19 قىركۇيەك, 15:44 451 0 ءبىلىم انار لەپەسوۆا

بەردىبەك ساپارباەۆ: اۋىلدا ءبىر مۇعالىم بىرنەشە پاننەن ساباق بەرىپ ءجۇر

قر پرەمەر-ءمينيسترىنىڭ ورىنباسارى بەردىبەك ساپارباەۆ الماتىدا مەكتەپ ديرەكتورلارىمەن كەزدەستى. كەزدەسۋدە ۆيتسە-پرەمەر مۇعالىمدەردىڭ ءبىلىمىن دەڭگەيىن كوتەرۋ، الەۋمەتتىك جاعدايىن وڭالتۋ ماسەلەلەرىنە توقتالدى.

«ءبىز مۇعالىمدەردىڭ ماتەريالدىق جاعدايىن ەسكەرۋىمىز كەرەك. وتكەن جىلى ۇستازداردىڭ جالاقىسى ءوستى. تامىز كونفەرەنتسياسىندا پرەزيدەنت ۇكىمەتكە مۇعالىمدەردىڭ جالاقىسىن 2020 جىلدان باستاپ ءتورت جىل ىشىندە ەكى ەسەگە ارتتىرۋدى تاپسىرعان بولاتىن. وتكەن جىلدارمەن سالىستىرعاندا قازىر مۇعالىمدەردىڭ ەڭبەكاقىسى جامان ەمەس. سونىمەن قاتار ءبىز مۇعالىمدەردى «بولاشاق» باعدارلاماسىمەن دايىنداۋىمىز كەرەك»،- دەدى ۆيتسە-پرەمەر.

بەردىبەك ساپارباەۆتىڭ ايتىنشا، اۋىلدىق جەرلەردە ءبىلىم ساپاسى تومەن. «بۇل - وتە وزەكتى ماسەلە. اۋىلدا مۇعالىمدەر جەتىسپەيدى. وندا ءبىلىم بەرۋ دەڭگەيى ناشارلاپ بارادى. سەبەبى وندا ءبىر مۇعالىم گەوگرافيا، ماتەماتيكا، بيولوگيا پاندەرىنەن ساباق بەرە بەرەدى. مۇنداي كورىنىس اسىرەسە شاعىن مەكتەپتەردە ءجيى كەزدەسەدى. سوندىقتان ءبىز اۋىلدىق جەردە جۇمىس ىستەيتىن مۇعالىمدەردىڭ جاعدايىن جاساۋىمىز كەرەك.

«ديپلوممەن اۋىلعا» باعدارلاماسى تۋرالى ايتىپ جاتىرمىز، بىراق، وكىنىشكە قاراي، بۇل باعدارلاما كەي جەرلەردە جۇزەگە اسىپ جاتقان جوق. بارعان ۇستازدارعا باسپانا بەرمەيدى، جالداپ تۇرۋ اقىسىن تولەمەيدى. قازىر وسى ماسەلە بويىنشا ءبىز جەرگىلىكتى بيلىكپەن جۇمىس ىستەپ جاتىرمىز. مەن بۇل پروبلەمالاردىڭ ءبارىن بىلەمىن. مەن دە اكىم بولعانمىن. وسىنىڭ ءبارىن قاداعالايمىز»، - دەدى مەكتەپ ديرەكتورلارىمەن كەزدەسۋدە ب.ساپارباەۆ.

سونىمەن قاتار، پرەمەر-ءمينيستردىڭ ورىنباسارى مەكتەپ وقۋشىلاردىڭ اتا-اناسىمەن تىعىز بايلانىستا بولۋى ءتيىس ەكەنىن تىلگە تيەك ەتتى.

سوڭعى جاڭالىقتار