10 قازان, 10:51 186 0 رۋحانيات دينارا مىڭجاسارقىزى

قوس الىپتىڭ مەرەيتويى

تۇركىستان وبلىسىندا مەملەكەت جانە قوعام قايراتكەرى سۇلتانبەك قوجانوۆتىڭ 125 جىلدىعىنا ارنالعان «ۇلتىن ۇلىقتاعان قايراتكەر» اتتى سالتاناتتى ءىس-شارا باستالدى. سوزاق اۋدانىنان باستاۋ العان مەرەكەگە اۋدان اكىمى سالىحان پولاتوۆ، جازۋشى، حالىقارالىق الاش سىيلىعىنىڭ يەگەرى مارحابات بايعۇت، «Nur Otan» پارتياسى وبلىستىق فيليالى توراعاسىنىڭ ءبىرىنشى ورىنباسارى بەيسەن تاجىباەۆ پەن وزگە دە زيالى قاۋىم وكىلدەرى، اۋدان تۇرعىندارى قاتىستى.

شارانىڭ ماقساتى – مەملەكەت جانە قوعام قايراتكەرى، ۇستاز، عالىم، پۋبليتسيست س.قوجانوۆتىڭ ونەگەلى ءومىرىن ناسيحاتتاۋ. تاريحىمىزدا كۇنى بۇگىنگە دەيىن لايىقتى باعاسىن الا الماي كەلە جاتقان تۇلعالار از ەمەس. سولاردىڭ ءبىرى – سۇلتانبەك قوجانوۆ. ونىڭ تۇلعاسىن تانۋ مەن تانىتۋعا قاتىستى بىرقاتار ارناۋلى زەرتتەۋ ەڭبەكتەر جارىققا شىقتى. دەگەنمەن، وسكەلەڭ ۇرپاققا الاش قوزعالىسى قايراتكەرىنىڭ ەرەن ەڭبەگىن كەڭىنەن تانىتۋ قاجەت.

ءىس-شارا اياسىندا سوزاق اۋدانىندا س.قوجانوۆ اتىنداعى 100 ورىندىق مەكتەپتىڭ العاشقى كىرپىشى قالانىپ، ەسكەرتكىشىنە گۇل شوقتارى قويىلدى.

«Nur Otan» پارتياسى وبلىستىق فيليالى توراعاسىنىڭ ءبىرىنشى ورىن­­باسارى ب.تاجىباەۆ: «رۋحاني جاڭ­­عىرۋ» باعدارلاماسى اياسىندا «Nur Otan» پارتياسى تۇركىستان وبلىستىق فيليالىنىڭ سوزاق، تۇلكىباس اۋدانى اكىمدىكتەرىمەن بىرلەسە ۇيىمداستىرعان بۇل شاراسى مەملەكەت جانە قوعام قايراتكەرلەرى تۇرار رىسقۇلوۆ پەن سۇلتانبەك قوجانوۆتىڭ تۋعانىنا 125 جىل تولۋىنا وراي وتكىزىلۋدە. بۇل اۆتوساپاردىڭ باستى ماقساتى – قوس تۇلعانىڭ ەڭبەكتەرىن ەل اراسىندا ناسيحاتتاپ، ۇرپاق ساناسىنا ءسىڭىرۋ، الىس اۋىلدارداعى اعايىننىڭ رۋحاني الەۋە­­تىن كوتەرۋگە جاعداي جاساۋ»، – دەدى.

سۇلتانبەك قوجانوۆتىڭ قوعامدىق-ساياسي قىزمەتى ۇلتقا قىزمەت ەتۋدىڭ جارقىن ۇلگىسى بولدى. ول ۇلتجاندىلىعى مەملەكەتشىلىكپەن ۇلاسقان، مەملەكەتشىلىگى ۇلتىنىڭ رۋحىنا قىزمەت ەتۋگە جۇمىلدىرىلعان قايراتكەر حالىقتىڭ جادىنان دا، عىلىمي تانىمنان دا مارتەبەلى ورىن الۋعا ابدەن لايىق. قوعام قايراتكەرلەرى مەن اقىن-جازۋشىلار، بەلگىلى عالىمداردان قۇرالعان «اقسۇمبە مەن اقسۋ-جاباعىلى اراسى» اۆتوساپارىن قوس الىپتىڭ تۋعان جەرلەرىندە رۋحاني كەزدەسۋلەر وتكىزىپ، قوجانوۆ پەن رىسقۇلوۆ ەڭبەكتەرىن كەڭىنەن ناسيحاتتاۋ جونىندەگى كەڭەستەرىمەن بولىسپەك.

مەرەيتوي ارى قاراي اۋدان ورتالىعى شولاققورعاندا جالعاسىن تابادى.

ال قوعام جانە مەملەكەت قايراتكەرى تۇرار رىسقۇلوۆتىڭ تۋعانىنا 125 جىل تولۋىنا وراي، تۇلكىباس اۋدانىندا «Nur Otan» پارتياسى تۇركىستان وبلىستىق فيليالى، وبلىستىق مادەنيەت جانە تىلدەردى دامىتۋ باسقارماسى مەن تۇلكىباس اۋدانى اكىم­دىگى ۇيىمداستىرعان «ۇلت تاريحىنداعى جارقىن تۇلعا» شاراسى دا ءوز دەڭگەيىندە ءوتتى. دەلەگاتسيا وكىلدەرى 1915 جىلى «الاش» قايراتكەرى، تۇڭعىش قازاق ينجەنەرى مۇحامەتجان تىنىشپاەۆتىڭ باسشىلىعىمەن سوعىلعان جاسكەشۋ اۋىلدىق وكرۋگى رىسقۇل اۋىلىنىڭ ماڭىندا ورنالاسقان تۋننەلمەن تانىسىپ، ت.رىسقۇلوۆتىڭ اتا قونىسى رىسقۇل اۋىلىنداعى كۇردەلى جوندەۋدەن وتكەن اۋىلدىق كلۋبتىڭ اشىلۋ سالتاناتىنا قاتىستى. سونىمەن قاتار، تۇلكىباس كەنتىندەگى توعىز جولدىڭ تورابى – تۇركىسىب تەمىر­جولىنىڭ بويىندا ورنالاسقان قوس قايراتكەر – م.تىنىشپاەۆ پەن ت.رىسقۇلوۆتىڭ ەسكەرتكىشىنە ارنايى بارىپ، گۇل شوقتارىن قويدى.

ايتۋلى شارا «ۇلت تاريحىنداعى جارقىن تۇلعا» اتتى تاقىرىپتاعى سال­تاناتتى جيىنمەن قورىتىندىلاندى. تۇركىستان وبلىسى اكىمىنىڭ ورىن­باسارى س.قالقامانوۆ تۇرار ءومى­رى جايلى قىسقاشا بايانداما جاساسا، «Nur Otan» پارتياسى وبلىستىق فيليا­لى توراعاسىنىڭ ءبىرىنشى ورىن­با­سارى ب.تاجىباەۆ قازاق حالقىنىڭ بولا­شاعى ءۇشىن كۇرەسكەن تۇلعالاردى كەڭى­نەن ناسيحاتتاۋ قاجەتتىگىنە توقتالدى.

سوڭعى جاڭالىقتار