەكتورى اكراموۆ ماكسيمنىڭ ايتۋىنشا، كوكتەم جانە كۇز مەزگىلىندە تۋريستەردىڭ لەگى كوبەيەدى ەكەن. بىلتىرعى جىلى 15 000 ساياحاتشى كەلسە، بيىلعى جىلدىڭ 9 ايىندا 18 807 مىڭ ادام كەلگەن. - جىلدان جىلعا شارىن شاتقالىن كورۋگە كەلۋشىلەر سانى ارتۋدا. ءبىز كەلگەن بارلىق ساياحاتشىلاردى تىركەپ وتىرامىز. كوبىنە، كورەيا، فرانتسيا، قىتاي، امەريكا، پولشا، ەۋروپادان تۋريستەر كوپ كەلەدى، دەيدى ول. ءبىز دە جول-جونەكەي ەستونيا، امەريكا، ينديا، پولشا، قىتاي، كورەيادان كەلگەن تۋريستەرمەن تانىسىپ، كەيبىرىن اڭگىمەگە تارتتىق. ءبىرى ءۇشىنشى رەت كەلسە، ەكىنشى ءبىرى  قازاقستانعا العاش رەت كەلىپتى. قىتايلىقتار قازاق ەلىن ديماش ارقىلى تانىپ كەلسە، كورەيالىقتار جۇمىس ساپارىمەن، ال، پولشادان كەلگەندەر ارنايى ساياحاتتاپ كەلىپتى. بارلىعى شارىن شاتقىلانان كەرەمەت اسەر العاندىعىن جەتكىزدى جانە ءتۋريزمدى دامىتۋ ءۇشىن تاپتىرماس بىرەگەي جەر ەكەندىگىن ايتتى.

«مەن قازاقستانعا ءبىرىنشى رەت كەلدىم. كوپتەن بەرى كەلۋدى ارمانداعان ەدىم. بۇگىنگى ساياحاتتان العان اسەرىم كەرەمەت. مىنانداي ادەمى، كوز تارتار جەردى بۇرىن سوڭدى كورمەپپىن. بۇل جارتاستار، تابيعات، مىنا تازا اۋا، ءبارى-ءبارى كەرەمەت. ماعان قازاق ەلىنىڭ تاعامى، تابيعاتى، ادامدارى دا ۇنادى!»، - دەدى ءۇندى ەلىنەن كەلگەن امەريكاندىق بيل دەۆيد.

بيىلعى جىلدىڭ باستى جاڭالىعى  - «ەكو پارك» كەشەنى قىستىڭ كۇنى دە جۇمىس ىستەيتىن بولادى. بۇعان دەيىن قىستىڭ كۇنى شاتقالعا تۇسۋگە رۇقسات بەرىلمەگەن ەدى. ەندى، «شارىن» ۇلتتىق تابيعي پاركىنە جىل بويى كەلسەڭىزدەر بولادى.

كەلەمىن دەۋشىلەر ءۇشىن اقپارات:

كىرۋ قۇنى 1 ادامعا - 752 تگ.

ەكسكۋرسيالىق گيدتىڭ قىزمەتى ءبىر توپقا — 2500 تگ. وعان 20 ادام كىرەدى.

تاماققا 1 ادامعا شامامەن — 2-3 مىڭ تگ. كەتەدى (پالاۋ، سالات، نان، ءشايىن قوسقاندا).

قازاق ۇيلەردى جالعا بەرۋ 1 كۇنگە — 45 مىڭ تگ. (8 ادامعا/ تاماعى كىرمەيدى).

ءوز تاعامدارىمەن كەلگەندەر ءۇشىن ارنايى ۇستەلدەر، تەگىن تاپشاندار بار.

ءىشىن كولىكپەن ارالاپ، تاماشالايمىن دەسەڭىز، 1 باعىتقا 1000 تەڭگەدەن پارك كولىكتەرى جۇرەدى. ايتا كەتەيىك، شاتقالدىڭ ىشىنە جەكە كولىكتەرىڭىز كىرگىزىلمەيدى. قاۋىپسىزدىك ماقساتىندا رۇقسات ەتىلمەيدى.

ساياحاتشىلاردىڭ قاۋىپسىزدىگىن ارنايى پاترۋلدىك توپ قامتاماسىز ەتەدى.

سوڭعى جاڭالىقتار