3 قازان, 15:51 349 0 تەحنولوگيالار دينارا مىڭجاسارقىزى

قازاقستان ينتەرنەت جىلدامدىعى بويىنشا ەلۋلىككە ەنبەدى

قازاقستان ينتەرنەت جىلدامدىعى بويىنشا ۇزدىك 50 ەل قاتارىنا كىرە المادى. 100 مىڭنان استام حالقى بار سەنت-ۆينسەنت جانە گرەناديندەر ەلى رەيتينگتە قازاقستاننىڭ الدىندا تۇر

قازاقستاندا ينتەرنەت پايدالانۋشىلاردىڭ سانى ارتقان. سوڭعى دەرەك بويىنشا ەلىمىزدە تىركەلگەن 2,5 ميلليون ينتەرنەت ابونەنتى بار. ياعني، ءبىر جىلدا ولاردىڭ سانى 1,2%-عا ءوستى. بۇل تۋرالى energyprom.kz حابارلايدى.

ينتەرنەتكە قوسىلۋ مۇمكىندىگى بار ۇيالى بايلانىس ابونەنتتەرىنىڭ سانى 15,1 ميلليون، بۇل وتكەن جىلدىڭ سايكەس كەزەڭىمەن سالىستىرعاندا 8,5%-عا كوپ (13,9 ملن). قاڭتار-تامىز ايلارىنىڭ قورىتىندىسى بويىنشا، ينتەرنەتكە قول جەتكىزۋ قىزمەتتەرىنەن تۇسكەن كىرىس كولەمى 15,7%-عا ارتىپ، 185,2 ملرد تەڭگەگە جەتتى. بۇل وتكەن جىلدىڭ ۇقساس كەزەڭىمەن سالىستىرعاندا 6,8% جوعارى (160 ملرد تگ).

ينتەرنەت پايدالانۋشىلاردىڭ سانى ارتقانمەن، قازاقستان ينتەرنەت جىلدامدىعى بويىنشا (38,3 مب/س) الەمدىك رەيتينگتە 64-ءشى ورىندا ەكەن. رەيتينگتە سەنت-ۆينسەنت جانە گرەناديندەر ەلى (38,6 مب/س) قازاقستاننىڭ الدىنا شىققان، ال كوسوۆو (36,7 مب/س)  بىر ساتى تومەندە. ينتەرنەت جىلدامدىعى بويىنشا كوش باسىندا — سينگاپۋر (193,9 مب/س), گونكونگ (161,2 Mب/س) جانە وڭتۇستىك كورەيا (160 Mب/س) تۇر. ۇزدىك بەستىككە رۋمىنيا (131,2 Mب/س) مەن تايۆان (129,4 Mب/س) كىرەدى.

ەستەرىڭىزگە سالا كەتەيىك، تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ 2021 جىلدان باستاپ نۇر-سۇلتان، الماتى، شىمكەنت مەگاپوليستەرىندە 5G پايدا بولاتىنىن ايتتى.

سوڭعى جاڭالىقتار