18 قىركۇيەك, 16:09 451 0 ەكونوميكا انار لەپەسوۆا

وتكەن جىلدىڭ سالىعىن ۋاقتىلى تولەمەگەندەردى نە كۇتىپ تۇر؟

الەۋمەتتىك جەلىلەردە وتكەن جىلدىڭ سالىعىن تولەمەگەندەرگە 20 مىڭ تەڭگە ايىپپۇل سالىنادى دەگەن حابار جەلدەي ەستى. وسى اقپاراتقا قاتىستى مەملەكەتتىك كىرىس كوميتەتى تۇسىنىكتەمە بەردى.

سوڭعى كەزدەرى الەۋمەتتىك جەلىلەر مەن مەسسەندجەرلەر ارقىلى وتكەن سالىقتىق كەزەڭدەر ءۇشىن بەرەشەگى بار ازاماتتار بورىشىن وسى جىلدىڭ 1 قازانىنا دەيىن وتەمەسە، ولارعا 8 اەك (شامامەن 20 000 تەڭگە) كولەمىندە ايىپپۇل سالىناتىنى تۋرالى حابارلاماعا تاراعان.

الايدا قارجى مينيسترلىگىنىڭ مەملەكەتتىك كىرىستەر كوميتەتى بۇل اقپاراتتى جوققا شىعاردى.

"جەكە تۇلعالار بيۋدجەتكە جەر جانە مۇلىك سالىقتارىن وتكەن جىل ءۇشىن وسى جىلدىڭ 1 قازانىنا دەيىن تولەۋى ءتيىس. كولىك سالىعى وسى جىل ءۇشىن 31 جەلتوقسانعا دەيىن وتەلەدى.

قولدانىستاعى قر سالىق زاڭناماسىندا ايىپپۇل ەسەپتەۋ شارالارى كورسەتىلمەگەن. تەك سالىقتى ۋاقىتىلى تولەمەگەن جاعدايدا وتكىزىلگەن ءار كۇنگە ءوسىمپۇل ەسەپتەلەدى", – دەلىنگەن مەملەكەتتىك كىرىستەر كوميتەتى ءباسپاسوز قىزمەتىنىڭ حابارلاماسىندا.

سونىمەن قاتار، ۆەدومستۆو وسى جىلدىڭ سوڭىنا دەيىن جەكە تۇلعالارعا ارنالعان سالىقتىق راقىمشىلىق پروتسەسى ءجۇرىپ جاتقانىن اتاپ ءوتتى.

ونىڭ ەرەجەسىنە سايكەس، جەكە تۇلعا بەرەشەگىنىڭ نەگىزگى سوماسىن وتەگەن جاعدايدا ءوسىمپۇل اۆتوماتتى تۇردە جويىلادى.

سوڭعى جاڭالىقتار