8 قازان, 21:33 219 0 ءبىلىم انار لەپەسوۆا

كەلەر جىلدان باستاپ تالاپكەرلەر جوو-عا قۇجات تاپسىرمايدى

ءبىلىم بەرۋ سالاسىندا 60-تان استام مەملەكەتتىك قىزمەت ەلەكتروندى تۇردە قولجەتىمدى. بۇل تۋرالى قر ءبىلىم جانە عىلىم ۆيتسە-ءمينيسترى رۇستەم بيعاري مالىمدەدى. 

«ءبىلىم بەرۋ جۇيەسىندە 67 قىزمەت ەلەكتروندى تۇردە قولجەتىمدى. ماسەلەن، قازىرگى ۋاقىتتا جوعارعى وقۋ ورنىنا قۇجات تاپسىرۋ قيىن جۇمىس بولىپ كورىنەدى. 2020 جىلدان باستاپ ونىڭ قاجەتى بولمايدى، سەبەبى جىل سوڭىنا دەيىن بارلىق اقپارات تسيفرلانادى.

«كۇندەلىك» جۇيەسىندەگى دەرەكتەر اۆتوماتتى تۇردە جوو-عا بەرىلەدى، سايكەسىنشە قۇجاتتاردى قايتا تاپسىرۋ قاجەت ەمەس. جالپى، مەكتەپتەر مەن بالاباقشالارداعى وقۋ پروتسەسى اۆتوماتتاندىرىلعان»، - دەدى رۇستەم بيعاري بۇگىن Astana Hub تەحنوپاركىندە الەۋمەتتىك يننوۆاتسيالار زەرتحاناسىنىڭ اشىلۋىندا.

سونىمەن بىرگە، تسيفرلىق دامۋ، يننوۆاتسيالار جانە اەروعارىشتىق ونەركاسىپ ۆيتسە-ءمينيسترى ابىلايحان وسپانوۆ مەملەكەتتىڭ بالالارعا قاتىستى قىزمەتتەردى كوبىرەك ۇسىنىپ جاتقانىن جەتكىزدى.

«وتكەن جىلى SMS-حابارلاما ارقىلى جاڭا تۋعان سابيگە ات قويىپ، تۋ تۋرالى كۋالىك الۋ قىزمەتىن ىسكە قوستىق. ەشقايدا بارۋدىڭ قاجەتى جوق. ەلەكتروندى قىزمەتتەردىڭ باسىم بولىگى بالالارعا كورسەتىلۋى ءتيىس»، - دەدى ابىلايحان وسپانوۆ.

 

 

سوڭعى جاڭالىقتار