11 قىركۇيەك, 22:58 195 0 ادەبيەت ماقسات قۇسايىنوۆ

 جىل سوڭىنا دەيىن 5 ايتىس وتەدى

ايتىس – قاسيەتتى ونەر. ەءلدىڭ رۋحىن كوتەرىپ، ەڭسەسىن تىكتەيتىن كيەلى ونەر قازاقپەن بىرگە تەڭ جاساپ كەلەدى. ال ءسوز مارجانىن تەرگەن قادىرلى ونەرگە بيلىك پارتياسىنىڭ كوڭىل ءبولۋى قۇپتارلىق جايت.  

«Nur Otan» پارتياسى، «ايتىس اقىندارى مەن جىرشى، تەرمەشىلەردىڭ حالىقارالىق وداعى» جانە «Qazaqstan» رەسپۋبليكالىق تەلەراديوكورپوراتسياسى اراسىندا ايتىس ونەرىن دامىتۋ جانە ناسيحاتتاۋ بويىنشا ءوزارا ىنتىماقتاستىق تۋرالى مەموراندۋمعا قول قويىلدى.

مەموراندۋمنىڭ ماقساتى – ۇلتىمىزدىڭ ۇلى مۇراسىن، وزىق داستۇرلەرى مەن مادەني قازىناسىن تۇگەندەۋگە، سونىڭ ىشىندە ەجەلگى حالىق ونەرى – ايتىستى زامانعا ساي تۇلەتىپ، حالىق اراسىندا ناسيحاتتاۋ.

تاراپتاردىڭ كەلىسىمىنە سايكەس، الداعى ايتىستاردىڭ بارلىعى «ايتىس اقىندارى مەن جىرشى، تەرمەشىلەردىڭ حالىقارالىق وداعىمەن» ۇيىمداستىرىلىپ، «Nur Otan» پارتياسىنىڭ تىكەلەي دەمەۋشىلىك قولداۋىمەن وتكىزىلەدى. ال ايتىستى ءتۇسىرۋ، كورسەتۋ، ترانسلياتسيالاۋ ءۇشىن «Qazaqstan»    رەسپۋبليكالىق تەلەراديوكورپوراتسياسى ايرىقشا قۇقىققا يە بولدى.

تاياۋ كۇندەرى بىرلەسكەن جۇمىستاردىڭ اياسىندا «Nur Otan» پارتياسىنىڭ قولداۋىمەن التاي مەن اتىراۋ، الاتاۋ مەن ارقا اراسىن ءدۇبىرلى دۋمانعا بولەيتىن ايتىس الامانى باستالادى. اتاپ ايتقاندا، جىل سوڭىنا دەيىن «جىر جۇلدىزى فاريزا» اتتى بەلگىلى اقىن ف. وڭعارسىنوۆانىڭ 80 جىلدىعىنا وراي ايتىس، سىرشىل سۋرەتكەر جازۋشى س.سەيفۋلليننىڭ 125 جىلدىعىنا وراي حالىقارالىق ايتىس، «وتان – وتباسىنان باستالادى» اتتى وتباسىلار ايتىسى، «بەرەكە بىرلىگىڭدە، ەلىم» اتتى اقىندار ايتىسى جانە «التىن دومبىرا» جىلدىق قورىتىندى ايتىسى وتەدى.

ايتىس قىزىل سوزدەن قىرمان جاساۋ ەمەس، بەينەلى ءتىل، تەرەڭ وي، استارلى ءسوز. ونىڭ قۇدىرەتى دە سوندا. قاس-قاعىم ساتتە قيىننان قيىستىرىپ، ونەر توگۋ ەكىنىڭ ءبىرىنىڭ ماڭدايىنا جازىلماعان. سون­دىقتان كوزىقاراقتى، كوكىرەگى وياۋ حالىق، ەڭ الدىمەن، ايتىستى ونەر رەتىندە قابىل­داپ، ونىڭ وسى ەرەكشەلىگىن جوعارى باعا­لاعان. جانە ايتىستا اقيقات كوپ ايتىلادى. اقىن حالىقتىڭ كوكەيىندەگى ءسوزدى ءدوپ ايتىپ، بيلىككە جەتكىزەدى. سول ارقىلى ءسوز سالماعىنا تىڭدارماننىڭ ىقىلاسى اۋادى.

قازاق حالقىنىڭ عانا ماڭدايىنا بىتكەن ايتىس ونەرىنىڭ سوڭعى جىلدارى شىرقاۋ بيىككە كوتەرىلگەنى بەلگىلى. ال ءتول ونەردى دارىپتەپ، ناسيحاتتاۋعا بيلىك پارتياسىنىڭ اتسالىسۋى كوپتى قۋانتىپ وتىر.

 

 

 

سوڭعى جاڭالىقتار