18 قىركۇيەك, 10:34 483 0 جاڭالىقتار انار لەپەسوۆا

اۆتوبۋس جۇرگىزۋشىسىنىڭ اناسى: "ۇلىمنىڭ جانى كوپىردىڭ جولىندا قۇربان"

شامالعان ستانتسياسىنداعى كوپىر ماسەلەسى ەكى كۇننەن بەرى بۇكىل اقپارات قۇرالدارىندا ايتىلىپ، الەۋمەتتىك جەلىدە قىزۋ تالقىلانعان سوڭ بولار، كەشە وڭىرگە ءبىر توپ شەنەۋنىك كەلدى. ايتپەسە، تۇرعىنداردىڭ «كوپىر كەرەك» دەپ ايتىپ كەلە جاتقانىنا ون جىلدان اسقان. شىمادى تاۋسىلعان شامالعاندىقتار بۇل جولى ايقايعا باسىپ، ۋادەنىڭ تەز ارادا ورىندالۋىن قاتتى تالاپ ەتتى، دەپ حابارلايدى ەۆرازيا ارناسى.

جيىرما جىلدان بەرى بىردە ءبىر اكىممەن كەزدەسۋ وتكىزە الماعان جۇرت سوزدەرىن تاڭقالىسپەن باستادى. ويتكەنى، اشەيىندە شامشىراقپەن ىزدەسە تاپپايتىن شەنەۋنىكتەر تايلى-تۇياعى قالماي تۇگەل كەلگەن جيىنعا. شامالعان اۋىلىنىڭ تۇرعىندارىنا قاراعاندا شەندى-شەكپەندى كوپ. اشۋلى حالىق ەڭ اۋەلى وسىعان دەيىن سالىنباعان كوپىردىڭ جىرىن ايتتى. بارىنە ەكى كۇندە ءبىر اۋىساتىن اكىمدەر كىنالى دەيدى.

“مەن مىنا جاۋلىقتى اۋىستىرعانداي اۋىستىرادى اكىمدى. نەگە قويمايدى بەس جىلعا؟ بەس جىل وتىرعىزسىن. سوسىن تالاپ ەتسىن. ءسىزدى سولاي وتىرعىزسىن. ءبىزدىڭ تىلەگىمىز سول”، - دەيدى تۇرعىندار.

كۇنىنە ءجۇز شاقتى پويىز، ون مىڭنان استام كولىك وتەتىن وتكەل تالاي ادامنىڭ ءومىرىن قىرشىننان قيعان. نە جولى ءتۇزۋ ەمەس، نە شلاگباۋمى دۇرىس ىستەمەيدى. باعدارشام اتىمەن جوق. تروتۋار ارمان. شەنەۋنىكتەردىڭ وسىعان دەيىن بيۋدجەتكە اۋىر سالماق دەگەن سىلتاۋىنان ابدەن قاجىعان جۇرت، كوپىردىڭ قۇرىلىسىن تەزدەتۋىن تالاپ ەتتى. ءتىپتى، تاعى ءبىر ادامنىڭ ءولىمىن كۇتىپ جۇرسىزدەر مە دەپ سۇراقتى توتەسىنەن قويدى.

“كوپىردىڭ اقشاسى تولەۋلى، سحەماسى سالۋلى عوي. سونى ءبىر جىلعا قالدىرماي، تەزدەتۋگە بولماي ما؟ يلي تاعى بىرەۋدىڭ ولگەنىن كۇتىپ وتىرامىز با؟”، - دەيدى ولار.

ەكى جۇزدەن استام تۇرعىن كۇن استىندا الماتى وبلىسىنىڭ اكىمى اماندىق باتالوۆتى تاپجىلماي كۇتتى. جەرگىلىكتى شەنەۋنىكتەردىڭ ءسوزىن پىسقىرمادى دا. بىراق وبلىس باسشىسى نوكەرلەرىنەن تەك سالەمدەمە جولداپ، ەلدى جۇباتتى. وسىعان دەيىن بولىنبەگەن قاراجاتتىڭ ماسەلەسى ەكى كۇندە شەشىلىپ، ءبارىن قاتىرامىز دەدى بىرىنەن سوڭ ءبىرى سويلەگەن شەنەۋنىكتەر.

“جۇرگىنشىلەر جولاعىن دا جاسايمىز. كوپىر دە جاسايمىز. الماتى وبلىسىنىڭ اكىمى اماندىق باتالوۆ سالەم ايتتى. سوندىقتان مەن سول كىسىنىڭ اتىنان كەلىپ وتىرمىن. كوپىردىڭ جوباسى بولۋ كەرەك. ەكسپەرتيزادان ءوتۋ كەرەك. قازىر ءبىرىنشى قاراجات جوباعا بولىنەدى. ودان كەيىن ەكسپەرتيزاعا بولىنسە سونىڭ ءوزى 2-3 ايدا بىتىرسەك، ول ۇلكەن جۇمىس”، - دەدى الماتى وبلىسى اكىمىنىڭ ورىنباسارى باعدات ءمانىزاروۆ.

ال، ءتورت بالاسى ەڭىرەپ، ايەلى جەسىر قالعان جۇرگىزۋشىنىڭ شەشەسى ۇلىنىڭ ەرلىكپەن ولگەنىنە سەنەدى. 67 جولاۋشى تۇگەل سىرتقا شىقپاي، ءوزى اۆتوبۋستىڭ ورىندىعىندا قوزعالماعان بالاسىنىڭ ارەكەتىن، كەمەسىن تاستاماعان كاپيتانعا تەڭەدى. تەك ەندى، قارا جەرگە كەشە كومىلگەن پەرزەنتىن ەشكىم كىنالاماسا دەيدى.

«مەنىڭ ۇلىمنىڭ جانى كوپىرگە قۇربان، قايتا ەشكىم ولمەسە سول جولدا» دەپ جىلايدى انا جۇرەگى.

«مەنىڭ بالامدى ەشكىم كىنالاماسىنشى. ول ءوزىنىڭ جۇمىسىن اتقاردى. ءوزىن بەردى عوي سول ادامدار ءۇشىن. قۇربان بولدى»، – دەيدى مارقۇم بولعان جۇرگىزۋشىنىڭ اناسى سيميزار ساراكوۆا.

ال، ەكى بالاسىمەن بىردەي رەانيماتسيادا جاتقان كەلىنشەكتىڭ جاعدايى ءالى وڭالمادى. دارىگەرلەر ەس-ءتۇسسىز جاتقان كىشكەنتاي بۇلدىرشىندەردىڭ ءحالى ءالى دە اۋىر ەكەنىن ايتادى.

سوڭعى جاڭالىقتار