15 قازان, 11:30 541 0 بىلگەنگە مارجان "تۇركىستان" گازەتىنىڭ اۆتورلارى

شارىن تۋريستەردى جىل بويى قابىلدايدى

قازاق جۋرناليستەرى وتاندىق ءتۋريزمدى ناسيحاتتاۋدى جالعاستىرۋدا. قازاقستاننىڭ ەڭ كورىكتى جەرلەرى كولساي، قايىڭدى، تۇرگەننەن باستاعان ءبىر توپ قازاق جۋرناليستەرى بۇل جولى ساياحاتتى  «شارىن» ۇلتتىق تابيعي پاركىندەگى شارىن شاتقالى مەن ەرەن توعايىنا جالعاستىردى.

دۇنيەجۇزىندە وتە سيرەك كەزدەسەتىن تابيعي كورىنىستى كورگىڭىز كەلسە شارىن شاتقالىنا مىندەتتى تۇردە كەلىڭىز! بۇل ميلليون جىلدار بۇرىن پايدا بولعان شاتقال. مۇنداي تابيعات باسقا ەشبىر ايماقتا، جەر بەتىندە جوق. ءيا، ءدال وسىنداي كورىنىستى الەم بويىنشا تەك سولتۇستىك امەريكانىڭ اريزونا شتاتىنداعى شاتقالدار القابىنان كورە الاسىز. الايدا، عالىمدار ەن گەولوگتار شارىننىڭ قىزعىلت توپىراعى، وزگەشە ويىلىمدىق ورنەكتەرى، جارتاس بەدەرلەرى، تابيعي جاقپار قۇزدارى كولورادو كانونىنان وزگەرەك ەكەندىگىن ايتادى.

وسىنداي، عاجاپ كورىنىستى كورگەندە، قۇدايىم، قازاق جەرىنە تابيعاتتىڭ كوز ارباعان تاڭعاجايىپ تارتۋىن جاساي سالعانىن قاراڭىزشى دەپ، كەۋدەڭدە ماقتانىش سەزىمى كەرنەيدى.

الماتىدان 2-3 ساعاتتىق، 200 شاقىرىمدىق جەردە ورنالاسقان  شارىن شاتقالىنا ءاپ-ساتتە جەتتىك. قانشا رەت بۇل جەرگە جول تۇسسە دە، ءىشىن ارالاۋعا ۋاقىت بولماپ ەدى. بۇل جولى كونوننىڭ ىشىنە ءتۇسىپ، اسىقپاستان ءار تاسى مەن جوتاسىن زەردەلەپ قاراپ، عاجايىپ كورىنىستەردىڭ كۋاسى بولدىق. كولىك قوياتىن تۇراقتان تومەن قاراي 3 شاقىرىم جاياۋ ءجۇرىپ، اڭىزعا تولى كانوندى ارالادىق. جىل سايىن وسى جالعىز اياق قامالدار اڭعارى جولىمەن 10 مىڭنان اسا ساياحاتشى جۇرەدى. جول جونەكەي كەلۋشىلەر ءۇشىن دەمالاتىن ورىندىقتار جاساپ قويىلعان. قوقىس تاستايتىن جاشىكتەر دە قاراستىرىلعان.

ميلليونداعان جىل بۇرىنعى جەر بەتىندەگى تىرشىلىك نىشاندارىنان سىر شەرتەتىن تىلسىمعا تولى شاتقالدا كونە زامانداردان ساقتالعان الۋان ءپىشىندى، ءتۇرلى جارتاستاردى كورە الاسىز. ءبىز بەدەرلى كورىنىستەردىڭ ءبىرىن ارۋ قىزعا، ءبىرىن مىستان كەمپىرگە، ەندى ءبىرىن ايبارلى ارىستان مەن باتىرعا، كەيبىرىن قىران قۇسقا تەڭەپ، ەرتەگىلەر الەمىنە كىرگەندەي بولدىق. شىن مانىسىندە، بۇندا «مىستان كەمپىر»، «ايداھار»،  «تاس قالاشىق»، «شايتان قالا» ت.ب. اتاۋلارمەن اتالاتىن ءتۇرلى ءپىشىندى جارتاستار بار ەكەن.  بۇل اتاۋلارمەن ەل اراسىندا اڭىز، ەرتەگى تەكتى اڭگىمەلەر دە تاراعان. بۇل ايماقپەن تانىستىرعان گيدتىڭ ايتۋىنشا، بۇل جەردە ءتۇرلى قۇبىلىستار ورىن الىپ، تۇندە ءار ءتۇرلى داۋىستار شىعادى ەكەن. ماسەلەن، ىلديلاپ كەلە جاتقان بۇرىلىستاعى مىستان سايىندا (ۋششەلە ۆەدم)  تۇندە ايەلدەردىڭ جىلاعان داۋىس ەستىلەدى ەكەن. ءبىز دە بۇل ساپاردا كەرەمەت قۇبىلىستىڭ كۋاسى بولدىق. قايتار جولدا ءبىر تامشى جاڭبىر جاۋماسا دا، سول جاعىمىزدان اسپاندا ۇلكەن كەمپىرقوساق شىقتى (سۋرەتتەر تومەندە). ءبارىمىز تاڭقالىسىپ، تابيعاتتىڭ تىلسىم كورىنىسىن جاقسىلىققا جورىدىق.

         ايتا كەتەيىك، پارك اۋماعىن ارنايى ماماندار قاراپ وتىرادى. ءبىر جاعداي بولا قالعاندا راتسيامەن ءبىر-بىرىمەن بايلانىسا الادى. پارك وكىلدەرىنىڭ ايتۋىنشا، بارلىق ينسپەكتورلار العاشقى مەديتسينالىق كومەكتى كورسەتە الاتىن ماماندار.   

نازيرا جۇماقۇلوۆا، جۋرناليست 

سوڭعى جاڭالىقتار