8 قازان, 17:15 333 0 ءبىلىم احمەت ومىرزاق

بويجەتكەندەردىڭ كوبى شەتەل ازاماتتارىن قالامايدى

نەمەسە قىزدار جاتقا نەگە جار بولادى؟

 قازاق ۇلتتىق قىزدار پەداگوگيكالىق ۋنيۆەرسيتەتىنىڭ جانىنداعى الەۋمەتتىك جانە گەندەرلىك عىلىمي-زەرتتەۋلەر ينستيتۋتى «مىڭ كەلبەتتى جاستىق شاق: الماتى قالاسىنىڭ جوعارى وقۋ ورىندارى ستۋدەنتتەرىنىڭ الەۋمەتتىك-پسيحولوگيالىق پورترەتى» تاقىرىبىندا ارنايى زەرتتەۋ جۇرگىزدى.

جوبانىڭ ماقساتى – الماتى قالاسىنداعى جوعارعى وقۋ ورىندارىندا وقيتىن ستۋدەنت قىزداردىڭ كاسىپتىك داعدىلارىن زەرتتەۋ ارقىلى ولاردىڭ ومىرلىك قۇندىلىقتارى مەن ۇستانىمدارىن انىقتاۋ. سونىمەن قاتار زەرتتەۋ بارىسىندا جوعارعى وقۋ ورىندارىنىڭ وقۋ-تاربيەلىك كورسەتكىشتەرىنە دە تالداۋ جۇرگىزىلدى.

ينستيتۋت ماماندارىنىڭ ايتۋىنشا، ساۋالناماعا الماتى قالاسىنداعى 8 جوعارى وقۋ ورنىنىڭ ستۋدەنتتەرى قاتىسقان. ولاردىڭ قاتارىندا ءال-فارابي اتىنداعى قازاق ۇلتتىق ۋنيۆەرسيتەتى، قازاق ۇلتتىق قىزدار پەداگوگيكالىق ۋنيۆەرسيتەتى، س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى، ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى، الماتى مەنەدجمەنت ۋنيۆەرسيتەتى، شەت تىلدەرى جانە ىسكەرلىك مانساپ ۋنيۆەرسيتەتى، سۋلەيمەن دەميرەل ۋنيۆەرسيتەتى جانە م. تىنىشپاەۆ اتىنداعى قازاق ترانسپورت جانە كوممۋنيكاتسيا اكادەمياسى بار.

الەۋمەتتىك زەرتتەۋ بارىسىندا ستۋدەنتتەردىڭ جوعارى وقۋ ورنىن تاڭداۋى، بىلىمگە دەگەن كوزقاراسى، كاسىپتىك باعدارعا، بيۋدجەت كوزدەرىنە، ساياسي باعدارلاۋعا، بوس ۋاقىتتى وتكىزۋگە، الەۋمەتتىك سايكەستىلىككە، نەكەگە تۇرۋعا، رەپرودۋكتيۆتىك جانە گەندەرلىك باعدارلاماعا قاتىستى سۇراقتار قامتىلدى.

– بۇگىندە جاستار پسيحولوگياسىنىڭ تۇراقسىزدىعىنان، قوعامدا ءوز ورنىن تابا الماۋىنان، ءبىلىم جانە ءدىني ساۋاتىنىڭ تومەندىگىنەن، ەڭبەك نارىعىندا شەتتەتىلۋىنەن جانە بوس ۋاقىتىنىڭ كوپتىگىنەن ولقىلىقتى جايتتارعا تاپ بولادى. زەرتتەۋ بارىسىندا جاستاردىڭ، سونىڭ ىشىندە قىزداردىڭ مادەني، رۋحاني ومىرىنە جەتە ءمان بەرىلىپ، تولىققاندى تۇلعا تاربيەلەۋ جانە ولاردىڭ ءوز ىستەرىن اشۋ باعىتىندا قانداي ىستەر اتقارىلۋى تيىستىگى ەكشەلدى، – دەيدى الەۋمەتتىك جانە گەندەرلىك عىلىمي-زەرتتەۋلەر ينستيتۋتىنىڭ ماماندارى.

رەسپوندەنتتەر «بۇل ماماندىقتى نە ءۇشىن تاڭدادىڭىز؟»، «ءۇش تىلدىلىك يدەياسىنا قالاي قارايسىز؟ اعىلشىن ءتىلىن وقىتۋدىڭ ساپاسى قاناعاتتاندىرا ما؟ اعىلشىن ءتىلىن وقۋ بارىسىندا قانداي قيىنشىلىقتارعا كەز بولدىڭىزدار؟»، «ۋنيۆەرسيتەت ديپلومى قىزدارعا ما، الدە ۇلدارعا ماڭىزدىراق پا؟ گەندەرلىك تاپتاۋرىن ماسەلەسى جاعىنان تالداۋ جاساساق؟ «ۋنيۆەرسيتەت ديپلومىن العاننان كەيىن ەر ادامدارعا جۇمىسقا تۇرۋ قىزدارعا قاراعاندا جەڭىلدەۋ مە؟ الدە ەكەۋىنە دە تەڭ دارەجەدە مە؟»، «الەۋمەتتىك بەلسەندىلىك بىزگە نە بەرەدى؟ ول نە ءۇشىن قاجەت؟»، «ءبىلىم الۋ اتا-انانىڭ قاراجاتىنا بايلانىستى ما نەمەسە مۇمكىندىك بولسا باسقا وقۋ ورنىن تاڭدايتىن با ەدىڭىز؟» سىندى ساۋالدار توڭىرەگىندە ءوز ويلارىمەن ءبولىستى.

«شەتەل ازاماتىنا تۇرمىسقا شىعۋ. بۇل دۇرىس پا؟» دەگەن سۇراققا بويجەتكەندەردىڭ باسىم بولىگى بۇنى قۇپتامايتىنىن ايتتى. نازىكجاندىلاردىڭ پايىمداۋىنشا، قىزدار شەتەلدىك ازاماتقا الەۋمەتتىك جاعدايىن تۇزەتۋ ءۇشىن جار بولادى. ال ساۋالناماعا قاتىسۋشىلاردىڭ ءبىر توبى وتباسىلىق باقىت ۇلتقا نەمەسە دىنگە بايلانىستى ەمەس دەگەن پىكىردە.

– ساۋالناماعا مىڭعا جۋىق بويجەتكەن قاتىستى. ونى جۇرگىزۋ ءۇشىن قىزدار ۋنيۆەرسيتەتىندە ارنايى 9 فوكۋس توپ ۇيىمداستىرىلدى. وسى تاقىلەتتەس ساۋالناما الداعى ۋاقىتتا جوعارى وقۋ ورىندارىنىڭ پروفەسسور-وقىتۋشىلارى مەن قىزمەتكەرلەرىنىڭ اراسىندا جۇرگىزىلمەك، – دەپ اتاپ ءوتتى جوبا اۆتورلارى.

سوڭعى جاڭالىقتار