4 قازان, 11:11 346 0 الەۋمەت انار لەپەسوۆا

نەسيەسى كەشىرىلگەندەر: قارىزىنان قۇتىلعانداردىڭ كوبى قاي وڭىردەن؟

كرەديتى كەشىرىلگەندەردىڭ كوبى الماتى، شىمكەنت قالالارى مەن تۇركىستان وبلىسىنىڭ تۇرعىندارى، دەپ حابارلايدى قازاق راديوسىنىڭ جاڭالىقتار قىزمەتى. 

الماتى قالاسى بويىنشا 115 998 كرەديتتىڭ قارىزى كەشىرىلسە، تۇركىستان وبلىسىندا 83 895, شىمكەنت قالاسىندا 74 731 نەسيە وتەلگەن. جامبىل، قىزىلوردا جانە شىعىس قازاقستان وبلىستارىندا دا كەشىرۋگە جاتاتىن كەپىلدىكسىز كرەديتتەر كوپ بولعان.

كوپبالالى، مۇگەدەك بالا تاربيەلەپ وتىرعان، اسىراۋشىسىنان ايىرىلعان وتباسىلار مەن اتاۋلى الەۋمەتتىك كومەك الاتىن ازاماتتار جانە  جەتىم بالالاردىڭ بەرەشەگىن وتەۋ جۇمىسى جالعاسۋدا. قازىر وسى بەس ساناتقا كىرەتىن كرەديتى وتەلمەگەندەردىڭ قوسىمشا ءتىزىمى جاساقتالىپ جاتىر.

مەملەكەتتىك ورگانداردىڭ اقپاراتتىق جۇيەسىندە بورىشكەرلەر جايلى كەيبىر اقپارات بولماي شىققان. ەڭبەك جانە حالىقتى الەۋمەتتىك قورعاۋ مينيسترلىگى ۇلتتىق بانككە تىزىمگە ەنبەي قالعان ازاماتتار تۋرالى مالىمەتتى ەكى اپتا سايىن جولداپ وتىر. بۇل جۇمىس جەلتوقسان ايىنا دەيىن جالعاسادى.

بۇدان سوڭ ۇلتتىق بانك ءتىزىمدى كرەديت بيۋروسىمەن ناقتىلايدى. جىل سوڭىنا دەيىن قالعان بورىشكەرلەردىڭ بەرەشەگى وتەلەدى.

ايتا كەتسەك، بيىل 26 ماۋسىمدا پرەزيدەنت تۇرعىنداردىڭ كەپىلسىز كرەديتى بويىنشا بورىش جۇكتەمەسىن ازايتۋعا قاتىستى جارلىققا قول قويعان بولاتىن. 507 مىڭنان استام ادامنىڭ بانك الدىنداعى 620 مىڭداي بەرەشەگى وتەلدى. بۇعان مەملەكەت تاراپىنان 105 ميلليارد تەڭگە جۇمسالدى. بۇل ءبىر رەتتىك اكتسيا ەكەنى ايتىلعان بولاتىن.

 

سوڭعى جاڭالىقتار