13 قىركۇيەك, 10:42 536 0 قاۋىپسىزدىك دينارا مىڭجاسارقىزى

54 جاستاعى ايەلدى يت تالاپ ءولتىردى

تارازدا 54 جاستاعى ايەلدى يت تالاپ ءولتىردى. ونىڭ دەنەسىنىڭ تۇگى قالماي تىستەلگەن. العان جاراقاتىنىڭ اۋىر بولعانى سونشا، دارىگەرلەر ءومىرىن ساقتاپ قالا المادى. كوپ قان جوعالتان ناۋقاس اۋرۋحانادا كوز جۇمدى.

كۇندىزگى ساعات بەس شاماسىندا كوشەنى باسىنا كوتەرگەن ايەلدىڭ جان داۋىسى ەستىلدى. اۋىلداستارى دەرەۋ كومەككە شاقىرعان ۇيگە قاراي تۇرا جۇگىرگەن. سويتسە، اۋلادا ايەل يتكە تالانىپ جاتىپتى. ونى توبەلەس قۇمار ءىرى پيتبۋل تۇقىمداس يت قاپقان.

«انا بۇرىشتا تالاپ جاتتى. سودان سۇيرەپ، مىنا جەرگە الىپ كەلدى. مىنا اراعا الىپ كەلدى. سول كەزدە لوممەن ۇردىم» دەيدى كۋاگەر.

بىراق باسىنا تەمىر تيسە دە، توبەت تىنىشتالماعان. جانۋار 54 جاستاعى كىسىنى سۇيرەگەن بويدا باقشانىڭ اياعىنا اپارعان. سول جەردە ونىڭ جۇلما-جۇلماسىن شىعارىپتى.

بەلگىلى بولعانى يتكە تالانعان كەلىنشەك بۇل ۇيگە قوناققا كەلگەن. ءۇي يەسى – ونىڭ جالعىزباستى تۋعان اكپەسى. مۇندا تاعى ءبىر ەر ازامات بولعان. «بۇلار ءجيى باس قوسىپ ىشىمدىك ىشەتىن» دەيدى كورشىلەرى. ولاردىڭ ايتۋىنشا، قايعىلى جاعداي دا سونداي كوڭىلدى وتىرىستان كەيىن بولعان. ماس بولعان ءۇي يەسىنىڭ سىڭلىسىنە اراشا تۇسۋگە شاماسى كەلمەپتى. شاقىرىلعان پوليتسەيلەردىڭ دە توبەتتى اجىراتۋعا جۇرەگى داۋالاماي تۇرىپ قالعان. تەك كەيىن قوسىلعان ءتارتىپ ساقشىسىنىڭ ءبىرى كەلگەن بويدا جانۋارعا وق جاۋدىرىپتى.

زارداپ شەككەن ايەل شۇعىل وبلىستىق اۋرۋحاناعا جەتكىزىلىپ، جانساقتاۋ بولىمىنە جاتقىزىلعان. الايدا دارىگەرلەر ونىڭ ءومىرىن ساقتاپ قالا المادى. ولاردىڭ ايتۋىنشا، العان جاراقاتىنان ناۋقاس 2 ليترگە جۋىق قان جوعالتقان. سونىڭ سالدارىنان 54 جاستاعى ايەل اۋرۋحانادا كوز جۇمدى.   كۋاگەرلەردىڭ ايتۋىنشا، ادام ولتىرگەن يت ءتورت جىل بۇرىن پايدا بولىپتى. ىلعي بوس جۇرەتىن قاباعان پيتبۋل تۇقىمى بۇعان دەيىن دە ەكى ادامعا ازۋىن باتىرعان دەيدى. ال قازىر وسى دەرەككە قاتىستى سوتقا دەيىنگى تەرگەۋ ءجۇرىپ جاتىر.

سوڭعى جاڭالىقتار