8 قازان, 12:00 215 0 ساياسات انار لەپەسوۆا

داريعا نازارباەۆا: ايەلدەردىڭ مەملەكەتتىك باسقارۋعا قاتىسۋىن كەڭەيتۋ كەرەك

سەنات توراعاسى داريعا نازارباەۆا جۇمىس ساپارىمەن اقتوبە وبلىسىندا بولدى. ول «Nur Otan» پارتياسىنىڭ وبلىستىق بولىمشەسىندە ازاماتتاردى قابىلدادى. سونداي-اق بىرقاتار كەزدەسۋلەر وتكىزدى.

پالاتا توراعاسى وبلىستاعى كاسىپكەر ايەلدەرىمەن كەزدەسۋدە مەملەكەتتىك باسقارۋعا، رەسپۋبليكالىق جانە ايماقتىق دەڭگەيدەگى وكىلدى ورگاندار جۇمىسىنا ايەلدەردىڭ قاتىسۋىن كەڭەيتۋ ماسەلەسىن كوتەردى. د.نازارباەۆا كەزدەسۋگە قاتىسۋشىلارعا وتباسىلىق جانە گەندەرلىك ساياسات تۇجىرىمداماسىنىڭ جاڭا جوباسىن تالقىلاۋ تۋرالى اڭگىمەلەدى. گەندەرلىك تەڭدىك قاعيدالارى – قۇجاتتىڭ نەگىزىنە اينالىپ وتىر.

«ءبىزدىڭ مىندەتىمىز – ايەلدەردىڭ مەملەكەتتىك باسقارۋعا، ساياسات پەن ەكونوميكاعا قاتىسۋىن كەڭەيتۋ. ماسەلە كەڭىنەن تالقىلانىپ جاتىر. اراب ەلدەرىندەگى احۋالمەن بىرگە الەمدىك تاجىريبەدە ايەلدەردىڭ ۇكىمەتكە، ايماقتارعا باسشىلىق ەتۋگە جانە دەپۋتاتتىق كورپۋسقا قاتىسۋىن كۆوتالاۋعا دەيىن اركەلكى شەشىمدەر اۋقىمىن كورسەتىپ وتىر»، - دەپ اتاپ ءوتتى د.نازارباەۆا.

سەنات باسشىسى جاستار جانە ەرىكتىلەر ۇيىمدارىمەن كەزدەسۋدە جاستار جىلى اياسىندا وڭىردە وتكەن شارالاردىڭ ناتيجەلەرىمەن، سونداي-اق جاستاردى قولداۋ جونىندەگى وبلىستىق باعدارلامالار مەن جوبالاردىڭ جۇزەگە اسۋ بارىسىمەن تانىستى. جاستاردىڭ ەرىكتىلەر قىزمەتىنە قاتىسۋىن ىنتالاندىرۋعا ەرەكشە نازار اۋدارىلدى. ونىڭ ايتۋىنشا، ەلدەگى ەرىكتىلىكتى ىنتالاندىرۋ مەن كوتەرمەلەۋدىڭ ناقتى تەتىكتەرىن زاڭنامالىق تۇرعىدا بەكىتۋ قاجەت بولىپ وتىر.

بۇدان بولەك، داريعا نازارباەۆا سەناتورلارمەن بىرگە اۋە قورعانىسى كۇشتەرىنىڭ ت.بيگەلدينوۆ اتىنداعى اسكەري ينستيتۋتىندا بولدى. سەنات توراعاسى ينستيتۋتتىڭ ماتەريالدىق-تەحنيكالىق جابدىقتالۋىمەن تانىسىپ، وقىتۋشىلار قۇرامىمەن كەزدەستى جانە كۋرسانتتارمەن اڭگىمەلەستى. وقۋ ۇدەرىستەرىنىڭ ماتەريالدىق-تەحنيكالىق جابدىقتالۋى ماسەلەلەرى جانە بولاشاق ۇشقىشتار مەن اۋە ينجەنەرلەرىن دايارلاۋ ساپاسى كەزدەسۋدىڭ نەگىزگى تاقىرىبى بولدى.

ال وڭىردەگى بۇقارالىق اقپارات قۇرالدارىنىڭ باسشىلارىمەن كەزدەسۋدە ەلىمىزدىڭ اقپارات نارىعىنىڭ ماڭىزدى ماسەلەلەرىن تالقىلادى. د.نازارباەۆا ايماقتاعى ءداستۇرلى باق پەن عالامتور جەلىسىندە جۇمىس ىستەيتىن جاڭا مەديا سالاسىنىڭ ەكونوميكالىق جاعدايىنا ەرەكشە نازار اۋداردى. سونداي-اق ەلىمىزدەگى بۇقارالىق اقپارات قۇرالدارىن دامىتۋعا ارنالعان سالالىق باعدارلامانى ازىرلەۋگە بەلسەندى قاتىسۋعا شاقىردى.

 

سوڭعى جاڭالىقتار