13 قىركۇيەك, 15:13 539 0 ساياسات انار لەپەسوۆا

ەلباسى "استانا" قارجى ورتالىعىنىڭ جۇمىسىن باعالادى

ەلباسى نۇرسۇلتان نازارباەۆقا «ەكسپو-2017» كورمەسىنىڭ مۇرالارى جانە احقو قۇقىقتىق جۇيەسىن دامىتۋ بويىنشا قابىلدانعان شارالار تۋرالى باياندالدى.

سونىمەن قاتار، ەلباسىنا احقو سوتى، اعىلشىن قۇقىعى اكادەمياسى، حالىقارالىق تورەلىك ورتالىعى جانە احقو احۋالدىق ورتالىعىنىڭ قىزمەتى تۋرالى مالىمەت بەرىلدى.

سونداي-اق، قازاقستاننىڭ تۇڭعىش پرەزيدەنتى قارجى ورتالىعى بيرجاسىنىڭ نەگىزگى اكتسيونەرلەرى جانە قاتىسۋشىلارىمەن كەزدەستى.

سپيكەرلەردىڭ بايانداماسىن تىڭداعان سوڭ نۇرسۇلتان نازارباەۆ ەل باسشىلىعىنىڭ احقو قىزمەتىن تولىق قولدايتىندىعىن اتاپ ءوتتى.

– جەكەشەلەندىرۋ جوسپارىن احقو بيرجاسى ارقىلى ىسكە اسىرۋدى جالعاستىرۋ قاجەت. ارينە، الەمدىك نارىق احۋالىن ەسكەرگەن ءجون. سونىمەن قاتار، الەمنىڭ حالىقارالىق قارجى ورتالىقتارىنىڭ احقو-عا دەگەن سەنىمىن كۇشەيتۋ كەرەك. ۇلتتىق ەكونوميكاعا تارتىلاتىن قارجى رەسۋرستارىنىڭ مولشەرى وسىعان بايلانىستى، ­- دەدى ەلباسى.

قازاقستاننىڭ تۇڭعىش پرەزيدەنتى ەكونوميكالىق ءوسىمنىڭ جوعارى قارقىنىن قامتاماسىز ەتۋدىڭ جانە ەلدىڭ ستراتەگيالىق دامۋ جوسپارلارىنا قول جەتكىزۋدىڭ ماڭىزدىلىعىن اتاپ ءوتتى.

– الدا ورتالىقتى اۋقىمدى جۇمىس كۇتىپ تۇر. بارلىق سەرىكتەستەرمەن قالىپتاسقان ءىس-قيمىلدى جالعاستىرۋ ماڭىزدى. مەن احقو جۇمىسىن ۇدايى قولدايتىن بولامىن، - دەدى نۇرسۇلتان نازارباەۆ.

سوڭعى جاڭالىقتار