4 قازان, 21:11 321 0 سپورت انار لەپەسوۆا

ادىلبەك جاقسىبەكوۆ: ادىلەتسىز تورەشىلەر مەن فۋتبولشىلار فۋتبولدان قۋىلادى

قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆ كلۋبتار مەن تورەشىلەرگە ۇندەۋ جولداپ، ءادىل ويىن پرينتسيپتەرىن قاتاڭ ساقتاۋعا شاقىردى، دەپ حابارلايدى  قفف ءباسپاسوز قىزمەتى.

فۋتبولدان 2019 جىلعى قازاقستان پرەمەر-ليگاسى شەشۋشى كەزەڭگە اياق باستى. 28-تۋردان كەيىن تۋرنير كەستەسىنىڭ باسىندا الماتىنىڭ «قايرات»، قوستانايدىڭ «توبىل» جانە نۇر-سۇلتاننىڭ «استانا» كوماندالارى كەلەدى. شەشۋشى ماتچتاردىڭ قارساڭىندا قفف باسشىسى پرەمەر-ليگانىڭ، ءبىرىنشى جانە ەكىنشى ليگانىڭ كلۋبتارىن، سونداي-اق تورەشىلەردى ءادىل ويىن (Fair Play) پرينتسيپتەرىن قاتاڭ ساقتاۋعا شاقىردى.

«قولى تازا ەمەس كوماندا باسشىلارى، باپكەرلەر، تورەشىلەر، ءتىپتى فۋتبولشىلار دا، ەگەر بۇلتارتپاس دالەلدەر تابىلسا، فۋتبولدان قۋىلادى»، - دەدى ادىلبەك جاقسىبەكوۆ.

فەدەراتسيا پرەزيدەنتى رەسمي سايىستاردا ويىن ناتيجەسىنە تىكەلەي ىقپال ەتەتىن قاتەلىكتەر جىبەرگەن بىرقاتار تورەشى ۇزاق مەرزىمگە قىزمەتىنەن شەتتەتىلگەنىن تىلگە تيەك ەتتى.

«پرەمەر-ليگانىڭ، ءبىرىنشى جانە ەكىنشى ليگا بىرىنشىلىكتەرىنىڭ سوڭعى ماتچتارىن تورەشىلەر كوميتەتى، ءادىل ويىن پرينتسيپتەرىنىڭ ساقتالۋىن قاداعالاۋ كوميتەتى، قفف ادەپ كوميتەتى قاتاڭ قاداعالاپ وتىرادى»، - دەلىنگەن مالىمدەمەدە.

 

سوڭعى جاڭالىقتار