16 قىركۇيەك, 17:22 415 0 الەۋمەت انار لەپەسوۆا

شامالعانداعى شۋ: كوپىر قاشان سالىنادى؟

شامالعاندىقتاردىڭ نارازىلىعىنان كەيىن قازاقستاننىڭ يندۋستريا جانە ينفراقۇرىلىمدىق دامۋ ءمينيسترى رومان سكليار الماتى-شامالعان وتكەلىنە جاقىن جەردە كوپىر سالىناتىنىن مالىمدەدى.

ورتالىق كوممۋنيكاتسيالار قىزمەتىنىڭ بريفينگىندە رومان سكليار كوپىردىڭ جوبالانۋى مەن قۇرىلىسىن كەلەسى جىلى باستاۋ جوسپارلانىپ وتىرعانىن ايتتى.«الايدا ءدال وسى جەردە، ءدال سول وتكەلدە سالىنبايدى. ودان ءسال قاشىقتاۋ جەردە سالىناتىن بولادى»، - دەيدى مينيستر.

يندۋستريا ءمينيسترى قايعىلى جاعداي ورىن العان جەردە كوپىر سالۋ مۇمكىن ەمەستىگىن ايتتى. سەبەبى وندا تۇرعىن ۇيلەر كوپ، كوپىر سالعان جاعدايدا ولاردى ءسۇرۋ كەرەك بولادى.

«ءدال وسى جەردە كوپىر سالۋ ءۇشىن شامامەن 70 جەكەمەنشىك ءۇي مەن ەكى جانارماي بەكەتىن ءسۇرۋ كەرەك بولادى. ول بيۋدجەتتە ۇلكەن شىعىنعا الىپ كەلەدى. سوندىقتان وتكەل قوسىمشا قۇرالدارمەن جابدىقتالدى. تەك كۇزەت دابىلداتپاسى ەمەس، سونىمەن قاتار كولىكتەردىڭ وتۋىنە جول بەرمەيتىن قوسىمشا بوگەۋلەر ورناتىلدى»، - دەيدى سكليار.

ءوز سوزىندە رومان سكليار ازىرگە كوپىردىڭ ناقتى قاي جەردەن سالىناتىنى انىقتالماعانىن ايتتى. ال كوپىردىڭ جوبالانۋىنا 3-4 اي قاجەت كورىنەدى.

ايتا كەتەيىك، كەشە اقسەڭگىر-شامالعان وتكەلىندە جانتۇرشىگەرلىك جول اپاتى ورىن الدى. اۆتوبۋس جۇرگىزۋشىسى سيگنالدارعا قاراماستان تەمىرجولعا شىعىپ كەتكەن. سالدارىنان ۇلكەن جىلدامدىقپەن كەلە جاتقان پويىز اۆتوبۋستى قاعىپ كەتتى. وقيعا ورنىندا ءبىر ادام قازا تاۋىپ، توعىز ادام جاراقات الدى.

سوڭعى جاڭالىقتار