19 قىركۇيەك, 12:15 421 0 نۇر وتان انار لەپەسوۆا

ارىستىڭ اجارى كىردى

جۇدىرىقتاي جۇمىلعان ەل بىرلىگىنىڭ ارقاسىندا ارىس تۇرعىندارى قالىپتى تىرشىلىكتەرىن جالعاستىرۋدا. جاڭا كەيىپكە ەنگەن قالانىڭ بولاشاعى باياندى بولارىنا سەنىم نىعايا ءتۇستى. 

«Nur Otan» پارتياسى تۇركىستان وبلىستىق فيليالى ارىستىڭ بۇگىنگى تىنىس-تىرشىلىگىمەن تانىسۋ ماقساتىندا ارنايى اقپاراتتىق تۋر ۇيىمداستىردى. توتەنشە جاعدايدان كەيىنگى 81 كۇندە قالا تولىقتاي وزگەرىپ، جاسارا، جايناي تۇسكەن. جارىلىستان زاقىم كەلگەن عيماراتتار تولىق جوندەۋدەن وتكەن.

ي.جۋربا اتىنداعى ورتا مەكتەپ – توتەنشە جاعداي كەزىندە قاتتى زارداپ شەككەن الەۋمەتتىك نىسانداردىڭ ءبىرى. قازىرگى تاڭدا اتالعان عيمارات كۇردەلى جوندەۋدەن ءوتىپ، وقۋشىلارعا ءبىلىم بەرۋدە. جاڭا زامانعا ساي بەزەندىرىلگەن نىسانعا دەمەۋشىلەر روبوتوتەحنيكا كابينەتىن سىيعا تارتقان. ۇرپاق تاربيەسىنە بەيجاي قارامايتىن مەكتەپ ديرەكتورى ءابدىساتتار ءجۇنىسوۆ مەكتەپتە اباي بۇرىشىن اشقان. ءبىلىم ورداسىنىڭ سنارياد ءتۇسىپ، زاقىمدانعان ستاديونى دا بۇگىندە جاڭا كەيىپكە ەندى. سپورتتىق قۇرال-جابدىقپەن قامتاماسىز ەتىلگەن ستاديون مەن سپورت زالى دا وقۋشىلارعا ەرەكشە تارتۋ بولدى. مۇنان بولەك، بيولوگيا-حيميا، ينفورماتيكا، فيزيكا جانە ت.ب. ارنايى كابينەتتەرى بار ءۇش قاباتتى عيماراتتىڭ ءىشى ەرەكشە.

113 بالانى امان الىپ قالعان گاۋھار ءۋاليحانوۆا باسقاراتىن «التىن تۇمار» بالاباقشاسى دا كۇردەلى جوندەۋدەن ءوتىپ، 1-6 جاس ارالىعىنداعى بوبەكتەردى تاربيەلەۋدە. بۇل نىساننىڭ دا ءىشى-سىرتىن جوندەگەن «سامۇرىق قازىنا» ءال-اۋقات قورى كىشكەنتاي سابيلەردىڭ ويىن الاڭىنا ساپالى قۇرال-جابدىق سىيلاعان.

– باستى ماقساتىمىز – سابيلەردى قۇتقارۋ ەدى. ءوزىمدى ەرلىك جاسادىم دەپ ويلامايمىن. ۇجىمداعى 27 قىزمەتكەر ءوز وتباسىن ەمەس، بالا-باقشاداعى سابيلەردىڭ اماندىعىن ويلادى، – دەيدى پرەزيدەنت قولىنان «ەرلىگى ءۇشىن» مەدالىن العان بالاباقشا مەڭگەرۋشىسى.

ايتا كەتەيىك، ارىستا 66 الەۋمەتتىك نىسان بولسا، سونىڭ 62-ءى جوندەۋدەن ءوتىپ، 4 نىسان تولىقتاي قايتا سالىنعان.

سوڭعى جاڭالىقتار