9 قازان, 21:43 167 0 ايماق انار لەپەسوۆا

داريعا نازارباەۆا "سىرىم" شەكارا بەكەتىندە بولدى

سەنات توراعاسى داريعا نازارباەۆا باتىس قازاقستان وبلىسىنا جۇمىس ساپارى بارىسىندا قازاقستان مەن رەسەي شەكاراسىنداعى «سىرىم» شەكارالىق وتكىزۋ بەكەتىندە بولىپ، ونداعى جاڭارتىلعان ينفراقۇرىلىممەن تانىستى، دەپ حابارلايدى پالاتانىڭ ءباسپاسوز قىزمەتى.

شەكارا بەكەتى قىزمەتكەرلەرىنىڭ مالىمەتتەرى بويىنشا، وسى ۋچاسكە ارقىلى ورتاشا ەسەپپەن مىڭنان استام اۆتوموبيل وتەدى. بىرنەشە اي بۇرىن شەكارا بەكەتىنىڭ مۇمكىندىگىمەن مۇنداي كولەمدەگى كولىك ءوتىپ ۇلگەرە الماعان بولاتىن، الىس جولعا تاۋار تاسىمالدايتىن جۇك ماشينالارى كەيدە تاۋلىك بويى كەزەكتە تۇرۋعا ءماجبۇر بولىپ، شۇباتىلعان كەپتەلىستەر تۋىندادى. قازىرگى كەزدە بەكەتتەگى ينفراقۇرىلىم تولىعىمەن جاڭارتىلدى، بۇرىنعى ەكى جولاققا قوسىمشا جابدىقتالعان سەگىز تەكسەرۋ جولاعى قوسىلدى. بۇل قازاقستان مەن رەسەي شەكاراسىنداعى وسى ۋچاستوكتە كەپتەلىس ماسەلەسىن شەشۋگە مۇمكىندىك بەردى.

سونداي-اق سەنات توراعاسى ورالداعى «باتىس قازاقستان ماشينا جاساۋ كومپانياسى» اكتسيونەرلىك قوعامىندا دا بولدى. سەناتورلار جايىق وزەنىنىڭ جاعاسىنا بولىپ، ونىڭ ەكولوگيالىق جاعدايىمەن تانىستى. «قازگيدرومەتتىڭ» مالىمەتىنشە، 2017 جىلدان باستاپ وزەندەگى سۋ 30-40 پايىزعا ازايدى. جەرگىلىكتى تۇرعىندار سوڭعى ونجىلدىقتا وزەن سۋ تاسقىنى كەزەڭىندە دە جاعادان اسپايتىنىن ايتۋدا. ساپار بارىسىندا وزەننىڭ كەيبىر جەرلەرىنە ولشەم جاسالىپ، سۋدىڭ تەرەڭدىگى تەك 50 سم عانا بولاتىنى سەنات توراعاسىنا كورسەتىلدى.

 

سوڭعى جاڭالىقتار