18 قىركۇيەك, 14:35 389 0 رۋحانيات انار لەپەسوۆا

ولجاس سۇلەيمەنوۆ ەلباسىن مەدالمەن ماراپاتتادى

قازاق ۇلتتىق ونەر ۋنيۆەرسيتەتىندە «نەۆادا-سەمەي» انتيادرولىق قوزعالىسىنىڭ 30 جىلدىعىنا ارنالعان عىلىمي-پراكتيكالىق كونفەرەنتسيا ءوتتى. كونفەرەنتسيادا «نەۆادا-سەمەي» انتيادرولىق قوزعالىسىنىڭ كوشباسشىسى ولجاس سۇلەيمەنوۆ بۇگىنگى قۇتتىقتاۋى مەن يادرولىق سىناقتى توقتاتۋعا قوسقان ەڭبەگىنە ريزاشىلىق رەتىندە ەلباسى ن.نازارباەۆتى قوزعالىستىڭ 30 جىلدىعىنا ارناپ شىعارىلعان مەرەيتويلىق مەدالىمەن ماراپاتتادى.

«كونفەرەنتسيانىڭ اشىلۋىندا ءسوز العان مادەنيەت جانە سپورت ءمينيسترى اقتوتى رايىمقۇلوۆا جينالعاندارعا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ قۇتتىقتاۋ حاتىن وقىپ بەردى. اقىن، «نەۆادا-سەمەي» انتيادرولىق قوزعالىسىنىڭ كوشباسشىسى ولجاس سۇلەيمەنوۆ بۇگىنگى قۇتتىقتاۋى مەن يادرولىق سىناقتى توقتاتۋعا قوسقان ەڭبەگىنە ريزاشىلىق رەتىندە ەلباسى ن.نازارباەۆتى قوزعالىستىڭ 30 جىلدىعىنا ارناپ شىعارىلعان مەرەيتويلىق مەدالىمەن ماراپاتتادى. سونداي-اق مەرەيتويلىق مەدال مادەنيەت جانە سپورت مينيسترىنە دە تاپسىرىلدى»، - دەلىنگەن قر مادەنيەت جانە سپورت مينيسترلىگى تاراتقان اقپاراتتا.

جيىن بارىسىندا اقتوتى رايىمقۇلوۆا بۇگىنگى شارا – قوزعالىستىڭ سالتاناتتى مەرەيتويى عانا ەمەس، قازاقستاندىق قوعام مەن بارشا ادامزاتتىڭ بەيبىتشىلىك پەن تازا عالامشار ءۇشىن كۇرەسىنىڭ ماڭىزدى كەزەڭى ەكەندىگىن باسا ايتقان. «نەۆادا-سەمەي» حالىقارالىق انتيادرولىق قوزعالىسى بەلسەندىلەرىنىڭ، قوعامنىڭ ارقاسىندا 1989 جىلعا جوسپارلانعان 18 يادرولىق سىناقتىڭ 11-ءى جۇزەگە اسپادى. وسىنداي كۇش-جىگەر مەن باتىل قادامدارىڭىزبەن سىزدەر عالامدىق سانانى وزگەرتۋگە ۇلەس قوسىپ، بەيبىتسۇيگىشتىك يدەيانىڭ ماڭىزدىلىعىن ءىس جۇزىندە دالەلدەدىڭىزدەر»، - دەدى مينيستر.

كونفەرەنتسيا جۇمىسىنا جاپونيانىڭ قازاقستانداعى ەلشىسى تاتسۋحيكو كاساي، حالىقارالىق قوزعالىس مۇشەلەرى، نوبەل سىيلىعىنىڭ لاۋرەاتتارى قاتىستى.

ايتا كەتەرلىگى، قازاق جەرىندە 1949 جىلدان باستاپ 40 جىلعا جۋىق ۋاقىت يادرولىق سىناق جۇرگىزىلدى. 450-دەي سىناقتىڭ سالدارىنان رادياتسيالىق ساۋلەنىڭ كۇشتى دوزاسىن العان پوليگون ماڭىنداعى اۋىل تۇرعىندارى ونىڭ زاردابىن ءالى كۇنگە تارتىپ كەلەدى. و.سۇلەيمەنوۆ 1989 جىلى يادرولىق سىناققا قارسى «نەۆادا-سەمەي» قوزعالىسىن قۇرۋ تۋرالى ۇندەۋ تاستادى. اراعا 2 جىل سالىپ، پرەزيدەنت ن. نازارباەۆتىڭ جارلىعىمەن پوليگون تولىقتاي جابىلدى. كەيىننەن 29 تامىز – حالىقارالىق يادرولىق قارۋعا قارسى كۇرەس كۇنى بولىپ بەكىتىلدى.

 

سوڭعى جاڭالىقتار