3 قازان, 16:03 396 0 زاڭ انار لەپەسوۆا

الماتى پوليتسياسى بالالاردىڭ جاپپاي ۇرلانعانى تۋرالى اقپارات تاراتقانداردى ىزدەستىرۋدە

الەۋمەتتىك جەلىلەردە الماتى مەن الماتى وبلىسىندا بالالاردى ۇرلاپ جاتىر دەگەن اقپارات جاپپاي تاراعان ەدى. پوليتسيا اقپاراتتىڭ جالعان ەكەنىن مالىمدەدى. ءتارتىپ ساقشىلارى جالعان اقپارات تاراتقانداردى ىزدەستىرۋدە.

دىبىستىق حابارلامادا ايەل الماتى وبلىسى مەن مەگاپوليستىڭ كەيبىر اۋداندارىندا 2-16 جاس ارالىعىنداعى بالالاردى ۇرلاۋ فاكتىسى جيىلەپ كەتكەنىن حابارلاعان.

كەيىن ول الماتىداعى پوليتسيا دەپارتامەنتىنە ۆيدەو كەلىپ تۇسكەنىن ايتادى. ونىڭ ايتۋىنشا، قىتايدا جۇك كولىكتەرىنەن مۇزعا "قاتىرىلعان" قازاقستاندىق بالالاردى ءتۇسىرىپ جاتقان ءسات ۆيدەوعا ءتۇسىپ قالعان.

الماتىنىڭ پوليتسيا دەپارتامەنتى بۇل اقپارات مۇلدەم شىندىققا جاناسپايدى دەپ وتىر.

"حابارلامادا ايتىلعان اقپارات جالعان. بىردە-ءبىر فاكت دالەلدەنگەن جوق", - دەدى الماتىلىق پوليتسيا دەپارتامەنتىنىڭ ءباسپاسوز قىزمەتى.

پوليتسياداعىلار بۇل اقپاراتتى تاراتۋشىلاردىڭ ماقساتى حالىق اراسىندا دۇربەلەڭ تۋعىزۋ ەكەنىن ايتادى.

قۇقىق قورعاۋ ورگاندارىنىڭ قىزمەتكەرلەرى تەكسەرىس جۇرگىزىپ جاتىر. جالعان اقپارات تاراتقان ادام قىلمىستىق جاۋاپكەرشىلىككە تارتىلاتىن بولادى.

سوڭعى جاڭالىقتار