17 قىركۇيەك, 10:48 481 0 ادەبيەت انار لەپەسوۆا

ابايدىڭ جيەنشارى ۇلى اقىن ۇرپاقتارىنىڭ بۇگىنگى ءومىرى جايلى ايتتى

ۇلى ابايدىڭ جيەنشارى ءلايلا بايماعامبەتوۆا 10 جىلدان بەرى نۇر-سۇلتان قالاسىندا تۇرادى. Sputnik قازاقستان پورتالىنا بەرگەن سۇحباتىندا ءلايلا مۇحلەسقىزى حاكىم ابايدىڭ ۇرپاقتارى تۋرالى ايتىپ بەردى.

ءلايلا بايماعامبەتوۆا ابايدىڭ بايبىشەسى دىلدادەن سۇيگەن تۇڭعىش بالاسى اقىلبايدان تارايدى. اقىنعا جيەنشار بولىپ كەلەدى. سونداي-اق ول اباي قۇنانبايۇلىنىڭ عانا ەمەس، ەرتەكشى بايماعامبەتتىڭ دە ۇرپاعى. ارعى اتاسى بايماعامبەت – ابايدىڭ سەنىمدى سەرىگى، ارقا سۇيەر دوسى بولعان.

"اقىلبايدان الىمقۇل، الىمقۇلدان – مەنىڭ انام قاۋاش. شەشەم 1910 جىلى ومىرگە كەلىپ، 1988 جىلى دۇنيەدەن ءوتتى. ەندى ۇرپاق جالعايتىن ۇل بالاسى عوي. انامنىڭ باعفۋر دەگەن باۋىرى بولعان. سول باعفۋردان ايدار، ايداردىڭ ۇلى دانيار. ول قازىر وتباسىمەن الماتىدا تۇرادى. ءۇش قىزى بار، ايەلى ورىس. سوندىقتان ابايدىڭ ۇرپاعى ازىرگە دانيارمەن توقتاپ تۇر", - دەدى ءلايلا مۇحلەسقىزى.

ءلايلا بايماعامبەتوۆا ءوزى – ورىس ءتىلى ءپانىنىڭ مۇعالىمى. ۇزاق جىلدار وقۋ-اعارتۋ سالاسىندا ەڭبەك ەتكەن. كەيىن سەمەيدەگى اباي مۋزەيىنە اۋىسقان. استاناعا قونىس اۋدارعانىنا ون جىلدىڭ ءجۇزى بولىپتى. جارى وسكەنبايمەن بىرگە ءبىر ۇل، ەكى قىز تاربيەلەپ وسىرگەن. قازىر زەينەتتە.

اقىننىڭ ۇرپاقتارى تاعدىردىڭ تالاي تاۋقىمەتىن تارتقان. "بايدىڭ بالاسى" دەگەن جەلەۋمەن قۋعىن-سۇرگىنگە ۇشىراعان. اقىننىڭ شوبەرەلەرىنىڭ دەنى سوعىسقا اتتانىپ قازا تاپسا، ەندى ءبىرى اشارشىلىق جىلدارىندا كوز جۇمىپتى.

"قولىمىزدا اباي اتامىزدىڭ كوزى تىرىسىندە ۇستاعان بىردە ءبىر دۇنيەسى قالعان جوق. ءبارى دە تاركىلەندى. اباي ۇرپاقتارىنىڭ تاعدىرى وتە اۋىر بولدى. ونىڭ ۇرپاقتارى نەگە نەكەن-ساياق؟ سەبەبى سول زاماندا قۇنانبايدىڭ ۇرپاقتارىنىڭ ىزىنە ءتۇستى. ابايدىڭ تۇراعۇل دەگەن ۇلى ەكى رەت اباقتىعا جابىلدى. اقىرى الماتىنى پانالاۋعا ءماجبۇر بولدى. ول جەردە مۇحتار اۋەزوۆپەن جولىعىپ، جازۋشىنىڭ تۇرتكى بولۋىمەن اكەسى جايلى ەستەلىك كىتاپ جازدى", - دەپ ەسكە الدى بايماعامبەتوۆا.

سوڭعى رەت اقىننىڭ ۇرپاقتارى ابايدىڭ 160 جىلدىق مەرەيتويىندا باس قوسقان.

"باسقا قالادا تۇراتىندىقتان، كوپ ارالاسپايمىز. تەك ماعاۋيانىڭ ۇرپاقتارى يششاعى جانە عازەل تاتەلەرمەن ۇنەمى بايلانىستا بولدىم", - دەيدى ءلايلا بايماعامبەتوۆا.

سوڭعى جاڭالىقتار