19 قىركۇيەك, 17:56 478 0 ساياسات Túrkistan Gazeti

باس پروكۋراتۋرا: ابليازوۆكە سەنۋگە بولمايدى!

مۇحتار ءابليازوۆتىڭ سوزىنە بايلانىستى ەلىمىزدىڭ باس پروكۋراتۋراسى وكىلدەرى قازاقستاندىقتارعا ۇندەۋ جولدادى. باس پروكۋراتۋرا وكىلدەرىنىڭ مالىمدەۋىنشە، مۇحتار ءابليازوۆتىڭ ىسىندە ەشقانداي ساياسات جوق.

«قازاقستان ونى قۋدالاۋدى جالعاستىرادى. ءابليازوۆ مۇنى بىلەدى جانە قورقادى. ساياسي سەبەپتەردى سىلتاۋراتىپ قۋعىنعا ۇشىراعانىن ايتادى، الايدا ونىڭ ىسىندە ەشقانداي ساياسات جوق. بيىل شىلدەدە نيۋ-يورك سوتى ءابليازوۆتى جالعان اقپارات تاراتۋشى رەتىندە قاراستىرىپ، ونىڭ ساياسي قۋعىنعا ۇشىراعانى تۋرالى پىكىرلەرىن جوققا شىعاردى.  وسىعان دەيىن لوندون سوتى دا وسىنداي شەشىمگە كەلدى. ولار وعان 4 ميلليارد دوللار ايىپپۇل سالىپ، ونى الاياق دەپ تانىپ، جالعان اقپارات بەرگەنى ءۇشىن 22 ايعا سوتتادى. ۇلىبريتانيا ىشكى ىستەر مينيسترلىگى ونى بوسقىن ستاتۋسىنان ايىردى. سول سەبەپتى ءابليازوۆ فرانتسياعا قاشتى جانە ءوزى الداپ كەتكەن  وتانداستارىن سىرتتاي بيلىككە قارسى ايداپ سالىپ وتىر»، – دەدى باس پروكۋراتۋرا قوعامدىق قىزىعۋشىلىقتى قورعاۋ قىزمەتىنىڭ باسشىسى ساپاربەك نۇرپەيىسوۆ.

سونىمەن بىرگە، ساپاربەك نۇرپەيىسوۆ ابليازوۆكە سەنۋگە بولمايتىنىن ەسكەرتتى. «ابليازوۆكە سەنۋگە بولمايدى. ادامداردى زاڭسىز اكتسياعا شىعۋعا ۇگىتتەيدى. ولاردىڭ كوشەگە شىققانى ءۇشىن اقى تولەيدى. ول اقشانى سول ەلىمىزدىڭ ازاماتتارىنان ۇرلادى. ءابليازوۆ پەن ونىڭ جاقتاستارى – سوت شەشىمىمەن تىيىم سالىنعان ەكسترەميستىك دۆك ۇيىمىنا – قاراپايىم ادامداردى جاڭىلىستىرىپ، قاساقانا قۇقىق بۇزۋشىعا اينالدىردى.  وسى كەزدە ول ءوزى فرانتسيادا ءجۇر، قازاقستاننان جانە باسقا دا ەلدەردەن ۇرلاعان قاراجاتقا ءومىر ءسۇرىپ جاتىر. قۇرمەتتى وتانداستار، ارانداتۋشىلىققا جول بەرمەۋگە شاقىرامىن، سالدارى – قىلمىستىق جاۋاپكەرشىلىك»، – دەدى ساپاربەك نۇرپەيىسوۆ.

 

سوڭعى جاڭالىقتار