9 قىركۇيەك, 18:45 140 0 جاڭالىقتار Túrkistan Gazeti

ارىستاعى بالالار ءۇيىنىڭ تاربيەلەنۋشىلەرى مولدوۆادا ءجۇر

ارىس بالالار ءۇيىنىڭ ءتورت تاربيەلەنۋشىلەرى 8 قىركۇيەكتە مولدوۆا استاناسىنا ۇشىپ كەلدى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.

قازاقستاندىق جاسوسپىرىمدەردىڭ دۇنيەتانىمىن كەڭەيتىپ، رۋحاني بايىتۋعا ىقپال ەتەتىن وسى ىسپەتتەس سەميناردى وقۋ جىلىنىڭ باسىندا وتكىزۋ باستاماسىن سىرتقى ىستەر مينيسترلىگىنىڭ «نۇر وتان» باستاۋىش پارتيا ۇيىمىنىڭ ۇيلەستىرۋىمەن قازاقستاننىڭ كيشينەۆ قالاسىنداعى باس كونسۋلدىعى كوتەرگەن.

باستاما اۆتورلارىنىڭ قايىرىمدىلىق اكتسياسىنا دەمەۋشىلىك ءبىلدىرۋ ۇسىنىسىن «KMG International» كومپانياسىنىڭ بولىمشەلەرى: «Rompetrol مولدوۆا»، «KAZROM FLOUR» جشس، «Cricova-vin»، «SupremaLex» كومپانيالارى جانە گاگاۋزيانىڭ اتقارۋشى كوميتەتى كوتەردى.

باس كونسۋلدىق پەن «Rompetrol مولدوۆا» كومپانياسىنىڭ وكىلدەرى تۋر قاتىسۋشىلارىن كيشينەۆتىڭ حالىقارالىق اۋەجايىندا قارسى الىپ، ۇزاق جولعا قاراماستان، بىردەن قالالىق تۋردى باستادى.

كەيىنىرەك، بالالار جاڭا پىسكەن جەمىستەر مەن كوكونىستەرگە باي ۇلتتىق تاعامداردان ءدام تاتىپ، داستارقان باسىندا ساپار تۋرالى العاشقى اسەرلەرىمەن ءبولىستى، جەرگىلىكتى سالت-داستۇرلەر تۋرالى قۇنىعا تىڭداپ، قازاقستاندىق ءومىر سالتىنان ەرەكشەلىكتەرى جايىندا ءوز پىكىرلەرىمەن ءبولىستى.

بولاشاقتا ەسترادا جۇلدىزى بولۋدى ارماندايتىن ورالبەك ءجۇسىپوۆ ساپار تۋرالى ۇلكەن اسەرمەن اڭگىمەلەيدى. «ءبىز ءۇشىن، ارينە، مولداۆياعا شاقىرىلعانىمىز تۋرالى حابار كۇتپەگەن جەردەن كەلدى. ەستىگەن كۇننەن باستاپ ءبىز ۇشاققا وتىرۋدى اسىعا كۇتتىك. جول وتە جاقسى ءوتتى، ۇشاق قونعان كەزدە ءبىز قالانى تەرەزەلەردەن ءسال كورە الدىق. ءبىز اۋەجايدان شىققان كەزدە اۋا-رايى تاماشا بولدى. ماعان مولدوۆانىڭ ۇلتتىق مۋزىكاسى وتە ۇنادى. مەن ونىمەن بولاشاقتا جاقىنىراق تانىسامىن دەگەن ۇمىتتەمىن، مۇمكىن ءبىر ءانىن ۇيرەنىپ الارمىن. مەن بۇل ساپاردان كوپ نارسەنى كۇتەمىن»، دەيدى ورالبەك.

اڭگىمە بارىسىندا بالالار وزدەرىنىڭ ومىرلەرى مەن بولاشاققا جوسپارلارى تۋرالى ىقىلاسپەن ايتتى. ولار ەرەسەك ومىرگە وپتيميستىك كوزقاراسپەن قاراپ، تاڭداعان ماماندىقتارى بويىنشا جوعارى مامان بولۋدى ارماندايدى. مىسالى، تولعاناي ماساليەۆا ماتەماتيكا ءپانىنىڭ مۇعالىمى بولۋدى جوسپارلاعان، ال بەكسۇلتان الىبەك قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ اسكەري قىزمەتكەرىنىڭ جولىن تاڭداعان.

بەلگىلى حيرۋرگ بولۋدى ارمانداعان كارينا سۋلايمانوۆا شەتەلگە العاشقى ساپارى جايلى ەستە قالعان ساتتەرى تۋرالى بايانداپ بەردى. «مولدوۆا بىزگە وتە ۇنادى – كليماتى سونداي جىلى، اۋا دا تازا. كيشينەۆتىڭ ءوزى وتە جاسىل جانە ادەمى قالا ەكەن. ءبىز وسى ەلدىڭ تاريحى تۋرالى، ونىڭ حالقى تۋرالى مۇمكىندىگىنشە كوپ بىلگىمىز كەلەدى، ولارعا ءبىزدىڭ قازاقستان تۋرالى ايتىپ بەرگىمىز كەلەدى»، دەيدى كىشكەنتاي كارينا.

«مەن ءبىزدىڭ بۇلدىرشىندەرىمىز ءۇشىن وتە قۋانىشتىمىن. ولاردىڭ باقىتتى، شابىتتانعان جۇزدەرىن، ساپاردان، وزدەرىنە دەگەن ىقىلاستان، ەرەسەكتەردىڭ جىلى لەبىزى مەن مەيىرىمىنە بولەنگەننەن ۇلكەن اسەر العانىن كورۋ مەن ءۇشىن ۇلكەن قۋانىش. بۇل ساپار ءبىزدىڭ وقۋشىلارىمىزدىڭ عانا ەمەس، سونىمەن بىرگە وسى جازدا ۇلكەن سىناقتى باستان كەشكەن ارىس قالاسىنىڭ بارلىق تۇرعىندارىنىڭ جۇرەگىنە جول تاباتىنىنا سەنىمدىمىن»، - دەيدى بالالار ءۇيىنىڭ ديرەكتورى مەرۋەرت سۇيىندىكوۆا.

«ءبىزدى قولداعان بارلىق قازاقستاندىقتارعا العىسىمىز شەكسىز. مولداۆياعا بالالارعا ارنالعان تۋر ۇيىمداستىرۋعا كومەكتەسكەن قازاقستاننىڭ باس كونسۋلدىعىنا، سىرتقى ىستەر مينيسترلىگىنە جانە«نۇر وتان» پارتياسىنا ەرەكشە العىس بىلدىرگىم كەلەدى»، - دەپ قوستى م.سۇيىندىكوۆا.

13 قىركۇيەككە دەيىن جالعاساتىن ساياحات بارىسىندا ارىستىق جەتكىنشەكتەر مولداۆيانىڭ مۇراجايلارىن، مادەني جانە تاريحي ورتالىقتارىن، اكۆاپاركتى، ويىن-ساۋىق ورتالىقتارىن، ەۋرو-2020 ىرىكتەۋ كەزەڭىندە وينايتىن مولدوۆا-تۇركيا فۋتبول ماتچىن كورۋدى جانە قارا تەڭىزگە بارۋدى جوسپارلاپ وتىر.

دۇيسەنبى كۇنى بالالار مولدوۆانىڭ وڭتۇستىگىندەگى گاگاۋزيا اۆتونوميالىق-تەرريتوريالدىق بولىگىنىڭ استاناسى كومراتتاعى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ءمۇسىنى ورنالاسقان داڭق اللەياسىنا باردى جانە ونىڭ اۋماعىنداعى وزگە دە بەلگىلى نىسانداردا بولدى.

تەگتەر مولدوۆا ارىس

سوڭعى جاڭالىقتار