16 قىركۇيەك, 10:53 443 0 جاڭالىقتار انار لەپەسوۆا

شامالعانداعى اپات: اۆتوبۋس جولاۋشىلارى قالاي امان قالعاندارىن ايتىپ بەردى

شامالعان ستاتتسياسىنداعى اپات كەزىندە اۆتوبۋس ىشىندە بولعان جولاۋشىلار قالاي امان قالعاندارىن ايتىپ بەردى، دەپ حابارلايدى «الماتى» تەلەارناسى.

"مەن اۆتوبۋستىڭ ارتىندا وتىردىم. سالون لىق تولا بولدى. پويىز جاقىنداپ قالدى، ال ءبىز ءالى ىشتە وتىرمىز. ءبارى ەسىكتى اش، ەسىكتى اش دەپ ايقايلادى", - دەيدى اۆتوبۋس جولاۋشىسى.

ونىڭ سوزىنە قاراعاندا، پويىز اۆتوبۋسقا جاقىنداي باستاعان كەزدە جۇرگىزۋشىنىڭ ءوزى ۇرەيلەنىپ، ابدىراپ قالعان. ول ارتقى ەسىكتى اشقان، جولاۋشىلار سىرتقا شىعىپ ۇلگەرگەن، ال جۇرگىزۋشىنىڭ ءوزى شىعا الماعان.

جولاۋشىلاردىڭ ايتۋىنشا، اپاتقا ەر ادام كىنالى ەمەس.

"جۇرگىزۋشى كەلگەندە الدى مەن ارتىندا كولىك كەپتەلىپ تۇردى. ورتاسىندا قالدى، شىعاتىن جول جوق", - دەيدى ولار.

وقيعا كۋاگەرلەرى سونداي-اق تەمىرجول وتكەلىندە مۇنداي كەپتەلىستەر كۇن سايىن بولاتىنىن حابارلادى.

ىشكى ىستەر مينيسترلىگى ءباسپاسوز قىزمەتىنىڭ حابارلاۋىنشا، قىلمىستىق كودەكستىڭ 344-بابى 2-تارماعى "تەمىرجول، اۋە، تەڭىز نەمەسە وزەن كولىگىمەن ءجۇرۋ نەمەسە پايدالانۋ قاۋىپسىزدىگى ەرەجەلەرىن بۇزۋ" بويىنشا تەرگەۋ جۇرگىزىلىپ جاتىر.

بۇل باپ بويىنشا كىنالى جەتى جىلعا دەيىن باس بوستاندىعىنان ايىرىلادى.

ەستەرىڭىزگە سالايىق، اپات كەشە، 15 قىركۇيەكتە ساعات 19.08-دە الماتى-شامالعان ارالىعىنداعى رەتتەلەتىن تەمىرجول وتكەلىندە بولعان. № 43 الماتى-قوستاناي پويىزى "سەترا" جولاۋشىلار اۆتوبۋسىمەن سوقتىعىستى.

اپات سالدارىنان اۆتوبۋس جۇرگىزۋشىسى وقيعا ورنىندا كوز جۇمدى، اۆتوبۋستىڭ ءۇش جولاۋشىسى اۋرۋحانادا اۋىر حالدە جاتىر.

 

سوڭعى جاڭالىقتار