9 قىركۇيەك 2019, 15:00 496 0 جاڭالىقتار Túrkistan Gazeti

اباي مەن ءال-ءفارابيدىڭ مەرەيتويلارى قالاي اتاپ وتىلەدى

بۇگىن اقوردادا قازاقستان رەسپۋبليكاسىنىڭ مەملەكەتتىك حاتشىسى مارات ءتاجيننىڭ توراعالىعىمەن اباي قۇنانبايۇلىنىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيانىڭ وتىرىسى ءوتتى، دەپ حابارلايدى قازاقپارات.

وتىرىستى اشقان مەملەكەتتىك حاتشى مارات ءتاجين «رۋحاني جاڭعىرۋ» باعدارلاماسىنىڭ ماڭىزدى باعىتى ۇلتتىڭ «مادەني كودىن» ساقتاۋ بولىپ تابىلادى، بۇل ورايدا، مەرەيتويلىق ءىس-شارالار ابايدىڭ رۋحاني مۇراسىن ساقتاۋعا، زەردەلەۋگە جانە ناسيحاتتاۋعا باعىتتالۋى ءتيىس، – دەپ اتاپ ءوتتى. وتىرىستا ءسوز سويلەگەن مادەنيەت جانە سپورت ءمينيسترى اقتوتى رايىمقۇلوۆا، ءبىلىم جانە عىلىم ءمينيسترى اسحات ايماعامبەتوۆ، اقپارات جانە قوعامدىق دامۋ ءمينيسترى داۋرەن ايماعامبەتوۆ، گۋميلەۆ اتىنداعى ەۇۋ رەكتورى ەرلان سىدىقوۆ، شىعىس قازاقستان وبلىسىنىڭ اكىمى دانيال احمەتوۆ، ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحانۇلى  جوسپارلانعان ءىس-شارالار مەن جوبالار تۋرالى باياندادى. اباي شىعارمالارى شەتەلدەردىڭ ىرگەلى تىلدەرىنە جانە تۇركى حالىقتارىنىڭ تىلدەرىنە اۋدارىلىپ، جارىققا شىعارىلادى. ۇلى اقىننىڭ ءومىرى مەن شىعارماشىلىعى تۋرالى دەرەكتى فيلمدەر تۇسىرىلەدى. يۋنەسكو-نىڭ شتاب-پاتەرىندە قازاقستاننىڭ ۇزدىك شىعارماشىلىق ۇجىمدارىنىڭ گالا-كونتسەرتى جانە تانىمال ابايتانۋشى عالىمداردىڭ قاتىسۋىمەن  حالىقارالىق عىلىمي-پراكتيكالىق كونفەرەنتسيا وتەدى. مەرەيتويعا ارنالعان حالىقارالىق كونفەرەنتسيا ەلوردادا وتەدى. مادەنيەت جانە سپورت مينيسترلىگى جانە اكىمدىكتەر ۇلى ويشىلدىڭ مۇرالارىن ناسيحاتتاۋ بويىنشا تەاترلاندىرىلعان قويىلىمدار، مۋزەيلىك ەكسپوناتتار، كىتاپ كورمەلەرىن، شىعارماشىلىق كونكۋرستار مەن فەستيۆالدەر، ايتىستار، ەكسپەديتسيالار، چەللەندجدەر، فلەش-موبتار جانە باسقا دا كوپتەگەن ءىس-شارالار جوسپارلاپ وتىر.

اباي اتىنداعى مەملەكەتتىك اكادەميالىق وپەرا جانە بالەت تەاترى تۇركيا، رەسەي جانە قىتايدا «اباي»  وپەراسى قويىلىمىن ساحنالايدى. ەلىمىزدىڭ بارلىق مەكتەپتەرىندە اشىق ساباقتار، شىعارما جازۋدان، اقىن ولەڭدەرى مەن قارا سوزدەرىن مانەرلەپ وقۋدان كونكۋرستار وتەدى. اباي شىعارماشىلىعىن ۇزدىك بىلۋگە ارنالعان وقۋشىلار اراسىنداعى جالپىرەسپۋبليكالىق وليمپيادانىڭ جەڭىمپازدارى مەن لاۋرەاتتارىنا گۋميلەۆ اتىنداعى ەۇۋ مەن ءال-فارابي اتىنداعى قازۇۋ-دا وقۋ ءۇشىن 50 ءبىلىم گرانتى تاعايىندالاتىن بولادى. ولار ەلوردادا وتەتىن «اباي بالى» سالتاناتىنان قاتىسادى. مۇعالىمدەر مەن وقىتۋشىلار اراسىندا اباي شىعارماشىلىعىن وقىتۋدىڭ ۇزدىك ادىستەمەسى بويىنشا دا كونكۋرستار وتەدى.

ەلىمىزدىڭ بارلىق جوعارى وقۋ ورىندارىندا «اباي وقۋلارى»، كونفەرەنتسيالار مەن سيمپوزيۋمدار، پوەتيكالىق جانە ادەبي فەستيۆالدار، كونكۋرستار مەن وليمپيادالار وتكىزىلەدى. عىلىمي جۇمىستاردى جۇيەلەۋ ءۇشىن ەۇۋ جانىنان «اباي اكادەمياسى» قۇرىلادى، سونداي-اق ابايتانۋ بويىنشا عىلىمي گرانتتار كولەمى ۇلعايتىلادى.

ماسس-مەديادا جانە ينتەرنەت جەلىسىندە كەڭ تۇردە تاراتۋ ارقىلى ۇلى اقىننىڭ ءومىرى مەن شىعارماشىلىعى تۋرالى بىرنەشە تەلەۆيزيالىق جانە راديوباعدارلامالاردىڭ جانە باسقا دا مەديا ونىمدەردىڭ شىعارىلىمى جوسپارلانۋدا.  ەلىمىزدىڭ شىعارماشىلىق وداقتارىنىڭ جۇمىسىندا اباي جانە ونىڭ مۇراسى ەرەكشە ورىن تابۋى ءتيىس. «ابايتانۋ» بويىنشا بەينە جانە اۋديو دارىستەر توپتاماسى ازىرلەنىپ، «اباي الەمى» پورتالى جاڭعىرتىلادى.

مەرەيتوي بارىسىندا «اباي-شاكارىم» ماۆزولەي كەشەنى، ابايدىڭ مۋزەي ءۇيى، قۇنانباي قاجى اۋلەتىنىڭ قورىمى جوندەۋدەن وتكىزىلمەك. وبلىس اكىمدىگى اباي اۋدانىنداعى بىرنەشە جول ۋچاسكەلەرىنە جوندەۋ جۇمىستارىن جۇرگىزۋدى جوسپارلاپ وتىر.

مەملەكەتتىك حاتشى مارات ءتاجين مەمكوميسسياعا مەملەكەت باسشىسىنا ءۇش باستامامەن شىعۋدى ۇسىندى: سەمەي قالاسىنداعى اۋەجايعا اباي ەسىمىن بەرۋ; ادەبيەت جانە ونەر سالاسىنداعى مەملەكەتتىك سىيلىقتى اباي اتىنداعى مەملەكەتتىك سىيلىق دەپ وزگەرتۋ; قازاقستاننىڭ ەلشىلىكتەرىنىڭ بازاسىندا «اباي ورتالىقتارىن» قۇرۋ.

ۇكىمەت اباي قۇنانبايۇلىنىڭ 175 جىلدىق مەرەيتويىن دايىنداۋ جانە وتكىزۋ جونىندەگى جالپىرەسپۋبليكالىق جوسپاردىڭ جوباسىن مەملەكەتتىك كوميسسيانىڭ قاراۋىنا 2019 جىلدىڭ 1 قازانىنا دەيىن ەنگىزۋى ءتيىس.

بۇگىن مەملەكەتتىك حاتشى ءابۋ ناسىر ءال-ءفارابيدىڭ 1150 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيانىڭ وتىرىسىن وتكىزدى.

– ەلباسىنىڭ «ۇلى دالانىڭ جەتى قىرى» ماقالاسىندا اتالعان ۇلى ەسىمدەر ىشىندە  ءال-ءفارابيدىڭ اتى ءبىرىنشى تۇر. ونىڭ مۇراسى الەمدىك وركەنيەتتىڭ يگىلىگى بولىپ تابىلادى، – دەپ اتاپ ءوتتى مەملەكەتتىك حاتشى وتىرىستىڭ اشىلۋىندا.

ءبىلىم جانە عىلىم ءمينيسترى اسحات ايماعامبەتوۆ، ءال-فارابي اتىنداعى قازۇۋ رەكتورى عالىم مۇتانوۆ، سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى، اقپارات جانە قوعامدىق دامۋ ءمينيسترى داۋرەن اباەۆ مەرەيتوي اياسىندا جوسپارلانعان جوبالارى تۋرالى باياندادى.

مەرەيتوي شەڭبەرىندە ءال-فارابي اتىنداعى قازاق ۇلتتىق ۋنيۆەرسيتەتىنىڭ بازاسىندا ونلاين جۋرنال شىعارۋ ارقىلى فارابيتانۋشىلاردىڭ حالىقارالىق ورتالىعىن قۇرۋ جوسپارلانۋدا. «ءال-فارابي جانە الەمدىك وركەنيەت» اتتى حالىقارالىق عىلىمي سيمپوزيۋمگە دايىندىق باستالدى. ۇلى ۇستازدىڭ ەڭبەكتەرى اۋدارىلىپ، جارىققا شىعارىلادى، دەرەكتى فيلمدەر مەن تەلەراديو باعدارلامالار تۇسىرىلەدى. ەلىمىزدىڭ بارلىق جوعارى وقۋ ورىندارىندا، عىلىمي جانە مادەني ۇيىمدارىندا حالقىمىزدىڭ داڭقتى تۇلعاسىنىڭ مۇرالارىن ناسيحاتتاۋعا باعىتتالعان كونفەرەنتسيالار، سيمپوزيۋمدەر جانە باسقا دا كوپتەگەن ءبىلىم، مادەني اكتسيالار وتەدى.

سوڭعى جاڭالىقتار