10 قىركۇيەك, 15:37 213 0 جاھان انار لەپەسوۆا

پحەنيان ءۇش ايدا سەگىز زىمىران سىناعىن وتكىزدى

بۇگىن Cولتۇستىك كورەيا جاپون تەڭىزىنە قاراتا ەكى زىمىران ۇشىردى. پحەنيان يادرولىق باعدارلاماسىنىڭ بولاشاعى تۋرالى اقش-پەن كەلىسسوزدەردى جالعاستىرماق نيەتى بارىن بىلدىرگەن سوڭ ىلە-شالا زىمىران ۇشىرعان، دەپ حابارلايدى ورتالىق ازيانىڭ جاڭالىقتار قىزمەتى. 

سولتۇستىك كورەيا زىمىراندارىنىڭ قاي اۋماققا تۇسكەنى تۋرالى ازىرگە اقپارات جوق.

جاپونيا قورعانىس مينيسترلىگى ەل اۋماعىنا سولتۇستىك كورەيا ۇشىرعان زىمىراندار تۇسكەنى تۋرالى مالىمەت جوعىن، قازىرگى كەزدە ۇلتتىق قاۋىپسىزدىگىنە توتەنشە قاۋىپ ءتونىپ تۇرماعانىن حابارلادى.

اقش پرەزيدەنتى دونالد ترامپ پەن سولتۇستىك كورەيا باسشىسى كيم چەن ىن وڭتۇستىك كورەيا مەن سولتۇستىك كورەيا اراسىنداعى شەكارادا كەزدەسكەننەن كەيىن پحەنيان وسىمەن سەگىزىنشى مارتە زىمىران سىناعىن وتكىزدى.

"امەريكا داۋىسى" راديوسى اقش اكىمشىلىگىنىڭ جوعارى لاۋازىمدى وكىلىنىڭ ء"بىز سولتۇستىك كورەيانىڭ زىمىران ۇشىرعانىنان حاباردارمىز. ءبىز جاعدايدى باقىلاپ، ايماقتاعى وداقتاستارىمىزبەن كەڭەسىپ وتىرمىز" دەگەن ءسوزىن كەلتىرگەن.

سەۋل پحەنياندى بالليستيكالىق زىمىران ۇشىرۋدى توقتاتۋعا شاقىرىپ كەلەدى. وڭتۇستىك كورەيا بيلىگى زىمىران سىناعى كورەي تۇبەگىندەگى شيەلەنىستى ازايتۋعا سەپتەسە المايدى دەپ سانايدى. پحەنيان زىمىران ۇشىرۋدى كورشى ەلگە اقش-پەن اسكەري سالاداعى ىنتىماقتاستىعى ءۇشىن جاسالعان ەسكەرتۋ دەپ اتاعان.

سوڭعى جاڭالىقتار