9 قىركۇيەك 2019, 18:05 418 0 جاڭالىقتار Túrkistan Gazeti

د.نازارباەۆا سەناتورلارعا: حالىققا جاقىن بولۋ كەرەك

سەنات بيۋروسىنىڭ العاشقى وتىرىسى ءوتتى. بۇل تۋرالى سەناتتىڭ ءباسپاسوز قىزمەتى حابارلادى.

سەنات توراعاسىنىڭ ورىنباسارى بەكتاس بەكنازاروۆ سەناتورلاردىڭ وڭىرلەرگە ساپارلارى تۋرالى حاباردار ەتتى.

دەپۋتاتتار ەلىمىزدىڭ بارلىق وبلىستارىنىڭ ءىرى ەلدى مەكەندەرىن، سونداي-اق شالعاي اۋىلداردى دا ارالادى. سەناتورلار ارىس قالاسىن قالپىنا كەلتىرۋ، كوپ بالالى انالارعا، از قامتاماسىز ەتىلگەن وتباسىلارعا اتاۋلى الەۋمەتتىك كومەك كورسەتۋ ماسەلەلەرىن كوتەردى.

«جەرگىلىكتى تۇرعىندار تاراپىنان كوتەرىلگەن تۇيتكىلدى ماسەلەلەر مەن سۇراقتاردىڭ بىرقاتارىن الداعى جۇمىسىمىزدا زاڭ ەرەجەلەرىنە تۇزەتۋلەر ەنگىزۋ ارقىلى نەمەسە ءتيىستى مەملەكەتتىك ورگاندارعا دەپۋتاتتىق ساۋالدار جولداۋ تارتىبىمەن ولاردىڭ شەشىمىن تابۋعا مەيلىنشە ىقپال ەتەتىن بولامىز»، - دەدى ب.بەكنازاروۆ.

پارلامەنت جوعارعى پالاتاسىنىڭ باسشىسى داريعا نازارباەۆا كۇزدە نەگىزگى زاڭ جوباسى رەسپۋبليكالىق بيۋدجەت تۋرالى زاڭ جوباسى بولاتىنىن اتاپ ءوتتى.

«رەسپۋبليكالىق بيۋدجەت بويىنشا جۇمىستاردى بۇگىننەن باستاعان ءجون. سونداي-اق، پرەزيدەنتتىڭ سايلاۋ الدى باعدارلاماسىن، مەملەكەت باسشىسىنىڭ جولداۋىن وسى جىلدىڭ جانە سەسسيانىڭ سوڭىنا دەيىن جۇزەگە اسىرۋ جونىندە قابىلدانۋى قاجەت بىرقاتار زاڭ جوبالارى بار»، - دەدى سەنات توراعاسى.

سەنات قىزمەتىن ودان ءارى اۆتوماتتاندىرۋ تۋرالى ايتا كەلىپ، پارلامەنتتىڭ جوعارعى پالاتاسىنىڭ باسشىسى ارىپتەستەرىن اقپاراتتىق مۇمكىندىكتەردى بەلسەندى پايدالانۋعا جانە ەلەكتروندى فورماتتا جۇمىس ىستەۋگە كوشۋگە شاقىردى.

سەنات باسشىسىنىڭ تاپسىرماسى بويىنشا سەناتتىڭ رەسمي سايتى جاڭعىرتىلدى. ول ازاماتتارمەن، ماسليحاتتارمەن جانە ايماقتارمەن ءوزارا بايلانىس ورناتۋعا باعىتتالعان.

«بۇل دەپۋتاتتاردى ءوز پاراقتارىنا ۇدايى ماڭىز بەرۋگە، ولاردىڭ اتىنا كەلىپ تۇسكەن وتىنىشتەر مەن ۇسىنىستارعا جەدەل نازار اۋدارۋعا مىندەتتەيدى»، - دەدى د.نازارباەۆا.

سەنات توراعاسى وتىرىستى قورىتىندىلاي كەلىپ، مەملەكەت باسشىسى بەلگىلەگەن بيلىك تەڭدەۋى – «قۋاتتى پرەزيدەنت - ىقپالدى پارلامەنت - ەسەپ بەرەتىن ۇكىمەت» تولىق كولەمدە جۇمىس ىستەۋى ءۇشىن دەپۋتاتتار بارلىق شارالاردى قابىلداۋى ءتيىس ەكەنىن اتاپ ءوتتى. «ۋاقىت بىزدەن جاڭاشا ويلاۋدى، زور جاۋاپكەرشىلىكتى تالاپ ەتەدى»، - دەدى سەنات باسشىسى.

كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتى 27 قىركۇيەكتە وتەتىن «زاڭ شىعارۋ ۇدەرىستەرىن ودان ءارى جەتىلدىرۋ» تاقىرىبى بويىنشا پارلامەنتتىك تىڭداۋلارعا دايىندىق جۇمىستارىمەن اينالىساتىن بولدى. سەنات باسشىسى پارلامەنتتىك تىڭداۋلاردىڭ سيپاتىن وزگەرتۋگە شاقىردى. بيۋرو مۇشەلەرى شارانىڭ ناتيجەلى بولۋى ءۇشىن بىرقاتار ۇسىنىستار ايتتى. اتاپ ايتقاندا، كوكەيكەستى ماسەلەلەردى كوتەرۋ، جۇرتشىلىق وكىلدەرى مەن ساراپشىلاردى پارلامەنتتىك تىڭداۋلارعا شاقىرۋ، قۇقىق قولدانۋ تاجىريبەسىنە باسا نازار اۋدارۋ ۇسىنىلدى.

«زاڭداردىڭ ورىندالۋى بويىنشا مونيتورينگ جاساۋ قۇقىعى بىزدە جوق. بۇل ماسەلەنى تىڭداۋدا تالقىلاۋ جانە زاڭعا ءتيىستى تۇزەتۋلەر ەنگىزۋدى ۇسىنۋ كەرەك. ءبىز سىزدەرمەن اۋقىمدى جۇمىستاردى اتقارىپ كەلەمىز، ءاربىر ءۇتىر-نۇكتەسىنە دەيىن قارايمىز، تۇزەتۋلەرىمىزدى ەنگىزەمىز. بىراق ءبىز ول زاڭنىڭ ودان ءارى قالاي جۇمىس ىستەيتىنىن كورە المايمىز، بىزگە زاڭنان كەيىنگى قۇجاتتار بازاسى زاڭ ەرەجەسىنە سايكەس كەلەتىنى بەلگىسىز بولىپ قالادى. مۇنداي تاجىريبەدەن باس تارتۋ كەرەك»، - دەدى د. نازارباەۆا.

سوڭعى جاڭالىقتار