15 قازان, 10:48 350 0 مادەنيەت انار لەپەسوۆا

"مۇزبالاق" گەرمانيادا «ۇزدىك انيماتسيالىق فيلم» جۇلدەسىمەن ماراپاتتالدى

قازاقتىڭ عاسىرلار بويى قالىپتاسقان ساياتشىلىق مادەنيەتى تۋرالى سىر شەرتەتىن «مۇزبالاق» انيماتسيالىق ءفيلمى گەرمانيادان جۇلدەمەن ورالدى، دەپ حابارلايدى «قازاقفيلم».

اتالمىش انيماتسيالىق ءفيلمى 7-13 قازان ارالىعىندا گەرمانيانىڭ حەمنيتس قالاسىندا وتكەن 24-ءشى حالىقارالىق بالالار مەن جاسوسپىرىمدەرگە ارنالعان Schlingel كينوفەستيۆالىندە گەرمانيانىڭ انيماتسيالىق فيلمدەر ينستيتۋتى (DIAF) تاعايىنداعان «ۇزدىك انيماتسيالىق فيلم» جۇلدەسىمەن ماراپاتتالدى.

«مۇزبالاق» انيماتسيالىق ءفيلمى بۇركىت پەن ادامنىڭ دوستىعى تۋرالى باياندايدى. ءفيلمدى قر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن. رەجيسسەرلەرى –تۇردىبەك مايدان جانە تىلەك تولەۋعازى.

«2D انيماتسياسىنىڭ تاڭ قالدىرارلىق ۇلگىسى. Disney جانە Pixar انيماتسيالىق كەڭىستىگىنەن تىس جەردە جاسالعان ناعىز جاڭالىق»، دەلىنگەن فەستيۆالدىڭ ءباسپاسوز بايانىندا. Schlingel حالىقارالىق فەستيۆالىن گەرمانيانىڭ بالالار مەن جاسوسپىرىمدەر جونىندەگى ساكسون قىزمەتى ۇيىمداستىرعان. بيىل بۇل بايقاۋدا 52 ەلدەن كەلگەن 233 بالالار مەن جاسوسپىرىمدەرگە ارنالعان فيلم كورسەتىلدى.

«بۇل فيلم ۇلتتىق بوياۋى قانىق، قازاقتىڭ بولمىسىن كورسەتەتىن تۋىندى، سوندىقتان دا شەتەلدىكتەرگە قىزىقتى بولدى دەپ ويلايمىن. وسى ورايدا، بىزگە قولداۋ كورسەتىپ، وسى ءفيلمنىڭ شىعۋىنا سەبەپكەر بولعان مادەنيەت جانە سپورت مينيسترلىگىنە، «قازاقفيلم» كينوستۋدياسىنا العىسىمىزدى بىلدىرەمىز. وسىنداي جەڭىستەر كوپ بولىپ، «مۇزبالاق» بارشامىزدى قۋانتا بەرسىن»، - دەدى ءفيلمنىڭ رەجيسسەرى تۇردىبەك مايدان.

ەستەرىڭىزگە سالا كەتسەك، بىلتىر «مۇزبالاق» ءفيلمى قازاقستاننىڭ كينەماتوگرافيستەر وداعى تاعايىنداعان «قۇلاگەر» سىيلىعى – «ۇزدىك انيماتسيالىق فيلم» جۇلدەسىمەن ماراپاتتالعان. سونىمەن قاتار، انيماتسيالىق تۋىندى رەسەيدە وتكەن XVII حالىقارالىق «الاۋ رۋحى» («دۋح وگنيا») اتتى دەبيۋتتىك فيلمدەر كينوفەستيۆالىنىڭ جاسوسپىرىمدەر مەن بالالارعا ارنالعان بايقاۋىنا جانە چەحيانىڭ زلين قالاسىندا وتكەن 59-شى بالالار مەن جاسوسپىرىمدەرگە ارنالعان «پانوراما» فەستيۆالىنىڭ كونكۋرستان تىس باعدارلاماسىنا قاتىستى. ودان بولەك، بۇل فيلم رەسەيدە وتكەن 14 حالىقارالىق «وتباسىمەن بىرگە» فەستيۆالىندە ارنايى جۇلدەگە قول جەتكىزدى.

 

سوڭعى جاڭالىقتار