13 قىركۇيەك, 12:07 516 0 ايماق دينارا مىڭجاسارقىزى

تۇركىستان جاسىل جەلەكتى قالاعا اينالادى

تۇركىستان وبلىسىندا «قازاقستان رەسپۋبليكاسىن يندۋس­تريا­­لىق-يننوۆاتسيالىق دامىتۋدىڭ 2015-2019 جىلدارعا ار­نالعان مەمل­ەكەتتىك باعدارلاماسى» ءساتتى ىسكە اسىرىلۋدا. باعدارلامادا «كەلەشەكتە يندۋستريالاندىرۋدىڭ كەيىنگى كە­زەڭدەرىندە ءتيىمدى قازاق­ستاندىق وندىرۋشىلەردىڭ وڭىرلىك نا­رىقتارعا جاپپاي شى­عۋىنا جانە ورنىعۋىنا قولداۋ كورسەتىلەدى.

بيزنەس پەن مەملەكەتتىڭ كۇش­-ءجى­­گەرى قازاقستاننىڭ يندۋس­تريا­لىق-تەحنو­لو­­گيا­لىق كوشباسشى ەل­دەر­دىڭ قا­تا­رىنا كىرۋى قامتاماسىز ەتى­لە­تىن ءبىر­نەشە با­عىت­تا مامان­دا­نۋىن قالىپ­تاس­تىرۋ مەن بە­كىتۋگە، سون­داي-اق، سۇ­رانىسقا يە جاڭا تەح­نولو­گيا­لاردى شوعىرلاندىرۋعا ءمۇم­كىندىك بەرەتىن قولايلى يننوۆاتسيالىق ور­تانى قا­لىپ­تاستىرۋدى اياقتاۋعا جۇ­مىل­دى­رىلادى.

تۇركىستان وبلىسى كەنتاۋ قالا­سىن­دا شارۋالاردىڭ باسى قوسىلعان اۋقىمدى شارا ءوتتى. وبلىس اكىمى ءومىر­زاق شوكەەۆتىڭ باستاماسىمەن جۇزە­گە اسقان سەمينار-كەڭەستە 1200 باس­قا ارنالعان تاۋارلى ءسۇت فەر­ما­سىنىڭ كىرپىشى قالاندى. اتالمىش تسەح كەنتاۋ قالاسى شاعا اۋىلىندا 2020 جىلى ىسكە اسادى. جوبانىڭ قۇنى – 3 652,6 ملن تەڭگە.  اشىلاتىن تۇراقتى جۇمىس ورنى 100 ادامدى قۇراماق. جىلىنا 4500 توننا ەكسترا كلاستى ءسۇت ءوندىرۋ جوسپار­لا­نۋدا. جيىندا ءار اۋدان-قالادان اكەلىن­گەن ءونىم تۇرلەرىنەن كور­مە بولىپ، ازىق-تۇلىك بەلدەۋى شەڭ­بەرىندە، سۋ نىساندارى بويىنشا ىسكە اسىرىلىپ جاتقان جوبالار مەن اۋىل شارۋاشىلىعى سالاسى كورسەت­كىش­تەرى تانىستىرىلدى. سەمينار-كەڭەس­تىڭ اشى­لۋىندا ءسوز العان وبلىس اكىمى ءومىر­­زاق شوكەەۆ: «قر ۇكىمەت تارا­پى­نان بەكىتىلگەن «تۇركىستان وبلىسىنىڭ الەۋ­مەت­تىك-ەكونوميكالىق دامىتۋدىڭ 2024 جىلعا دەيىنگى كەشەندى جوسپارى» اياسىندا وڭىردە اگرارلىق سالاعا باسىمدىق بەرىلىپ وتىرعاندىعىن اتاپ، بۇرىن تۇركىستان جاسىل جەلەكتى قالا بولعان، سونى قالپىنا كەلتىرۋىمىز كەرەك. سونداي-اق، دەمالىس ايماقتاردى كوبەيتىپ سالۋىمىز قاجەت»، – دەدى.

سەمينار-كەڭەستە جاڭا تەحنولو­گيا­لار­دى قولدانىپ، بۇگىندە مول ءونىم ال­عان شارۋالار ءوز تاجىريبەلەرىمەن ءبو­لىس­تى. شا­رۋا­لاردىڭ باسىم كوپشىلىگى سۋ ءما­سەلەسىنىڭ وزەكتى ەكەنىن ايتتى. ءبۇ­گىندە وبلىس اكى­مى­نىڭ قولداۋىمەن كە­شەن­دى جوسپار اياسىندا اعىن سۋ ماسە­لە­لەرىن شەشۋ ماقساتىندا جال­پى قۇنى 29,3 ملرد تەڭگە قۇرايتىن 4 جوبانى جۇزەگە اسىرۋ جۇمىستارى باستالعانى ءمالىم بولدى. جالپى، اتالعان جوبا­لار­دى ىسكە اسىرۋ ءنا­تي­جە­سىندە شارۋالارعا جەتكىزىلەتىن اعىن سۋ كولەمى ۇلعايىپ، سۋارمالى جەر­لەردى سۋ­مەن قامتاماسىز ەتۋ دەڭ­گەيى جاق­سارىلماق. ماسەلەن، تۇركىستان قا­لاسى اۋماعىنان را­ديۋسى 15 شا­قى­رىمدا ازىق-تۇلىك بەل­دەۋى 2 كەزەڭدە ينتەن­سيۆ­تى تەحنولوگيا­لار­دى قولدانا وتى­رىپ جانە عالىمداردىڭ سۇيە­مەلدەۋىمەن جۇزەگە اسىرىلۋدا. بۇگىنگى تاڭدا كەشەندى جوسپار بويىنشا جالپى قۇنى 63 ملرد تەڭگەنى قۇرايتىن 7 ءىرى ين­ۆەس­­تيتسيالىق جوبالاردى ىسكە اسىرۋ بويىنشا جۇمىستار جۇرگىزىلۋدە. ءناتي­جە­سىندە جىل سايىن قوسىمشا 30 ملرد تەڭگە اۋىل شارۋاشىلىعى ءونىمى ءوندىرىلىپ، 2500-دەن استام جاڭا جۇمىس ورىندارى اشىلاتىن بولادى.

بۇدان سوڭ تۇركىستان وبلىسى اكىمى­نىڭ ورىنباسارى مەيىرجان مىرزاليەۆ باس­تا­عان جۇمىس توبى ماقتاارال، جە­تى­ساي جانە شاردارا اۋداندارىنىڭ تۇر­عىندارىمەن كەزدەستى. كاسىپكەرلىك سالاسى، ينۆەستيتسيا تارتۋ، ەكسپورتتى قولداۋ جانە ت.ب. سالالار اياسىندا اتقا­رى­لىپ جاتقان جۇمىستارمەن ءبولىستى. مەيىرجان مىرزاليەۆتىڭ ايتۋىن­شا، تۇركىستان وبلىسى بويىنشا جالپى 138 مىڭنان استام شاعىن جانە ورتا كاسىپ­ورىندار جۇمىس ىستەيدى. «پرەزي­دەنت­تىڭ جولداۋىندا كورسەتىلگەن ءمىن­دەت­تەرگە سايكەس، ميكرو جانە شاعىن بيزنەستى 3 جىلدىق مەرزىمگە سالىقتان بوساتۋ تەتىكتەرى ازىرلەنەدى. سونىمەن قاتار، وب­لىستا «قاراپايىم زاتتار ەكونو­مي­كاسى» باعدارلاماسى بەلسەندى تۇردە جۇزەگە اسىرىلۋدا جانە ءتۇر­كىستان وب­لىسى ناتيجەلەر بويىنشا كوش باستاپ تۇر»، – دەدى وبلىس اكىمىنىڭ ورىنباسارى.

ساپاردىڭ سوڭعى نىسانى شاردارا اۋ­دانى، الاتاۋ باتىر اۋىلىندا ور­نالاسقان «International Company of Cotton» جشس ماقتا وڭدەۋ زاۋىتىنىڭ ينۆەستيتسيالىق جوباسى بولدى. ينۆەس­تيتسيالىق جوبانىڭ سوماسى 5,5 ملرد تەڭگەنى قۇرايدى. ماقتا وڭدەۋ زاۋىتى وسى جىلدىڭ قازان ايىندا ىسكە قوسى­لادى دەپ كۇتىلۋدە. ءبىر جىل ىشىندە زاۋىت ماقتا تالشىعىنا 144 مىڭ توننا ماقتا وڭدەيدى. 47 مىڭ توننا ماقتا تالشىعى ونىمدەرى قىتايعا، سينگاپۋر رەسپۋبليكاسىنا جانە وزبەكستانعا ەكسپورتتالادى.

توعجان تولەگەن

تۇركىستان وبلىسى

 

سوڭعى جاڭالىقتار