19 قىركۇيەك, 14:26 436 0 نۇر وتان انار لەپەسوۆا

باۋىرجان بايبەك شىمكەنتتىكتەردىڭ بازىناسىن تىڭدادى

«Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك جۇمىس ساپارىمەن شىمكەنت قالاسىنا كەلدى. ساپار بارىسىندا ول شاھارداعى بىرقاتار الەۋمەتتىك ماسەلەلەرگە نازار اۋدارىپ، جەرگىلىكتى تۇرعىندارمەن كەزدەستى. سونداي-اق پارتيانىڭ قالالىق اكتيۆىمەن كەزدەسىپ، پارتيالىق جاڭعىرۋ اياسىندا ەلباسى، پارتيا توراعاسى نۇرسۇلتان ءابىشۇلى نازارباەۆ انىقتاپ بەرگەن جاڭا مىندەتتەر مەن مەملەكەت باسشىسى قاسىم-جومارت كەمەلۇلى توقاەۆتىڭ قازاقستان حالقىنا ارناعان جولداۋىندا ايتىلعان باسىمدىقتارعا توقتالىپ ءوتتى.

ەلباسى 21 تامىزدا وتكەن پارتيا ساياسي كەڭەسىنىڭ كەڭەيتىلگەن وتىرىسىندا «سەنىم. ديالوگ. بولاشاققا نىق قادام – «Nur Otan» پارتياسىنىڭ 7 سەرپىنى» اتتى پارتيا جۇمىسىن جۇيەلى جاڭعىرتۋ باعدارلاماسىن ۇسىنعان بولاتىن. سول قۇجاتتا ازاماتتاردىڭ سۇرانىستارىنا ۋاقىتىلى جاۋاپ بەرۋ، اسىرەسە وڭىرلەردەگى جۇرتشىلىقپەن ەتەنە جۇمىس ىستەۋ ماسەلەسىنە ەرەكشە ءمان بەرىلدى. سوندىقتان پارتيا بۇل باعىتتا بەلسەندىلىكتى ودان ءارى كۇشەيتىپ، قارقىندى جۇمىستى قولعا الدى.

وسىعان وراي پارتيا توراعاسىنىڭ ءبىرىنشى ورىنباسارى شىمكەنت قالاسىنداعى ساپارىن ۆودوپيانوۆ كوشەسىنەن باستادى. ماۋسىم ايىندا بۇل كوشەدەگى №1 كوپ پاتەرلى ۇيدەن ءورت شىعىپ، سالدارىنان 45 وتباسى باسپاناسىز قالعان. سول كەزدە قالا باسشىلىعى وتقا ورانعان ءۇيدىڭ تولىعىمەن ءسۇرىلىپ، ورنىنا كوپ قاباتتى ءۇي سالىناتىنىن جانە ودان زارداپ شەككەن وتباسىلارعا پاتەرلەر بەرىلەتىنىن ايتقان ەدى. الايدا تۇرعىندار تامىز ايىندا قۇرىلىس جۇمىستارىنىڭ كەشەۋىلدەۋىنە جانە قۇجاتتاردىڭ راسىمدەلۋ ماسەلەسىنە الاڭداپ، نارازىلىقتارىن ءبىلدىردى.

بۇل ماسەلەمەن الەۋمەتتىك جەلى ارقىلى تانىسقان باۋىرجان بايبەك شىمكەنت قالاسىنىڭ اكىمى ەرلان ايتاحانوۆپەن بىرگە باسپاناسىز قالعان تۇرعىندارمەن كەزدەسىپ، اتالعان باعىتتاعى جۇمىستاردى «Nur Otan» پارتياسىنىڭ تىكەلەي باقىلاۋعا العانىن ايتتى. سونداي-اق ول قازىرگى تاڭدا قۇجاتتاردى راسىمدەۋ جۇمىستارىنىڭ جۇيەلى تۇردە جۇرگىزىلىپ جاتقانىنا، زارداپ شەككەن ءار وتباسىنا جاڭا ۇيدەن تەگىن پاتەر بەرىلەتىنىنە توقتالدى.

– ەلباسى، پارتيا توراعاسى مەملەكەتتىڭ حالىققا جاقىن بولۋ كەرەكتىگىن، ازاماتتاردىڭ مۇڭ-مۇقتاجىن تىڭداپ، اشىق جۇمىس ىستەۋ قاجەتتىگىن ايتتى. مەملەكەت باسشىسى دا «حالىقتىڭ ۇنىنە قۇلاق اساتىن مەملەكەت» تۇجىرىمداماسىن ۇسىندى. سوندىقتان وسى ماسەلەنى الەۋمەتتىك جەلىدەن ەستىپ، ءبىلىپ، ارنايى الدارىڭىزعا كەلدىم. قازىر قالا باسشىلىعى، پارتيانىڭ قالالىق فيليالى بۇل تۇيتكىلدى وڭتايلى شەشۋ ءۇشىن بارلىق شارانى قولعا الدى. ءبىز بۇل ءىستى سوڭىنا دەيىن باقىلاۋدا ۇستايمىز، – دەدى باۋىرجان بايبەك.

قازىرگى تاڭدا قۇرىلىس جۇمىستارىنىڭ العاشقى كەزەڭى قارقىندى جۇرگىزىلۋدە. اتاپ ايتقاندا، شىمكەنت قالالىق ساۋلەت جانە قالا قۇرىلىسى باسقارماسى مەن قالالىق جەر قاتىناستارى باسقارماسى تاراپىنان ءتيىستى جۇمىستار قولعا الىنعان. سونىڭ ناتيجەسىندە بۇگىندە جەرگە ورنالاستىرۋ جوباسى دايىندالىپ، كاداسترعا كەلىسىم الۋ جۇمىستارى جۇرگىزىلۋدە. «Shymkent» اكك» اق تاراپىنان ينجەنەرلىك جەلىلەرمەن قامتاماسىز ەتۋ ءۇشىن جوبالىق-سمەتالىق قۇجاتتاما دا ساراپتاماعا تاپسىرىلدى. الداعى قاراشا ايىندا قۇرىلىسى باستالاتىن 9 قاباتتى تۇرعىن ءۇي 2020 جىلدىڭ قىركۇيەگىندە پايدالانۋعا بەرىلمەك.

باسپاناسىز قالعان تۇرعىنداردىڭ ءبىرى سافۋرا باتىربەك باستارىنا قيىن-قىستاۋ كۇن تۋعاندا مەملەكەت تاراپىنان ۇلكەن قولداۋ كورسەتىلىپ، بارلىق جاعدايدىڭ جاسالعانىن ايتىپ، ريزاشىلىعىن ءبىلدىردى. سونداي-اق دۇنيە-مۇلكى مەن كيىم-كەشەكتەرىنىڭ ورتەنىپ كەتكەنىن ايتىپ، قولداۋ سۇراعان تۇرعىندارعا پارتيانىڭ مۇرىندىق بولۋىمەن ماتەريالدىق كومەك كورسەتىلگەنىن دە ايتا كەتكەن ءجون.

بۇگىندە ەلىمىزدە قارقىن العان يگى ءىستىڭ ءبىرى ايماقتاردا ينفراقۇرىلىمدى دامىتۋ. قازاقستان پرەزيدەنتى قاسىم-جومارت توقاەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا وسى ماسەلەگە ۇلكەن كوڭىل ءبولدى. مەملەكەت باسشىسى ءار ايماق تۇرعىندارىن تازا اۋىز سۋمەن، تابيعي گازبەن، جولمەن بىركەلكى قامتاماسىز ەتۋ جانە وسى سالاداعى تەڭسىزدىكتى جويۋ ءۇشىن جۇمىستى جانداندىرۋ كەرەكتىگىن باسا ايتتى.

سوعان بايلانىستى «Nur Otan» پارتياسى توراعاسىنىڭ ءبىرىنشى ورىنباسارى شىمكەنت قالاسىنىڭ «ازات» شاعىن اۋدانىنا ارنايى باردى. بۇگىندە بۇل اۋدان تۇرعىندارى ءۇشىن اۋىز سۋ مەن جىلۋ ماسەلەسى ەڭ وزەكتى. ءتىپتى تۇتاس ءبىر اۋدانعا اۋىز سۋ جەتكىزەتىن جالعىز كولونكا عانا جۇمىس ىتەيدى. ونىڭ ءوزى جەكەنىڭ مەنشىگىندە.

گازبەن قامتۋ ماسەلەسىندە دە اۋدان حالقىن اۋرەگە سالعان تۇيتكىلدەر از ەمەس. اۋداندى گازبەن قامتىپ وتىرعان جەكە كاسىپكەرلەردىڭ باعانى قىمباتتاتۋى ازاماتتاردىڭ جانىنا باتىپ وتىر. بۇل ماسەلە دە الەۋمەتتىك جەلىلەر مەن اقپارات قۇرالدارىندا از كوتەرىلگەن جوق.

جەلى ارقىلى اتالعان ماسەلەلەردىڭ ءمان-جايىنا قانىق بولعان باۋىرجان بايبەك ازاتتىقتارمەن كەزدەسىپ، مەملەكەت تاراپىنان اۋداننىڭ ينفراقۇرىلىمىن دامىتۋعا ۇلكەن كوڭىل ءبولىنىپ وتىرعانىن ايتتى. الداعى ۋاقىتتا وسى ماسەلەگە قاتىستى بارلىق باستاما پارتيانىڭ ءجىتى نازارىندا بولماق.

– ارينە، بۇل جەردە شەشۋدى تالاپ ەتەتىن بىرقاتار وزەكتى ماسەلەنىڭ بار ەكەنىن بىلەمىز. بىراق ءبارىن بىردەي شەشىپ تاستاۋ مۇمكىن ەمەس. سوندىقتان مەملەكەت تۇرعىنداردىڭ تالاپ-تىلەكتەرىن ەسكەرە وتىرىپ، ەڭ الدىمەن، گاز، جارىق جانە اۋىز سۋ ماسەلەسىن شەشۋدى قولعا الدى. كەيىن جول جانە باسقا دا ماسەلەلەردى شەشەمىز، – دەگەن پارتيا توراعاسىنىڭ ءبىرىنشى ورىنباسارى بارلىق جۇمىستاردىڭ زاڭ اياسىندا جۇرگىزىلەتىنىن ايتتى.

سونداي-اق ول مەملەكەت تاراپىنان جەر مەن ءۇيدى زاڭداستىرۋ جۇمىستارى قولعا الىنعانىن ايتىپ، تۇرعىنداردىڭ وزدەرىن بارلىق ىستە زاڭعا سۇيەنىپ ارەكەت ەتۋگە شاقىردى. باۋىرجان بايبەك «ازات» شاعىن اۋدانى قارايتىن قالانىڭ قاراتاۋ اۋدانىنىڭ اكىمىنە بۇل ماسەلەنى باستى نازارعا الۋ كەرەكتىگىن ايتتى.

– اكىم ەلدىڭ ورتاسىندا ءجۇرۋى كەرەك. ەشقاشان حالىقتان قورىقپاي، ازاماتتاردى الاڭداتقان ماسەلەلەردى شەشۋ ءۇشىن جۇمىس ىستەۋ قاجەت. قانداي جاعداي بولسىن اكىم حالىقتىڭ الدىنا شىعىپ، ءتۇسىندىرىپ، ەلدى ۇيىتا ءبىلۋى كەرەك. ءوز كەزەگىندە حالىق تا ءبارىن مەملەكەتتىڭ موينىنا ارتىپ قويماي، قوعامدىق باقىلاۋدى قولعا الىپ، بەلسەندىلىك تانىتۋى ءتيىس، – دەدى باۋىرجان بايبەك.

ايتا كەتەيىك، اتالعان شاعىن اۋدان 2014-2015 جىلدارى تۇركىستان وبلىسىنىڭ سايرام اۋدانىنان قالا اۋماعىنا قوسىلعان. ال 2017-2018 جىلدارى قالا اكىمدىگى تاراپىنان تۇرعىن الابىنىڭ جەرلەرىن راسىمدەۋگە رۇقسات بەرىلدى. سونداي-اق بيىل، ياعني 2019 جىلى قالا اكىمدىگى تاراپىنان 370 جەر ۋچاسكەسىنە اۋىز سۋ، ەلەكتر، تابيعي گاز جەلىلەرىنىڭ قۇرىلىسىن جۇرگىزۋگە ارنالعان جوبالاۋ-سمەتالىق قۇجاتتاماسىن ازىرلەۋ ءۇشىن 12 ملن. تەنگە قاراجات ءبولىندى.

جالپى جوبالاردىڭ بولجامدىق قۇنىنا كەلەر بولساق، اۋىز سۋ جەلىلەرى – 260 ملن. تەنگەنى، ەلەكتر جەلىلەرى – 220 ملن. تەڭگەنى، ال تابيعي گاز جەلىلەرى 250 ملن. تەڭگەنى قۇراپ وتىر. بۇل جۇمىستاردى جۇرگىزۋگە 2020 جىلعى بيۋدجەتتەن 480 ملن. تەنگە ءبولۋ جوسپارلانعان. كەلەسى 2020 جىلدىڭ ناۋرىز ايىندا بيۋدجەتتى قايتا قاراۋ بارىسىندا قالعان 250 ملن. تەنگەگە تۇزەتۋ ەنگىزۋ قاراستىرىلۋدا. قۇرىلىس-مونتاجداۋ جۇمىستارى دا كەلەر جىلى جۇرگىزىلەدى دەپ جوسپارلانىپ وتىر. بۇل جۇمىستاردىڭ بارلىعىن پارتيا ءوز باقىلاۋىنا الادى.

سونىمەن قاتار باۋىرجان بايبەك «Nur Otan» پارتياسى شىمكەنت قالالىق فيليالىنىڭ كەزەكتەن تىس XXXVIII كونفەرەنتسياسىنا قاتىسىپ، قالانىڭ پارتيالىق اكتيۆىمەن كەزدەستى. كەزدەسۋدە پارتيا توراعاسى ايقىنداپ بەرگەن جۇيەلى جاڭعىرتۋ جۇمىستارىنا باسا نازار اۋدارىلىپ، الداعى باسىم-باعىتتار كەڭىنەن ءسوز بولدى. سونىڭ ىشىندە پارتيانىڭ حالىق اراسىنداعى بەدەلىن ارتتىرۋ، سايلاۋشىلاردىڭ سەنىمىن اقتاۋ، ءماجىلىس پەن بارلىق دەڭگەيدەگى فراكتسيالاردىڭ جۇمىسىن كۇشەيتۋ، باستاۋىش پارتيا ۇيىمدارىنىڭ جۇمىسىن جەتىلدىرۋ، پارتيانىڭ يدەولوگيالىق الەۋەتىن نىعايتۋ سياقتى ماڭىزدى ماسەلەلەرگە ەرەكشە كوڭىل ءبولىندى.

كونفەرەنتسيادا باۋىرجان بايبەك ەلباسى، پارتيا توراعاسىنىڭ تاپسىرماسىمەن شىمكەنت قالاسىنىڭ اكىمى ەرلان ايتاحانوۆتىڭ كانديداتۋراسىن پارتيا قالالىق فيليالىنىڭ توراعالىعىنا ۇسىندى. ناتيجەسىندە كونفەرەنتسيانىڭ ءبىراۋىزدان قولداۋىمەن شاھار باسشىسى «Nur Otan» پارتياسى شىمكەنت قالالىق فيليالىنىڭ توراعاسى بولىپ سايلاندى. ءوز سوزىندە پارتيا توراعاسىنىڭ ءبىرىنشى ورىنباسارى قالالىق فيليالدىڭ بۇرىنعى توراعاسىنا پارتيالىق باعىتتا اتقارعان جۇمىستارى ءۇشىن بارشا نۇروتاندىقتاردىڭ اتىنان العىس ءبىلدىردى.

سونىمەن بىرگە ول پارتيانىڭ شىمكەنت قالالىق فيليالىندا جوسپارلانباعان قابىلداۋ وتكىزىپ، تۇرعىنداردىڭ وتىنىشتەرىنە قۇلاق ءتۇردى. قابىلداۋ بارىسىندا نەگىزىنەن جەر ۋچاسكەلەرىن زاڭداستىرۋ، ءبولۋ جانە راسىمدەۋگە قاتىستى ماسەلەلەر كوتەرىلدى. ناتيجەسىندە باۋىرجان بايبەك پارتيانىڭ قالالىق فيليالىنا ءار ماسەلەنى باقىلاۋعا الىپ، وڭ شەشىلۋىنە ىقپال ەتۋدى تاپسىردى.

ساپار بارىسىندا پارتيا توراعاسىنىڭ ءبىرىنشى ورىنباسارى پارتيانىڭ شىمكەنت قالالىق فيليالىنىڭ قىزمەتكەرلەرىمەن جانە اۋماقتىق پارتيا فيليالدارى توراعالارىنىڭ ءبىرىنشى ورىنباسارلارىمەن كەزدەستى. ەركىن فورماتتا وتكەن باسقوسۋدا تاراپتار قالالىق فيليالدىڭ الداعى باعىت-باعدارىن پىسىقتادى.

سوڭعى جاڭالىقتار