19 قىركۇيەك, 12:16 416 0 نۇر وتان انار لەپەسوۆا

ارداگەرلەر ءدان ريزا

«باتامەن ەل كوگەرەر» دەگەن حالىق دانالىعىن باسشىلىققا الاتىن «Nur Otan» پارتياسى «ارداگەرلەردى ارداقتايىق!» جوباسى اياسىندا قارتتارعا جىل بويى قامقورلىق كورسەتەدى. قاريالاردى تۋعان كۇندەرىمەن، ايتۋلى مەرەكەلەرمەن قۇتتىقتاپ، سىي-سىياپات جاساۋ، ءۇي شارۋاسىنا كومەكتەسۋ سەكىلدى يگى شارالاردى قولعا العان پارتيالىقتاردىڭ قامقورلىعىنا ارداگەرلەر ءدان ريزا.

17 جاسىندا قان مايدانعا اتتانعان يۆان حيتسەنكو قۇرلىقتىق اسكەر ساپىندا بولىپ، ودەسسا، قىرىم، ستالينگراد قالالارىن قورعادى. پولشا، ۆارشاۆادان پوزناني قالالارىن جاياۋ ءجۇرىپ وتكەن. جەڭىستى كالينينگراد وبلىسىنىڭ پيللاۋ قالاسىندا قارسى العان. الدىڭعى شەپتە ەرلىك كورسەتكەن مايدانگەر سوعىستان كەيىنگى جىلدارى ۇزاق ۋاقىت بويى كولىك جۇرگىزۋشىسى بولىپ قىزمەت ەتكەن. توقساننىڭ ۇشەۋىنە كەلگەن قاريانى پارتيالىقتار ارنايى قۇتتىقتادى.

– ەكى جىل بويى مايدان شەبىندە بولدىم. كوپتى كوردىم. وتانىمىزعا بوستاندىق سىيلاۋدا ءوزىمىزدى ايامادىق. كەيىنگى بۋىن وكىلدەرىندە تاپ سونداي ەلجاندىلىق، پاتريوتتىق قاسيەتتەرى بولسا ەكەن دەيمىن، – دەيدى مايدانگەر يۆان حيتسەنكو.

ال 94 جاستاعى قاسىمحان اقساقال سوعىس باستالعاندا نەبارى 17-دە بولعان. ۋچيليششەدەن كەيىن تانككە قارسى قارۋ الىپ، مايدان شەبىنە اتتاندى. ارداگەر سوعىستان كەيىن قارۋدى قالامعا ايىرباستاپ، «قوستاناي تاڭى» گازەتىندە مەنشىكتى ءتىلشى بولىپ جەمىستى ەڭبەك ەتكەن. بۇكىل سانالى عۇمىرىندا ۇرپاق تاربيەسىنە ارالاسقان ۇلاعاتتى ۇستاز-تالىمگەر، حالقىمىزدىڭ عاجايىپ ونەرى – ايتىستى، جىراۋ-تەرمەشىلىكتى ناسيحاتتاۋعا ارنادى. تۋعان كۇن يەسىن پارتيالىقتار ارنايى قۇتتىقتاي كەلىپتى.

– ءار اتاۋلى كۇندەرى ارداگەرلەرىمىزدى قۇتتىقتاپ، قولىمىزدان كەلگەنشە كومەك بەرىپ، جاعدايلارى قيىندارعا قول ۇشىن سوزۋعا تىرىسامىز. ارداگەرلەرىمىزدى قامقورلىققا الىپ، قارت مايدانگەرلەرمەن قاتار، جالعىزباستى تىل ەڭبەككەرلەرىنە دە كومەك كورسەتۋگە اتسالىسىپ كەلەمىز، – دەيدى «Nur Otan» پارتياسى قوستاناي وبلىستىق فيليالى توراعاسىنىڭ ورىنباسارى المات دوسمۇحامەدوۆ.

پارتيالىقتار ارداگەرلەردى تۋعان كۇنىمەن قۇتتىقتاپ، كومەك كورسەتۋدى داستۇرگە اينالدىرعان. «مۇنىڭ ءبارى جەڭىستى جاقىنداتقان جاۋىنگەرلەرگە كورسەتىلگەن قۇرمەت، ەرلىككە تاعزىم» دەيدى پارتيا بەلسەندىلەرى.

سوڭعى جاڭالىقتار